Kulanzyanya kwa mpomvu kukayako ndi cakuti mwemo na ana inu mukulanda pali vino mukwelenganya na pali vino mukalola ivintu.

Kulanzyanya kukatalako ndi cakuti ana yafika pa musinku wa musepela. Lino ana yali anono yamunenanga vyonsi. Nomba pa mulandu wakuti iyaya imisepela yasimunena ivikuyacitikila, nupya musimanya vino yakwelenganya nanti vino yakuyuvwa. Cili kwati imwimilila ku mbalama yuze iya luzi na ana inu nayo yali ku mbalama yuze. Nomba ndi caya vii, ali lino ana inu yakalondekwa sana ukuti mwalanzyanya nayo!

Mwalanda na ana inu pa nsita ino aineco yakulonda. Mwacita vivyo nanti icakuti usiku sana.

“Insita zimwi ungalonda ukuneena umwana uti, ‘Alino ukulonda ukuvwanga? Umusanya onsi indindi pamwi nawe!’ Nomba u mulandu ci uno tungatandikila ukuilizyanya ndi cakuti ana itu yakulonda kulanda naswe? Uzye vii asi avino avyazi aingi yakalondesya?”—Lisa.

“Natemwa kulala zuwa, lelo malyasi asuma aingi yano nkalanzyanya nanane yakayako ala icicila nu siku pakasi.”—Herbert.

CISINTE CA MULI BAIBO: “Tulinzile kwelenganya pa vilondwa vya antu yauze, asi sile pa vilondwa vitu.”—1 Kolinto 10:24.

Mutaaleka icili consi camupumvyanya. Muvyazi umwi monsi wasimike ukuti: “Insita zimwi nkazana sile nkwelenganya pa vintu vyuze lino ana yakulanda nani. Nupya ana yakalola ukuti ntisileko mano kuli vino yakulanda!”

Ndi cakuti namwe vii vikamucitikila, mwazimya TV nu tuombelo tuze. Mwaika mano kuli vino umwana akulanda nu kulenga alole ukuti vino akulanda ivya mpomvu, nanti icakuti vino akulanda vitakweti sana incito.

“Tulinzile kulanga ana itu ukuti vino yakayuvwa vyacindama sana kuli sweswe. Nga yakulola kuti tusisumbako mano kuli vino yakulanda, yatalalanda ivili ku mwenzo nanti limwi yalanenako yauze ukuti aliyo yayazwe.”—Maranda.

“Mutaasoka zuwa, nanti icakuti vino umwana winu akwelenganya visi vya mpomvu.”—Anthony.

CISINTE CA MULI BAIBO: “Ikini amano pali vino mukuuvwa.”—Luka 8:18.

Mwalanda na ana inu na pa nsita zyuze sile. Insita zimwi ana yakalanda sana ndi cakuti yasikulolekesyanya na avyazi.

“Tukasyukila insita ino itukwela motoka. Mikalile iya muli motoka ikalenga tulanzyanye ningo sana ukuluta ukulozyanya manso.”—Nicole.

Insita ya kulya nayo ikaya insita isuma iya kulanzyanya.

“Pa nsita ya cakulya ca manguzi swensi tukasimika pa cintu cimwi cisuma ni ciipe icali catucitikila pa wanda uwo. Kucita vii kukalenga twalemana sana nu kumanya ukuti twakulaazwana nga twakwata intazi.”—Robin.

CISINTE CA MULI BAIBO: “Muntu wensi alinzile kuuvwa zuwa, lelo atekele kulanda.”—Yakobo 1:19.