Ukwelela cikapiliula ukwililako kuli vino umwi watatuluvyanya. Muli Baibo izwi ilyasenulwa ukuti “ukwelela” likapiliula ukuti “ukwililako sile” wakwe vivi vino umuntu akata ukupinda inkongole. Yesu walanzile pali vivyo lino wasambilizyanga alondezi yakwe ivya kupepa, watiile: “Utwelele maifyo itu, vino naswe tukaelela onsi yano akatwifya.” (Luka 11:4) Vivyo kwene avino wasambilizye nu mu mulumbe wa muomvi wino atakweti uluse, Yesu walinganyizye ukwelela uku nkongole.—Mateo 18:23-35.

 Tukaelela yauze ndi cakuti twililako kuli vino yatuluvyanya nu kuta ukulandapo pakuti tutaiusya pali vino yatuluvyanyizye. Baibo ikatusambilizya ukuti ukutemwa ukutayamo ukaitemwe kwemelela pa kwelela kwa cumi, pano ukutemwa “kusyasunga viipe vino yauze yakacita.”—1 Kolinto 13:4, 5.

Vino ukwelela kusipiliula

•   Kuzumilizya iviipe. Baibo ikanenola yaya aakati iviipe vitakwata uwavya nanti vyazumiliziwa.—Ezaya 5:20.

•   Ukuleka icaloleka kwati pasi iciipe icili consi icacitike. Leza welezile Umwene Davidi pa maifyo aipe yano wacisile, nomba atamukulwile kuli vino vyali nu kumucitikila pa mulandu na vino waluvyanyizye. Leza walesile nu kuti maifyo yakwe Davidi yalembwe pakuti yaiusiwa na ndakai kwene.—2 Samueli 12:9-13.

•   Ukuleka yauze ukukwingilila. Tuti limwi wazimisya umwi impiya, nomba onona impiya zizyo lyene asikulonda nu kuwezya ukulingana na vino walavile. Uvwa sana uyi nupya walenga uwelelo. Mungamwelela ndi cakuti mutamusokiile, ukukanamwiusya pali vivyo lyonsi, nanti limwi ukufuta inkongole zyonsi. Nomba limwi mungasoololapo ukukanamwazimisya impiya nupya.—Masamu 37:21; Mapinda 14:15; 22:3; Galatiya 6:7.

•   Ukwelela ukwaula ukwemelela pali ponsi. Leza asielela antu akacita maifyo uku mufulo sile nupya aipisye, aakakana nu kuzumila vino iyaluvyanya, ukusenuka nanti ukulenga uwelelo kuli wino iyaluvyanya. (Mapinda 28:13; Milimo 26:20; Ayebulai 10:26) Antu aasilapila yakaya alwani kuli Leza, nupya asilonda nu kuti twaelela antu yano wene atelezile.—Masamu 139:21, 22.

   Nga ndi cakuti mwemwe umwi waluvyanyizye uwatakana ukulenga uwelelo nanti ukuzumila vino wacisile, mungacita uli? Baibo ikatunena ukuti: “Utacita cipyu utaleka cikupenye!” (Masamu 37:8) Tutalinzile ukuzumilizya iviipe vino umwi watacita, nomba tulinzile ukukana ukusoka pa muntu wiyo. Mwataila Leza ukuti alapingula umuntu wiyo. (Ayebulai 10:30, 31) Nupya mungateekeziwa ukumanya ukuti Leza alaleka insita ukufika lino tutalaumvwa uyi nanti ukuwaikwa vino vikatucitila ndakai.—Ezaya 65:17; Umbwilo 21:4.

•   “Mwaelela” kali konsi kanono kano mwalola umwi wacita. Insita zimwi, ukucila ukwelela umwi uwataluvyanya, limwi tungazumila ukuti tutakweti umulandu uli onsi uwakusokelapo. Baibo ikati: “Mutasoka zuwa, pano ukukwata kaikila uwelewele.”—Kasambilizya 7:9.

Vyakucita pa kwelela umwi

1.   Mwaiusya ivyaya umu kwelela. Musikuzumilizya ukuti vino umwi watacita vili sile ningo nanti ukuleka ciloleke kwati pasi iciipe icati cicitika, lelo mukulonda sile ukwililako nu kuta ukwelenganyapo.

2.   Mwailuka ivisuma ivyaya umu kwelela. Ukukanasoka nanti ukukanapata umuntu uwatatuluvyanya kungatwazwa ukuteeka umwenzo, ukuzifya umi witu nu kuya sana ni nsansa. (Mapinda 14:30; Mateo 5:9) Ni cicindamisye i cakuti, ukwelela yauze ali cintu cino cingalenga Leza ukwelela maifyo itu.—Mateo 6:14, 15.

3.   Mwaya nu luse. Swensi kwene tukaluvyanya. (Yakobo 3:2) Wakwe vivi kwene vino tukauvwa ningo ndi cakuti twelelwa, tulinzile ukwelela yauze pali vino iyaluvyanya.—Mateo 7:12.

4.   Mwalangulukilako. Ndi cakuti itukwata vimwi ivyakuilizyanyapo, tungalondela vino Baibo ikatusunda ukuti: “Mwatekelana.”—Kolose 3:13.

5.   Mwaombelapo zuwa. Mwaelela zuwa sana ukucila ukuleka ukusoka ukutwalilila.—Efeso 4:26, 27.