Mazwi yakuti “Yelusalemu Mupya” aakazanwa sile imiku iili muli Baibo, u musumba wa mampalanya ukaimililako alondezi yakwe Yesu alaya mu kuteeka nawe mu Wene Wakwe Leza. (Umbwilo 3:12; 21:2) Baibo ikalangilila ukuti iumba lii likaamwa ukuti nawinga wakwe Klistu.

1.   Yelusalemu Mupya waya mwi yulu. Lyonsi lino Baibo yalanda pali Yelusalemu Mupya, ikalanda ukuti ala akufuma mwi yulu, muno angeli yakalinda impongolo. (Umbwilo 3:12; 21:2, 10, 12) Alino nupya ukulu wa musumba kwene uu ukalangilila sile ukuti utanga uyele pano nsi. Mu utali waya “amakilomita mazimbi yaili ni myanda ini (2,400),” ukuzinguluka. a (Umbwilo 21:16; King James Version) Mu mbali wali mupipi na makilomita 560, ukuya umupela.

2.   Yelusalemu Mupya wapangwa ni umba lya yalondezi yakwe Yesu, alikuti nawinga wakwe Klistu. Yelusalemu mupya akaamwa ukuti “nawinga, muci wa Mwana wa Mfwele.” (Umbwilo 21:9, 10) Mu ulondolozi uu uwa unkolanya, umwana wa mfwele akalozya kuli Yesu Klistu. (Yoane 1:29; Umbwilo 5:12) “Umuci wa Mwana wa Mfwele, akaimililako Aina Klistu alaya pamwi na Yesu kwi yulu. Baibo ikakolanya ucuza uwaya pali Yesu na Aina Klistu yayo ukuti wakolana nu waya pali iya nu muci. (2 Kolinto 11:2; Efeso 5:23-25) Nupya amawe yano yaomvizye pa kukuula umufula wakwe Yelusalemu Mupya yalemvilwepo “mazina ya atumwa ikumi na yaili a Mwana wa Mfwele.” (Umbwilo 21:14) Vyonsi vii vikatwazwa ukumanya ningo vino Yelusalemu Mupya waya, pano Aina Klistu akwata upaalilo wa kuya kwiyulu yakolana ni ”cikulwa cino mufula wakweco aatumwa na yakasema.”—Efeso 2:20.

3.   Yelusalemu Mupya waya mu uteeko. Yelusalemu wa mpiti wali umusumba ukalamba wa ina Izlaeli, incende ino Mwene Davidi, umwanakwe Solomoni alino na ana yao ateekanga mu ‘wene uno Yeova wateinye.’ (1 Milandu 29:23) Yelusalemu akaamwa ukuti “musumba wamuzilo,” ukaimilila uteeko wakwe Leza uwa mu lupwa lwakwe Davidi. (Neemiya 11:1) Nupya Yelusalemu Mupya akaamwa ukuti “musumba wamuzilo,” uwapangwa na yayo alaya na Yesu kwi yulu yano “yalateeka pano nsi.”—Umbwilo 5:9, 10; 21:2.

4.   Yelusalemu Mupya alaleta amaapalo ku yantu aya pano nsi. Yelusalemu Mupya walondololwa ukuti “akwika kufuma mwiyulu kuli Leza,” ukulangilila ukuti Leza akauomvya ku vintu ivitaya mwi yulu. (Umbwilo 21:2) Ulondolozi uu walemenkanya Yelusalemu Mupya nu Wene Wakwe Leza, uno Leza akaomvya ku kufikilizya ukulonda kwakwe ‘pano nsi wakwe vino kwi yulu kwaya.’ (Mateo 6:10) Umulandu uno Leza wapangile antu pano nsi wayamo na mapaalo yaa:

   •   Ukufumyapo uluyembu. “Luzi lwa manzi yano akapeela umi,” aakafuma muli Yelusalemu Mupya lukatwala amanzi ku ‘miti ikapeela umi ikapozya antu amu nko zyonsi.’ (Umbwilo 22:1, 2) Ukulwazya kuu ukwa ku mwili alino na muli vyakwe Leza, kulafumyapo uluyembu nupya kulalenga antu yaye nu umi umalilike, wakwe viivi kwene vino Leza walondanga ukuti ciye pa kutandika.—Loma 8:21.

   •   Ucuza usuma pali Leza na antu. Uluyembu lwatalusya antunze kuli Leza. (Ezaya 59:2) Ukufumiziwapo kwa luyembu kulalenga usoowelo uu ufikiliziwe uwakuti: “Uwikalo wakwe Leza uli pamwi na antu! Wene amaikalanga nao nupya yene yalaya antu yakwe. Leza umwisikulu alaya nao nupya wene alaya ali Leza wao.”—Umbwilo 21:3.

   •   Ukufumiziwapo kwa ucuzi ni mfwa. Leza alaomvya Uwene wakwe kukumbula “minsozi yonsi. Kutalaya imfwa nupya. Kutalaya kulosya nanti kulila, nanti kuvwa kuwaika.”—Umbwilo 21:4.