Umi Usuma
Baibo asi buku likalanda pa vya milembo. Lelo mwaya kusunda ukukatwazwa kuya nu umi usuma. Loliniko visinte vimwi ivingamwazwa kuzifyako umi winu.
MWASUNGA NINGO UMWILI WINU
CISINTE CA MULI BAIBO: “Pano kutaya umuntu umwi uwapata mwili wakwe. Mu cifulo cakwe cii, wene akawimula nu kuusunga ningo.” —Efeso 5:29.
VINO CIKUSENULA: Cisinte ca muli Baibo cikatukomelezya kulaomba papezile amaka itu kusunga ningo umi witu. Lipoti imwi yalanzile ukuti indwala izingi zikaiza pa mulandu wa kukanapingula ningo pa vintu. Fwandi, kupingulapo ningo pa vintu kungalenga tuye nu umi usuma.
VINO MUNGACITA:
-
Mwalya Ivyakulya Ivisuma. Mwaika mano ku kulya nupya mwamwa amanzi alinge.
-
Mwatukusya Umwili. Kutukusya umwili kungalenga umi winu kuzipilako asi mulandu nu musinku, nanti nga mwalemala nanti ukulwala indwala zisipola. Nanti icakuti ya cuza na aakaombela ku cipatala yangamwazwa ukutantika ningo vino mulinzile kulatukusya umwili, mwemwe mulinzile ukwikako sana mano ku kutukusya umwili.
-
Mwalaala Utulo Tulinge. Ndi cakuti musikulala sana utulo tukumanile mungalwala indwala iziipisye. Pa mulandu na vino aingi yakasoololapo, cikalenga yatalala utulo tukumanile. Lelo ndi cakuti mwasoololapo kulaala utulo tukumanile, mulaya nu umi usuma.
MWASENKA KU VICITWA IVIIPE
CISINTE CA MULI BAIBO: “Tulinzile kufumako ku vintu vyonsi vino vikakowezya mili nga ni mipasi itu.”—2 Kolinto 7:1.
VINO CIKUSENULA: Tungaya nu umi usuma ndi cakuti tusikuomvya ivintu ivingonona umi witu nupya ivikalenga sana antu ukulwala alino nu kufwa ivili wa ukupeepa fwaka.
VINO MUNGACITA: Sololini uwanda uno mulata ukuomvya ivintu vivyo. Lino kwasyala sile uwanda onga ukuti uwanda uno mwasolola ufike, muce musumbe ivintu vivyo vyonsi ivili wakwe imisyanga, kaponda, macezi alino na vyuze vikoline na vii. Mutazanwa kuncende ukukazanwa antu akaomvya ivintu vivyo. Londolwelini auzo yano mwataila nanti angamutungilila pali vino imusoloolapo.
IVISINTE NA VYUZE IVYA MULI BAIBO
Mungapokako Baibo mupulintwe kuli ya Nte Yakwe Yeova ayela kuno mwikala
MWAICINGILILA LINO MUKUOMBA.
“Lino wakuula ing’anda, sininkizya ukuti wandila ningo ukulizizya ipaala. Lyene umwi ndi wapona api paala lilyo nga nu kufwa wafwa, ale wemo utalapeelwa umulandu.”—MALANGO 22:8.
MUTAATWALILILA KUSOKA.
“Wiyo akateeka umwenzo wakwata amano aingi. Lelo akapamviwa, wene iciwelewele wakwe cimwi.”—MAPINDA 14:29.
MUTAALILIKISYA.
“Wemo utapita . . . na yayo akailyokezya ivya manona.”—MAPINDA 23:20.
Limwi Mungatemwa Ukulolako na Vii
ZYUKINI!
Ivingamwavwa Ukuya Ni Nsansa—Vino Mungaya nu Umi Usuma Nupya Akome
Uzye ndi cakuti umi witu usi ningo sana, cingalenga tutaya ni nsansa?
