Nanti icakuti Baibo italandapo sana pa kusitika, tungiluka ukuomvya ivisinte vya muli Baibo ivikalanga ukuti Leza akalola ivyangalo vya kusitika ukuti uluyembu.—Efeso 5:17. a

•   Icikalenga antu ukusitika apa mulandu wa lwiswa, luno Leza wapata. (1 Kolinto 6:9, 10; Efeso 5:3, 5) Akasitika yakalonda ukukwata impiya ndi cakuti yamwi yavilwa ukucimvya, nomba Baibo yalesya ukupokolola iviya vya yantu yauze.—Kufuma 20:17; Loma 7:7; 13:9, 10.

•   Ukusitika nanti sile akalupiya kanono kungalenga umuntu ukutandika ukutemwisya impiya.—1 Timoti 6:9, 10.

•   Aakasitika yakataila imipasi nanti api syuko. Nomba, Leza akalola ivintu viyo ukuti ukupepa utuluwi, ivyapusana nu kupepa kuno akalonda twapepa.—Ezaya 65:11.

•   Ukucila ukutungilila icintu icingalenga umwi ukukwata ivintu vino ataombile, Baibo ikakomelezya ukuombesya. (Kasambilizya 2:24; Efeso 4:28) Yayo yonsi akalondela vino Baibo ikatunena yakalya “ivyakulya vino yakaiombela aeneco.”—2 Tesalonika 3:10, 12, NWT.

•   Ukusitika kungalenga tukwate imiyele yakulondesya ukucimvyanya, ino Baibo yalesya.—Galatiya 5:26.