YA PATRICIA YALANZILE IYATI: “LINO NALI UMWANCE NUVWANGA SANA INTUSI. Ntamanyile ivyakwelela yauze. Na lino nakuzile natwalilile ukwelenganya sile pali vivyo kwene, icakuti insita zimwi nafilwanga nu kukasula.” Kwene ukuya ni cipyu kusyaleta insansa nupya kusilenga umuntu kuya nu umi usuma. Mabuku aingi yalanda ukuti ukukanaelela yauze kungalenga . . .

• Umwi ukoonona ucuza na antu yauze, nupya kungalenga aipaatula ku yauze nu kuyuvwa kwati ali wenga

• Umwi ukulasoka na patalinzile nanti kulauvwa sana uyi.

• Umwi ukwika sile mano ku vipe vino yauze yakacita na cii cingalenga ataya nu umi usuma.

• Umwi ate ukulondela miyele ya ukapepa

• Umwi ukukanaya nu umi usuma nu kulwala indwala wakwe BP, indwala ya ku mwenzo, kuvwa sana kuwaika nu kuvimba alino nu mutwe kuwaya *

UZYE UKWELELA KULI KUTI ULI? Ukwelela u kukanasokela uwataluvyanya nu kusuulako kuli vino atacita. Ukwelela kusipiliula ukuti cino umwi watacita cili sile ningo nanti ukulola kwati pasi umulandu uli onsi. Lelo u kwelenganyapo sana nu kulanzyanya nu wataluvyanya mu nzila isuma pakuti mutwalilile ukuvwana nu muntu wiyo.

Ukwelela kukalanga ukuti umuntu atauvwikisya pali vino umuze atamuluvyanya. Keleela akauvwikisya uwataluvyanya nu kumanya ukuti swensi kwene sweswe ya kaifya muli vino tukacita na muli vino tukavwanga. (Loma 3:23) Ukulozya ku mazwi yaa, Baibo ikati: “Mwatekelana nu kwelelana lyonsi lino umwi wailizyanya pa muze.”—Kolose 3:13.

Cikalondekwa ukwelenganya sana pakuti tumanye vino ukwelela kwacindama na vino kukalenga umuntu ukuya nu kutemwa, pano ukutemwa “kukakundanya vintu vyonsi pamwi mukulemana kumalilike.” (Kolose 3:14) Icumi kwene kulingana ni vyeo vyaya pa webusaiti yakwe ya Mayo Clinic, ukwelela kukalenga . . .

• Twauvwana ningo sana na antu yauze, kuya nu luse ni cikuku kuli wino watuluvyanya

• Twaya nu umi usuma nu kwika mano kuli vyakwe Leza

• Tutasakamikwa sana, nu kulasoka

• Tutalwala melenganyo

MUTAIPEELA MULANDU. Magazini imwi (Disability & Rehabilitation) yalanzile ukuti ukukanaipeela mulandu ali cintu icingatutalila sana, nomba ali cintu cicindame icingalenga umi ukuzipilako. I vyani vingamwazwa ukuti mutaaipeela imilandu?

• Mutalola kwati mutanga muluvyanye, lelo mwazumila ukuti umuntu wensi akaluvyanya—Kasambilizya 7:20

• Mwasambilila kuli vino mwaluvyanya pakuti mutakaswilizyepo nupya

• Mwateeka umwenzo, imisango imwi nanti imiyele iipe ikalengela pakuti isile.—Efeso 4:23, 24

• Mwaya pamwi na ya cuza angamukomelezya, aaya ni cikuuku lelo angatwalilila ukuya acumi kuli mwemwe.—Mapinda 13:20

• Ndi cakuti mwaluvyanya umwi, mwaitandikilako ukulenga uwelelo. Ndi cakuti mwapanga umutende mulaya sana nu mutende.—Mateo 5:23, 24

Pa cisila ca kusambilila Baibo, ya Patricia yalanzile amazwi ali mu kutandikilako kwa cipande cii aakuti “Nuvwile ukuti nakululwa ku kuya ni cipyu ukwalenzile umi wane ukwipa sana, ndakai nsicuula nanti ukucuzya yauze. Ivisinte ivyaya muli Baibo vikalanga ukuti Yeova watutemwa nupya akalonda ivintu vyatuzipila.”

Ya Ron yalanzile ukuti “Ntikangako mano kuli vino yauze yelenganyanga nanti ukucita. Naipingwilanga sile ne mwisikulu. Pakuti inje uwa mutende, nalinzile ukuta ukuya ni cipyu. Natandike ukulola ukuti mutende ni cipyu vyapusana sana. Nizile imanya ukuti pakuti inje nu mutende ntalinzile ukuya ni cipyu. Ndakai lyene naya na kampingu musuma.”