Izwi lyakuti “iyulu” likaomviwa umu nzila zitatu muli Baibo: (1) ukwi yulu kwene lino tukalola; (2) uku cifulo kuno kukaikala iviumbwa vya mupasi; na (3) ku kulangilila icifulo ca papelapela nanti ica lulumbi. Umu vintu vii vitatu ivyeo ivikulandwapo vikatwazwa ukuvwikisya ningo ningo. a

1.   Mayulu yano tukalola. Fwandi tungati “iyulu” likaimililako cifulo ca papela, kuno umuza ukafumilila, kuno ivyunyi vikapapukila, nanti u kukafuma makumbi aakaleta imvula, nanti kuno tukalola inkuwa ikumyansizya. (Masamu 78:26; Mapinda 30:19; Ezaya 55:10; Luka 17:24) Nupya izwi kwene lii lingasenula ni ncende kuno “kasanya nu mwezi ni ntanda vikafumilila.”—Malango 4:19; Utandiko 1:1.

2.   Ukukaikala viumbwa vya mupasi. Izwi ilyakuti “iyulu” lingalozya nu ku cifulo ca papelapela, icaluta pa mayulu yano tukalola, ukukaikala viumbwa vya mupasi. (1 Yamwene 8:27; Yoane 6:38) Mu mayulu yaa mukaikala Yeova Leza, wino waya u “Mupasi” na angeli ya mupasi yano waumvile. (Yoane 4:24; Mateo 24:36) Insita zimwi nga yati “mayulu” ale yakulanda a angeli ya cumi, “ukongano wakwe yayo amuzilo.”—Masamu 89:5-7.

    Baibo nupya ikaomvya izwi lyakuti “iyulu” mu kulungatika ndi cakuti ikulanda pa cifulo ca mupasi kuno Yeova akaikala, cifulo cakwakwe. (1 Yamwene 8:43, 49; Ayebulai 9:24; Umbwilo 13:6) Wakwe, lino Baibo ikalanda pali Satana ni viwa vyakwe ukuti yali nu kuzingwa kufuma ukwi yulu, ikalanda ukuti yatali nu kuzumiliziwa kulalolekela ku cinso cakwe Yeova. Lelo yali nu kutwalilila ukuya viumbwa vya mupasi.—Umbwilo 12:7-9, 12.

3.   Likaimililako cifulo ca papelapela. Malembelo yakaomvya izwi lyakuti “iyulu” kwimililako icifulo capapela, sana sana kulozya ku utunguluzi. Mu cifulo ca musango uwo mungaya:

   •   Yeova Leza kwene Kateeka wa maka yonsi.—2 Milandu 32:20; Luka 15:21.

   •   Uwene wakwe Leza, uuteeko ulapyana mauteeko ya untunze. Baibo ikalanda pa Wene uwo ukuti “iyulu lipya.”—Ezaya 65:17; 66:22; 2 Petulo 3:13. b

   •   Aina Klistu yamwi aaya pano nsi, akwata upalilo wa kuya ukwi yulu.—Efeso 2:6.

   •   Miteekele ya antunze akaikuzya ukuluta antu yano ikateeka.—Ezaya 14:12-14; Danieli 4:20-22; 2 Petulo 3:7.

   •   Mipasi ya nkota iikatungulula insi.—Efeso 6:12; 1 Yoane 5:19.

Uzye iyulu lyaya uli?

 Kwaya iumba lya viumbwa vya mupasi ivingi. Umwi yulu mwazula mintapendwa ya viumbwa vya mupasi ‘vikafikilizya masunde yakwe Yeova.’—Masamu 103:20, 21; Danieli 7:10

 Baibo ikalanda ukuti iyulu lyakwata uluswepo luno kusi nanti aumwi angapalamako. (1 Timoti 6:15, 16) Kasema Ezekelo waweni cilolwa ca kwi yulu muno waweni “luswepo” luyengese, lyene mu cilolwa ca kwi yulu cino Danieli waweni mwali “uluzi lwa moto.” (Ezekelo 1:26-28; Danieli 7:9, 10) Iyulu i lya muzilo nupya i lisuma cuze.—Masamu 96:6; Ezaya 63:15; Umbwilo 4:2, 3.

 Vino Baibo ikatulondolwela api yulu vyaya i vya kuzungusya. (Ezekelo 43:2, 3) Fwandi, swe yantunze tutanga tumanye ningo ningo vino iyulu lyaya pa mulandu wakuti amano itu yapeleela.