Baibo ikalangilila ukuti Satana Ciwa u muntu wa cumi cumi, uwaya wa mwanisi uwa maka, aakasininkizya ukuti ukulonda kwakwe konsi kwafikiliziwa ukupitila umu vinjelengwe vya ufi nu ‘usomvi.’ Nupya Baibo ikati “akaezya kuomvya usomvi kuti aloleke wa mungeli wa luswepo.” (2 Tesalonika 2:9, 10; 2 Kolinto 11:14) Tungiluka ukuti Ciwa akuno waya nga twalola iviipe vino akacita.

 Nomba Ciwa asi aliwe akalenga ukucula konsi. U mulandu ci uno twalandila vivyo? Leza wapanzile antu na maka yakuisoolwela ivya kucita, iviipe nanti visuma. (Yoswa 24:15) Nga twakana ukusoolola ningo ivyakucita tukailetela intazi sweineco.—Galatiya 6:7, 8.