Eliya uvwile ukuti: Umwene Aabu watafwa. Tungelenganya kasema uwa cikoloci akulemola ivilezu lino akwelenganya, akuzingulusya na amanso lino akwelenganya pa miku uwingi ino waombanga nu mwene wii umwipe sana. Eliya wazizimizye sana! Umwene Aabu na namwene Yezebele mamakwe yazinganyanga Eliya nu kumucuzya pa miku iingi icakuti kwasile kwempe ukuti afwe. Umwene wakanyile ukulesya isunde lino Yezebele wapanzile ilya kukoma ya kasema yakwe Yeova aingi cuze. Aabu na Yezebele yaombiile pamwi ukukoma umonsi uwa kaele nupya mulungami, Naboti, pamwi na ana yakwe pa mulandu sile wakwe ukaitemwe. Eliya waile anena Aabu ilandwe lyakwe Yeova ilya upinguzi pali vino vyali nu kucitikila Aabu na Yezebele alino nu lupwa lwao lonsi. Lyene paa amazwi yakwe Leza yafikiliziwe. Aabu wafwile kulingana na viivi kwene vino Yeova walanzile.—1 Yamwene 18:4; 21:1-26; 22:37, 38; 2 Yamwene 9:26.

Nanti ciye vivyo, Eliya wamanyile ukuti alinzile ukutwalilila ukuzizimizya. Yezebele wali ala acili nu umi, nupya watunkanga ulupwa lwakwe alino nu luko lonsi ukutwalilila ukucita iviipe. Eliya wali nu kukwata intazi na zyuze, nupya wakweti nu mulimo wa kusambilizya Elisha wino yapita nawe nupya uwali nu kumupyana. Fwandi lekini tulande pa milimo itatu iyakusyalikizya ino Eliya wali nu kuomba. Lino tukulola vino utailo wakwe wamwazwilizye ukuzizimizya, tulinzile nu kulola vino tungakomya utailo witu mu tusita tuu ututale tuno tukwikalamo.

Ahazi, umwana wakwe Aabu na Yezebele, u watandike ukuteeka Izlaeli lyene. Mu cifulo ca kusambililako kuli vino avyazi yakwe yacisile, watandike ukulondela mu misango yao iipe. (1 Yamwene 22:52) Wakwe vino avyazi yakwe yacitanga, Ahazi nawe kwene wapepanga Baali. Ukupepa Baali kwalenganga antu ukucita iviipe ivili wa kucita uzelele api tempele alino nu kupeela ana impolelwa. Uzye kwali icali nu kulenga Ahazi asenuke muli vino wacitanga nu kwazwa antu yakwe ukuya ni cisinka kuli Yeova?

Icintu cimwi iciipe cacitikile umwene wii uwacance nupya umunkalwe. Waponyile kufuma apipaala ilipapatane ili sano lyakwe nupya wacisike sana. Nanti i cakuti waculanga sana, atatazile alenge Yeova ukuti amwazwe. Watumile inkombe zimwi ku alwani yakwe ku Filisti musumba wa ku Ekiloni kuti yakuzye leza wao, Baali Zebubi ndi cakuti amapola nanti foo. Yeova wasosile sana. Watumile umungeli kuli Eliya, pakuti Eliya anene inkombe ziizi ukuti ziwelele. Kasema wanenyile inkombe ziizi ukuswililamo kuli Ahazi nu kumutwalila ilandwe ilikalipe sana. Ahazi waluvyanizye sana pa kulenga ciloleke kwati mu Izlaeli mutaali Leza. Yeova wapingwile ukuti Ahazi atalatala afume pa usanzi wakwe.—2 Yamwene 1:2-4.

Ahazi ataalapiile uzizye inkombe ati: “Uzye umuntu kwene wiyo wino mwalimwakomenkanya walakuloleka uli?” Inkombe zyalondolwile ukuomvya ivyakuzwala vino kasema wazwite, nupya papo kwene sile Ahazi walanzile ati: “A Eliya.” (2 Yamwene 1:7, 8) Icicindama sana ukwiusya ukuti Eliya wangupiizye sana imikalile nupya wisile amano ku kuombela Leza icakuti wamanyikilwanga ku vya kuzwala iviiyele vino wazwalanga. Ukulanda sile icisinka vii nga vitaomvile kuli Ahazi na avyazi yakwe aatemilwe sana ivyuma. Vino Eliya wacisile, ndakai vikatwiusyako ukuti tulinzile ukwikala kulingana na vino Yesu watupanzileko amano ukuti tulinzile ukwangupazya imikalile, nu kwika amanso pa vintu vicindamisye.—Mateo 6:22-24.

Ahazi walondanga ukulandula, fwandi watumile asilika yakwe 50 kuti yakaleme Eliya. Lino yazanyile Eliya “ala ali pa mwamba papela,” * mukalamba wa vita walandiile mwi zina lya mwene ni zwi lya maka nupya ilikalipe ukumunena ukuti ‘aike pansi’—pakuti yamuleme. Tale elenganyini pali cii! Nanti icakuti yamanyile ukuti Eliya wali “umuntu wakwe Leza,” asilika yayo yelenginye ukuti cili sile ningo ukumucuzya nu kumutiinya. Yaponzile sana! Eliya wanenyile mukalamba wa vita ati: ‘Ndi cakuti nene muntu wakwe Yeova, umoto kawike likwene ukufuma kwiyulu wize ukoce, ufwe pamwi na antu yako ya amakumi yasano.’ Leza wacisilepo cimwi! ‘Nu moto wafumile kwi yulu nu kumoca kumwi na aonsi makumi yasano yano wali nayo.’ (2 Yamwene 1:9, 10) Ivyacitikile asilika yaya vikatwiusyako ukuti Yeova asiuvwa ningo ndi cakuti antu yakucuzya aomvi yakwe nu kukanayapeela mucinzi.—1 Milandu 16:21, 22.

Ahazi watumile mukalamba wa vita na muze pamwi na aonsi 50. Umukalamba wa vita wii wakwe ciili wene wiipisye ukuluta nu wa kutandikilapo. Ica kutandikilako, atasambilileko ku mfwa ya yonsi yaaya 51, nanti i cakuti waweni ni itwi lyao mu mbali ya mwamba. Cuze i cakuti, atalanzile sile amazwi yaya kwene yano umwene wamutumile ukuyanena Eliya akuti “ika” lelo walunzilepo ni zwi lyakuti “zuwa”! Ataakweti mano! Fwandi nawe kwene pamwi na antu yano wali nayo yafwile imfwa ili imwi na iya kwene ino aonsi ya pa kutandika yafwileko. Umwene wii ataakweti amano nanti apanono. Mu cifulo ca kusenuka, watumile asilika na yauze kwene. Icazifileko i cakuti mukalamba wa vita wakwe citatu wene waakweti amano. Waicefiizye pa kulanda na Eliya nupya wamupaapasile ukuti ayaleke yaye nu umi. Eliya, umuntu wakwe Leza, wakolinye vino Yeova waya nu luse pa kwasuka mukalamba wa vita uwali umuicefye. Umungeli wakwe Yeova wanenyile Eliya ukuti apite na asilika yaya. Eliya uvwilile nupya waswilizyepo ukulanda mazwi ali yamwi kwene aupinguzi yano Yeova walanzile pa mwene wii umwipe. Amazwi yakwe Leza yafikiliziwe, Ahazi wafwile. Wateesile sile imyaka iili.—2 Yamwene 1:11-17.

Uzye Eliya wazizimizye uli nanti i cakuti antu yali ni cilumba nupya yacipondoka? Iuzyo lilyo lyacindama sana ndakai, uzye asi avivyo? Uzye catala camuwayapo lino umuntu umwi wino mwikako sana amano wakana ukuvwa ku visuma vino mukumunena nupya atwalilila nu kucita iviipe? Uzye tungazizimizya uli intazi zya musango uu? Tungasambililako cimwi ku ncende ino asilika yazanyilepo Eliya, “pa mwamba papela.” Tutange tusondwelele icalenzile aye paapa, nomba tungati vino wapepanga sana, afwile waweni ukuti ukwikala uku incende iya kuno wali nu kuya wenga kwali nu kumwazwa ukupalama sana kuli Leza wakwe wino watemilwe sana. (Yakobo 5:16-18) Fwandi naswe kwene tungaalondako insita iyakuti ituyako swenga na Leza, pakuti itupepa kuli aliwe nu kumunena intazi zyonsi zino tukupitamo. Lyene tulaya na maka ya kuzizimizya lino antu yano tukwikala nayo yakucita iviipe nu kucita ivintu ivingatuletela uzanzo.

Lyene insita yafisile iyakuti Eliya apeele umulimo uiyele uno waomba ku muntu muze. Lolini vino wacisile. Lino wene na Elisya yafumanga mu musumba wa Giligali, Eliya wanenyile Elisya ukuti asyale, alino wene apite wenga ukuya ku Betele, apaali amakilomita 11. Elisya waswike na maka ati: ‘Nalapa umwi zina lyakwe Yeova wa umi, nga na pali wewe ukuti ntalakusya.’ Pa cisila yapisile yonsi yoili ku Betele, lino yafisile Eliya wanenyile Elisya ukuti cingazipa asyale mu Betele kwene, lyene wene apite wenga ku Yeliko, ukwatalimfile makilomita 22. Ukwaula nu kuvwa intete Elisya waswike ivili vimwi kwene na vino waswike pa kutandika. Umuku wakwe citatu, lino yafisile ku Yeliko ivili vimwi kwene vyacitike nupya lino yatatala yafika ku Luzi Lwa Yodani, apali makilomita 8. Nupya kwene umonsi wa cance wakanyile ukusyala. Atalondanga ukusya Eliya!—2 Yamwene 2:1-6.

Elisya walangililanga vino ukutemwa kwa cumi kwaya. Kuu ali kutemwa kuno na Luti wakweti kuli Naomi, kutemwa ukukaikalilila u kwalenzile akane ukusya nyinavyala. (Luti 1:15, 16) Antu yakwe Leza ndakai yakalondekwa ukuya ni miyele ii ukuluta na vino cali mpiti. Uzye tukalola ukuti imiyele ii yacindama wakwe vino Elisya wacisile?

Eliya afwile wakomeleziwe sana ukulola uwacance wino waombanga nawe ali sana ni cisinka. Pa mulandu nu kutemwa kwene, calenzile Elisya akwate isyuko lya kulola kuno Eliya akucita icizungusyo ca kusyalikizya. Lino yafisile pa Luzi Lwa Yodani, ulwali uluzule sana nupya uluzike, Eliya umile icakuzwala cakwe pa manzi. Amanzi imilile kuu na kuu! Na yauze aaweniko kuno Eliya akucita icizungusyo cii, “Antu amakumi yasano amwi umba lyakwe yakasema,” aasambililanga ivya kutungulula ukupepa kwa cumi mu mpanga iya. (2 Yamwene 2:7, 8) Eliya walolile calimwi isukulu liili. Kwali insita imwi ino Eliya watazile ayuvwa ukuti wali ali kasema sile wenga uwa cumi uwasyazileko mu mpanga. Ukufuma lili kwene, Yeova wapoleelenga Eliya pa kuzizimizya kwakwe, nupya walenzile aloleko kuno ya kapepa yakwe acumi yakuvulilako sile.—1 Yamwene 19:10.

Lino yalamvile uluzi lwa Yodani, Eliya wanenyile Elisya ati: “Unene, uzye icani cino ningakucitila lino ntali nsendwe ukufuma kunuli?” Eliya wamanyile ukuti insita iyakuti asendwe yatifika. Atuvwile uzuwa pa milimo isuma nupya icindame ino cuzakwe uwacance wali nu kuomba. Mu cifulo cakwe cico, Eliya waitemiilwe ukumwazwa ukufika pano angakwanisya. Elisya walenzile sile ukuti: “Umpeele amaka yamwi akuti inje vino waya.” (2 Yamwene 2:9) Atalozizye mukuti walondanga umupasi wa muzilo ucizile pali uno Eliya wapokelile. Lelo walenzile ukuti apyane imilimo ino Eliya waombanga wakwe viivi kwene vino umwana iyeli akapeelwa iviingi pa vyuma vino isi wakwata nanti ivivuzile imiku ili pakuti apyane imilimo ino alinzile ukuomba. (Malango 21:17) Vino u wali nu kupyana imilimo yakwe Leza ino Eliya waombanga, wamanyile ukuti walondekwanga ukuya umusipe wakwe Eliya pakuti aombe ningo mulimo.

Eliya waicefizye nu kuleka Yeova aliwe aasuke vino Elisya walenzile. Ndi cakuti Yeova wali nu kuzumilizya Elisya ukulola kuno Leza akusenda kasema wa cikoloci Eliya, cali nu kulanga ukuti Leza watazumilizya vino Elisha walenzile. Nupya pataalengile sana, lino ya cuza yaa yaili yapitanga “ala yafumile yakulanda,” cimwi icakuzungusya cacitike!—2 Yamwene 2:10, 11.

Icizungusyo cayanga cikukulilako iyulu nalyo lyayanga likusenuka ni ciyengese ala cikupalamila. Tungelenganya pali vino icimbilimbili cakaanga, icongo icaliko pa mulandu na nkungulupya uwakatwike, alino pakonka iciluswepo icapatikizye aonsi yaa ukupatukana, nupya vino yaweni vyalenzile yuvwe sana intete. Cino yaweni lyali iceleta ilyayengesanga kwati lyapangilwa nu moto. Eliya wamanyile ukuti insita yakwe yatifika. Uzye Eliya wakwezilemo? Baibo italanda. Asi mulandu ni cacitike, uvwile ukuti watandika ukusendwa papelapela mu muza, ala akusendwa nu muza!

Elisya watamvileko, nupya camuzungwisye. Pa mulandu wakuti waweniko kuno icintu ciici icakuzungusya cacitikanga, Elisha wamanyile ukuti Yeova wali nu kumupeela vino walenzile kuli kuti ukumupeela amaka yano Eliya wakweti imiku iili. Nomba Elisya wali sana nu ulanda ukwelenganya pali vivyo. Ataamanyile kuno cuza wakwe wino watemilwe sana wayanga, nomba atenekelanga ukuti alalolapo Eliya nupya. Watandike ukupuunda ati: “Iye mwe tata wane mwe! Tata wane mwe! Kakulula wa ina Izlaeli we!” Walolanga kuno kasambilizya wakwe wino watemilwe sana akupita, nupya walepwile ivyakuzwala vyakwe pa mulandu nu ulanda.—2 Yamwene 2:12.

Lino Eliya wayanga akukwela mwi yulu, uzye uvwanga vino cuza wakwe akulila sana nu kuponya aminsozi? Wamanyile ukuti ukukwata cuza wa musango uwa kwamwazwile ukuzizimizya intazi zimwi. Tulinzile ukusambilila kuli Eliya nu kupanga ya cuza aatemwa Leza nupya akalonda ukucita ukulonda kwakwe.

Aekwi kuno Eliya waile lyene? Aamumipepele imwi yakasambilizya ukuti wasenzilwe ukwi yulu uku kuyaya pamwi na Leza. Nomba asi vino cali. Lino papisile imyaka, Yesu Klistu walanzile ukuti kusi umwi uwasenzilwepo kwi yulu mpaka sile lino insita yakwe yafisile. (Yoane 3:13) Fwandi lino tukawelenga ukuti iceleta “lisenda Eliya umwiyulu muli nkungulupya,” tulinzile ukuzya tuti: Lyali iyulu ci? (2 Yamwene 2:11) Baibo isiomvya sile “umwiyulu” ku kulangilila icifulo cino Yeova akaikalamo lelo ikaliomvya nu kulondolola umu lwelele umukaya ama kumbi nupya muno ivyuni vikapapuka. (Masamu 147:8) Fwandi umwiyulu kwene muu ali muno Eliya wasenzile. Nomba i vyani ivyacitike lyene?

Yeova wasenzile sile kasema wii ukuya mu kuomba mulimo uze, insita ii wali nu kutandika ukuomba mupipi nu wene wa Yayuda. Ilyasi lya muli Baibo likalangilila ukuti pa cisila, Eliya watwalilile ukuombela kuuku limwi pa myaka ukucila pali 7. Pa nsita iya uwateekanga Yuda wali umwene umwiipe Yeolamu. Watwazile umwana wakwe Aabu na Yezebele, fwandi ivipe vino yacitanga vyatwalilile. Yeova wanenyile Eliya ukulemba kalata pa upinguzi wakwe Yeolamu. Wakwe vino casoowilwe, Yeolamu wafwile imfwa iipisye. Ni cipiisyeko i cakuti Baibo ikalondola ukuti: “Lino wafwile kutali umuntu nanti wenga uwakumuvwila ulanda.”—2 Milandu 21:12-20.

Paali upusano sana pa monsi wii umwiipe na Eliya! Tutamanya vino Eliya wafwile alino na insita ino wafwile. Nomba twamanya sile ukuti atafwile wakwe vino Yeolamu wafwile, ukwaula nanti amwi uwa kumuvwila ulanda. Elisya wamulusile sana. Na ya kasema yauze acumi nayo kwene yamuluusile. Nupya Yeova umwineco watwalilile ukwiusya Eliya mupipi ni myaka 1,000 pa cisila, pano waomvizye kasema wii wino watemilwe sana mu cilolwa icalolike lino Yesu wali na alondezi yakwe. (Mateo 17:1-9) Uzye mukulonda ukusambilila kuli Eliya nu kutwalilila ukuya nu utailo ukome ungamwazwa ukuzizimizya lino muli ntazi? Mutailila ukukomya ucuza winu na antu atemwa Leza, ukwika amano ku kuombela Yeova alino nu kupepa ukufuma pansi ya mwenzo. Si namwe kwene mwaleka Yeova amutemwa!