Ee pano Leza akalonda ukuti antu yakolongana umu kupepa. Baibo ikati: “Lekini twasakamalana pakuti twacincizyanya umu kutemwa nu mu kuomba imilimo isuma, tutaatazyela ukulongana kwitu.”—Aebele 10:24, 25.

 Yesu walangilile ukuti alondezi yakwe yali nu kupanga iumba ilipekanyiziwe ningo lino wayanenyile ati: “Nga mukutemwana, alino yonsi yalamanya ukuti mwemwe yasambi yane.” (Yoani 13:35) Inzila yonga icindame ino asambi yakwe Klistu yali nu kulangilamo ukutemwa kuu, u kupitila umu kuya pamwi na ya kapepa yauze. Yali nu kuya umu vilongano ivipekanyiziwe ningo ivyakomaananga lyonsi umu kupepa. (1 Kolinto 16:19) Yonsi pamwi, yali nu kupanga ulupwa lwa ina umu nsi yonsi.—1 Petulo 2:17.

Kwaya ivingi ivikalondekwa ukucila sile ukuya umu upefi

 Nanti icakuti Baibo ikalanda ukuti antu yalinzile ukukolongana uku kupepa Leza, isisambilizya ukuti umuntu angazanzya Leza pa mulandu sile uwa kuya umu upefi umwi. Pakuti umuntu atemwikwe kuli Leza, upefi wakwe ulinzile ukuuvwana na vino akacita cila wanda. Baibo ikati: “Upefi usanguluke nupya utakowela kuli Leza witu nupya Tata, aewu: ukusakamala ya mukamfwilwa na ana ya nsiwa lino yakucula, nu kukanaikowezya uku vya mu nsi.”—Yakobo 1:27.