Ukuya uwa muzilo kukapiliula ukukanaya ni vikwi nanti ukuya uwa usaka. Izwi lya Ciyebulai ilyasenulwa ukuti “muzilo” lyafuma kwi zwi ilikapiliula “ukupaatulwa.” Fwandi icintu ca muzilo ala i cipaatulwe ku vintu ivikaomviwa lyonsi, nanti ala i cicindame sana, ali kuti icausaka nupya iciswepe.

 Leza ali wa muzilo sana kucila yonsi. Baibo ikati: ‘Kutaya nanti aumwi uwa muzilo wakwe Yeova.’ a (1 Samueli 2:2) Nomba nanti ciye vivyo, Leza wikako amasunde ya vintu vya muzilo.

 Izwi lyakuti “umuzilo” lingalozya ku ciliconsi icalemenkana nu kupepa Leza, sana sana ivintu ivyapatulwa ukuti vyaomviwa sile pa kupepa. Baibo ikalanda pa:

•   Vifulo vya muzilo: Leza wanenyile Mose lino wali mupipi ni cimpuza icapyanga ukuti: “Cifulo cino uwimililepo icamuzilo.”—Kufuma 3:2-5.

•   Kupepa kwa muzilo: Aina Izlaeli yapepelanga Yeova pa maukongano yano yamanga ukuti maukongano ya muzilo.—Aina Levi 23:37.

•   Viya vya muzilo: Iviya ivyaomviwanga pa kupepa Leza mu ng’anda iya kupepelamo mu Yelusalemu yavyamanga yakuti “viya vyamuzilo.” (1 Yamwene 8:4) Iviya vivyo vyali nu kucindikwa sana, nanti icakuti yataali nu kulavipepa. b

 Ee. Leza wanena Aina Klistu ukuti: “Muye amuzilo pano nene wamuzilo.” (1 Petulo 1:16) Ukuya kwene, antu aatamalilika yatanga yaye amuzilo wakwe Leza. Nomba nanti ciye vivyo, antunze aakauvwila amasunde yakwe Leza aololoke yakalolwa ukuti ‘yaipelesya mu kuombela Leza nu kumuzanzya.’ (Loma 12:1) Umuntu akalondesya ukuya uwa muzilo akalolekela muli vino akalanda nu kucita. Wene akalondela kupanda amano ukwa muli Baibo ukwakuti, “muye amuzilo nupya antungwa cuze kufuma ku ulongozyo” alino nu kuleka “vicitwa vinu vyonsi viye vyamuzilo.”—1 Tesalonika 4:3; 1 Petulo 1:15.

 Ee. Ndi cakuti umwi wata ukulondela amasunde yakwe Leza, Leza akata ukumulola ukuti uwa muzilo. Ibuku lya muli Baibo ilya Ayebulai likalanda pa “ina ya muzilo” nomba likayacelula ukuti yalinzile ukucenjela kuti umwi uwa munoyali “ataya nu mwenzo uwiipe uwa kuntataila, nu kufutatila Leza uwa umi.”—Ayebulai 3:1, 12.

 Ivya ufi: Ukukanatwala nanti ukukanatwalwa kukalenga umwi ukuya wa muzilo.

 Icisinka: Nanti icakuti Umwina Klistu angasoololapo ukukanatwala nanti ukukanatwalwa, cico citanga cilenge aye uwa muzilo kuli Leza. Ica cumi ukuti yayo akatwalilila ukuya asimbe yasikwata ivya kuyapunvyanya lino yakuombela Leza. (1 Kolinto 7:32-34) Nomba nanti ciye vivyo, Baibo ikalanda ukuti na yayo kwene aakuti yatwala nanti ukutwalwa yangaya amuzilo. Nupya na wenga pa yatumwa yakwe Yesu alikuti Petulo, watwazile.—Mateo 8:14; 1 Kolinto 9:5.