Yesu wafwile pakuti maifyo ya yantu yangelelwa nu kuya nu umi wa pe. (Loma 6:23; Efeso 1:7) Ifwa yakwe Yesu yalangilile nu kuti umuntu angaya uwa cisinka kuli Leza nanti icakuti weziwa sana.—Ayebulai 4:15.

 Uvwini vino imfwa ya muntu wenga yalenga ivintu ivingi ukucitika.

1.   Yesu wafwile pakuti “maifyo itu yelelwe.”—Kolose 1:14.

    Umuntu wa kutandikilapo Adamu wali umu malilike lino waumvilwe, atakweti iifyo ilili lyonsi. Nomba wasolwilepo ukukanauvwila Leza. Vino Adamu wacisile nanti iifyo lyakwe Adamu lyalenzile ana yakwe yonsi ukuya yakaifya. Baibo ikati: “Antu aingi yaya akaifya pa mulandu wa kuntayela Leza kwa muntu wenga.”—Loma 5:19.

    Yesu nawe wali umu malilike, nomba wene atatazile aifyepo. Fwandi wali nu kuya “mpolelwa yapa maifyo itu.” (1 Yoane 2:2) Wakwe vivi kwene vino iifyo lyakwe Adamu lyalenzile antu yonsi ukuya ya kaifya, avino ni mfwa yakwe Yesu yasisya maifyo pa antu yonsi aya ni cisinka.

    Cali kwati Adamu wakazizye antu uku luyembu. Yesu pa kuipeelesya kwakwe ukuti atufwile wakazile antu ukuya antu yakwe. Na ci calenga ukuti “ndi umwi wifya, tukweti kaazwa akatuvwangila kuli Tata, ali Yesu Klistu umololoke.”—1 Yoane 2:1.

2.   Yesu wafwile “kuti wensi wino wataila munoli atakalowe, lelo aye nu umi wa pe.”—Yoane 3:16.

    Nanti icakuti Adamu waumvilwe ukuti aikala amanda pe, iifyo lyakwe lyalenzile ukuti afwe. Pa mulandu wakwe Adamu “Iifyo lingile muno nsi . . . nga ni iifyo lyakwe ilyaleta imfwa. Caleka, imfwa nayo yasalangine mu antu yonsi pano antu yonsi iifizye.”—Loma 5:12.

    Nomba imfwa yakwe Yesu yene itasisyapo sile iifyo lelo yalenga nu ukuti antu yonsi aya ni cisinka yaye nu umi wa pe. Baibo ikalondolola ukuti: “Caleka ndi vino iifyo lyateekanga kupitila mu mfwa, avino ni cikuku cakwe Leza kwene cikayateeka kupitila mu kuyacita kuya aololoke pa manso yakwe Leza, nu kuyatungulula ku umi wa pe muli Yesu Klistu, Mwene witu.”—Loma 5:21.

    Kwene antu ndakai yacili yakaya nu umi pa myaka inono sana. Nomba Leza walaya ukuti alapeela umi wa manda pe uku ololoke yonsi nu kutuutulula afwe pakuti nayo kwene yakaipakizye pa mulandu ni mfwa yakwe Yesu.—Masamu 37:29; 1 Kolinto 15:22.

3.   Yesu wayelanga “Leza ukufika nu ku kufwa kwakwe,” na ci calenga tusininkizye ukuti antu yangaya acisinka nanti icakuti yeziwa sana.—Filipi 2:8.

    Nanti icakuti amelenganyo yakwe Adamu nu mwili vyali ivimalilike, wene atuvwilile Leza pano wakumvilwe icintu cino citali cakwe. (Utandiko 2:16, 17; 3:6) Patalengile umulwani mukalamba wakwe Leza kulikuti Satana walanzile ukuti kusi umuntu anguvwila Leza ndi cakuti ivintu visi ningo. (Yobo 2:4) Nomba umuntu umumalilike Yesu uvwilile Leza nu kutwalilila ukuya uwa cisinka kuli aliwe na lino wali sana ni ntazi nu kufwa ifwa iipisye. (Ayebulai 7:26) Vino Yesu wacisile vikalanga ukuti: Umuntu angatwalilila ukuya uwa cisinka kuli Leza asi mulandu ni ntazi zino akupitamo.

Amauzyo pa mfwa yakwe Yesu

•   U mulandu ci uno Yesu waculiile nu kufwa pakuti sile akulule antu? U mulandu ci uno Leza atasisizyepo sile imfwa?

   Isunde lyakwe Leza likalanda ukuti “malipilo yi ifyo, imfwa.” (Loma 6:23) Ukucila ukufisa isunde lyakwe kuli Adamu, Leza wamunenyile ukuti ndi cakuti utanguvwilile ulafwa. (Utandiko 3:3) Lino Adamu wifizye, “Leza wino asitumpoka” wacisile vino walanzile. (Tito 1:2) Adamu atalenzile sile ukuti ana yakwe yaye ya kaifya lelo walenzile nu kuti nayo yafwa.

   Nanti icakuti antu yalinzile ukufwa, Leza wayalanga vino waya ni “cikuku civule.” (Efeso 1:8) Vino watumile Yesu ukwiza tufwila wa mpolelwa imalilike nu kutukukulula ukumfwa cikalangilila ukuti waya nu mulinganya alino nupya wakwatisya uluse.

•   A lilaci lino Yesu wafwile?

   Yesu wafwile pa 3 koloko wa kasanya lino Ukuzevya Kwa Ucilo ukwa Ayuda kwatandikanga. (Mako 15:33-37) Uwanda uwo walingana nu wanda wa pali Cisano pa Epulelo 1, 33 C.E., ukulingana na makalenda ya ndakai.

•   Aukwi kuno Yesu wafwilile?

   Yesu wakomilwe “ku cifulo camwangwa ukuti, Pa Cifulo ci Panga. (Mu Ciyebulai cikaamwa ukuti, Gologota).” (Yoane 19:17, 18) Icifulo cii cayelile “kunzi ya musumba” wa Yelusalemu lino Yesu wafwanga. (Ayebulai 13:12) Cifwile cayelile pa kamwamba pano Baibo ikati yamwi yaweni kuno Yesu akukomwa ala yali “akatalamukila.” (Mako 15:40) Nomba pano Gologota wayela ndakai patamanyikwa ningo ningo.

•   Uzye Yesu wafwile uli?

   Nanti icakuti antu aingi yazumila ukuti Yesu yamutanike pa musalawa, Baibo ikati: “Klistu umwisikulu wasenzile cisendo ca maifyo itu mu mwili wakwe pa cimuti.” (1 Petulo 2:24, King James Version) Ya kalemba yakwe Baibo yaomvizye mazwi yaili ukulozya uku cintu cino yaomvizye ukukomelapo Yesu, kuli kuti stau·rosʹ na xyʹlon. Asambilila aingi yasondwelela ukuti amazwi yaa yakalozya uku cimuti icoloke icapangilwa ni mbao.

•   Uzye tulinzile ukucita uli pa kwiusya ifwa yakwe Yesu?

   Pa wanda wa Kuzyevya Ucilo ukwa cila mwaka ukwa Ayuda usiku, Yesu watandike ukuzevya kuze ukwanguke ukwa yalondezi nu kuyanena ukuti: “Mwacita cii pa kunjiusya.” (1 Kolinto 11:21-24) Lino papisile sile amaawala anono Yesu wakomilwe.

   Baibo ikakolanya Yesu uku kana ka mfwele akapeelwanga wa mpolelwa pa kuzevya Ucilo. (1 Kolinto 5:7) Wakwe vivi kwene vino kuzevya kwa Ucilo kwiusyanga aina Izlaeli ukuti yakulwilwe ukufuma umu uzya, avino Iciusyo ca mfwa yakwe Yesu Klistu cikaiusya Aina Klistu ukuti yakululwa ukwi ifyo ni imfwa. Yazevyanga Ucilo pa wanda wa Nisani 14 ukulingana na kalenda wino yaomvyanga pa kumanya pano umwezi wafika nupya yazevyanga cila mwaka, na Ina Klistu ya kutandikilako kwene yazevyanga Iciusyo umuku onga cila mwaka.

   Cila mwaka pa wanda uno Nisani 14 ikakumanila antu imintapendwa yakaiusya imfwa yakwe Yesu umu nsi yonsi.