Uzye Leza Akuno Waya?
Vino Baibo yalandapo
Ee, Baibo ikapeela usininkizyo wakuti Leza akuno waya. Ikatukomelezya ukukomya utailo muli Leza, asi kuzumila sile vino amu mipepele yakalanda, lelo tulinzile ukuomvya maka ya kwelenganya nu kwiluka. (Loma 12:1; 1 Yoani 5:20) Lolini vino Baibo ikasambilizya:
Vino ivintu vyatantikwa ningo umu uumbo umwaya ivya umi cikalangilila ukuti kwaya Kaumba. Baibo ikalanda ukuti: “Endi, cila ng’anda ikakuulwa nu muntu umwi, nga Leza aliwe uwakuula vintu vyonsi.” (Ayebulai 3:4) Nanti icakuti mazwi yaa yakaloleka ukuya angupale, antu aingi asambilila sana yazana ukuti aamaka. a
Swe yantu tukalondesya ukumanya upiliulo nu mulandu uno kwayela umi, pano ali nzala ikasyala ndi cakuti twakwata vino tukalondekwa mu umi. Cii caya pali vino Baibo ikalanda ukuti, ‘ukulondesya vyakwe Leza,’ umwaya nu kulondesya ukumanya Leza nu kumupepa. (Mateo 5:3, NWT; Umbwilo 4:11) Ukulondesya vyakwe Leza kusilangilila sile ukuti Leza akuno waya, lelo kukalangilila nu kuti a Kaumba uwaya nu kutemwa aakalonda kuti tukwate ivintu vivyo.—Mateo 4:4.
Masesemo aingi aya muli Baibo yalemvilwe ala kucili imyaka iingi sana nupya iizile iyafikiliziwa viivi kwene vino yasesimwe. Vino masesemo yayo yali acumi na vino yafikiliziwe vikalangilila ningo ukuti yafumile kuli Leza.—2 Petulo 1:21.
Aalemvile Baibo yamanyile sana vyakwe sayansi ukucila pali vino antu yauze aaliko pa nsita kwene iya yamanyile. Mpiti antu yazumiile ukuti insi ikala pa nyama, wakwe pa nzovu, pali kapoli wa kalume nanti pali masaaye. Lelo Baibo ikalanda ukuti Leza “waning’inya impanga umu lwelele.” (Yobo 26:7) Nupya Baibo ikalondolola ningo kuti insi “yaulungana.” (Ezaya 40:22, NWT) Antu aingi yakalola ukuti icalenzile ukuti ya kalemba yakwe Baibo yamanye ningo ivintu vii a pa mulandu wa kuti yapokelile ivyeo kufuma kuli Leza.
Baibo ikaasuka mauzyo aingi akome, aakuti ndi cakuti yataswikwe ningo yangalenga umwi alande ukuti kutaya Leza. Yamwi yanguzya ukuti: “Ndi cakuti Leza waya nu kutemwa nupya wakwatisya maka, u mulandu ci uno umu nsi mwayela ukucula ni viipe? U mulandu ci uno ilingi imipepele iliyo ikacita ivipe ukucila ukucita ivisuma?—Tito 1:16.
a Allan Sandage uwasambilila pa vintu ivyaya umwi yulu, walanzile ukulozya uku uumbo ati: “Nazana ukuti citanga cicitike ukuti ivintu ivyatantikwa ningo ndi vivyo viyeko sile pa mulandu ni cimvulunganya. Kufwile kuli cimwi icalenzile vitantikwe ningo. Ntanga ndondolole ningo Leza, lelo ivintu ivyayako i vikalanga ukuti kwaya kaumba.”
Limwi Mungatemwa Ukulolako na Vii
LUPUNGU LWA MULINZI
A Weni Uwapanzile Leza?
Uzye ukwelenganya ukuti Leza akuno waya lyonsi kukavulunganya?
ABOUT US
Leengini Ukuti ya Nte Yakwe Yeova Yakamutandalile
Mukalanzyanye ivya muli Baibo na ya Nte Yakwe Yeova, nanti mukeezyeko ukusambilila Baibo ukuomvya inzila ino twatantika.