Ulupwa na Ucuza
Antu aingi cikayatalila ukulauvwana na ya lupwa ni vyuza. Lolini visinte vimwi vya muli Baibo ivingamwazwa kulauvwana na antu yauze.
MUTAAYA NA UKAITEMWE
CISINTE CA MULI BAIBO: “Mutacita vingamuzipila mwenga sile lelo mwacita vingazipila na auzo kwene.”—Filipi 2:4.
VINO CIKUSENULA: Tulaya ya cuza yasuma ndi cakuti tukwika mano kuli vino tungacitila anji kuluta kulondesya ukuti yatucitileko vimwi. Wakwe, ndi cakuti wenga pa atwalane waya na ukaitemwe alaelenganya sile pali vino wene akulonda nu kusya uwakwe pakuti akacite uzelele nu muntu muze. Nupya antu yasitemwa ukuya ya cuza ya muntu akayuvwa pa vintu vino wakwata na vino wamanya. Acino ibuku lyakuti The Road to Character likalanda ukuti “antu aika sile mano pali vino yakaelenganya yakakwata sana intazi.
VINO MUNGACITA:
-
Mwaazwako yauze. Ya cuza yasuma yakatailana nupya yakaazwana. Masambililo yamwi yakalanga ukuti antu atemwa ukwazwa auze yasicula sana ni ndwala zya ku mwenzo nupya yakayacindika.
-
Mwaya na mizu. Amizu yalondololwa ukuti, u kuvwa uyi umu mwenzo lino yauze yakucula kwati wewe ukucula. Nga muli na mizu mutalaomvya amazwi ya kusosya antu yauze, kulikuti, amazwi akaloleka kwati akusekesya lelo akalenga antu yauze kusoka.
Ndi cakuti muli na mizu cilaangukila antu yauze ukulanda namwe. Kucita vivyo kulalenga ukuti mutaya nu lufyengo nupya mulaya ivyuza na antu aku mpanga zyuze nanti ankulilo zipusanepusane.
-
Mwaya pamwi na antu yauze. Ndi cakuti mukukwata insita iyakuya pamwi na antu yauze, cilalenga muyamanye ningo. Nga mukulonda ukukwata yacuza asuma, mufwile kulalanzyanya nayo pa vintu vino ikako sana mano nupya ivicindame. Fwandi mwaya yakuvwa asuma. Mwalanga ukuti mwika sana mano ku vintu ivikasakamika ya cuza inu. Masambililo andakai yakalanda ukuti “ukulanzyanya kusuma kungalenga antu ukuya ni nsansa.”
MWASOOLOLA NINGO IVYUZA
CISINTE CA MULI BAIBO: “Ya cuza aipe yakaonona miyele isuma.”—1 Kolinto 15:33.
VINO CIKUSENULA: Antu yano mukazanwa nayo yangalenga muye ni miyele isuma nanti iipe. Asambilila pa miyele ya antu yakalanda ukuti ivyuza vingalenga umi wa muntu ukusenuka umu nzila izipusanepusane. Wakwe, yakalanda ukuti nga mukuzanwa na antu akapeepa fwaka nanti akulonda ukutaana, namwe kwene ala mulatandika ukucita vivyo kwene.
VINO MUNGACITA: Mwapanga ivyuza na antu aya ni miyele isuma ino namwe mungatemwa ukukwatako. Wakwe, mwalondesya ukuya pamwi na antu akwata mano asuma, amucinzi, aya na ukapekape, alino na aya ni cikuuku.
VISINTE NA VYUZE VYA MULI BAIBO
Tambini mavidyo akalanda pali Baibo aapangilwa kukwazwa atwalane, alumendo na akazyana, na acance ukuya nu umi usuma
MUTAALANDA IVINGASOSYA YAUZE.
“Akacincila ukuvwanga, ivivwangwa vyakwe vikatota wa mupeni.”—MAPINDA 12:18.
MWAYA NA UKAPEKAPE.
“Umuntu wa mwenzo wa luse wene alaya nu longo.”—MAPINDA 11:25.
MWACITILA YAUZE VINO MUKALONDA UKUTI YAAMUCITILA.
“Acino vintu vyonsi vino mukasi kuti antu yamucitile namwe kwene avino mwayacitila.”—MATEO 7:12.
