Uzye ya sayansi yangalondolola vino iyulu, insi ni vya umi vizile iviyako? Tungalanda sile ukuti yatamanya. Antu yamwi yakalanda ukuti ya sayansi asambilila sana pali vino iyulu ni insi vyapangwa aangalondolola ningo vino vintu vivyo vizile viyako. Ya Marcelo Gleiser aakasambilizya pa ntanda na mapulaneti pa Koleji ya Dartmouth yalanzile ukuti: “Tutalandapo ivili vyonsi pali vino uumbo watandike.”

Vikwene vino mwalimu wii walanzile aali vino ni cipande cimwi ca muli magazini yakuti Science News calanzile ukuti: “Citangupala ukulondolola vyonsi pali vino umi watandike pano nsi. Ivyalembwa ivyaliko mpiti ivingalondolola vino insi yatandike vyaponzile mpiti sana.” Ukulingana ni vyeo kwene vii, tungalanda sile ukuti ya sayansi yafilwa ukulondolola vino iyulu, insi nu umi vyatandiike.

Limwi mungaelenganya ukuti, ‘Ndi cakuti ivya umi ivyaya pano nsi vyapanzilwe, ale a weni uwavipanzile?’ Nupya munguzya ukuti: ‘Ndi cakuti kwaya Kaumba uwaya na mano nu kutemwa, u mulandu ci uno wazumilizizya ukuti antu yano waumba ya cula? U mulandu ci uno wazumilizizya ukuti kuye imipepele iingi ikasambilizya ivipusanepusane? Nupya u mulandu ci uno angazumilizizya ukuti antu akamupepa yacita iviipe?’

Ya sayansi yatanga yatwavwe kuzana amasuko ku mauzyo yaayo. Nomba cico cisikupiliula ukuti mutanga muzane amasuko ku mauzyo yaayo. Alino antu aingi yazana masuko ku mauzyo yaa muli Baibo.

Nga mukulonda ukumanya umulandu uno ya sayansi yamwi aatandike kusambilila Baibo yazumiliile ukuti kwaya Kaumba, yangiini pa jw.org. Muye pakuti “vino yamwi yakalanda pali vino umi watandiike.”