Uzye Ukwelenganyapo Uli?

•   Uzye caipa ukuzya kuli yano yakasowela ivilacitika uku nkolelo, kuzya ku yafwe nanti kuli yano yakacita ivyamalele?

•   Uzye malyasi aakalanda pa vya mipasi aakwelenganya sile, nanti u kulwisyanya sile ni cisuma ni cipe nanti uzye a malyasi ya cumi angatuletela ni ntazi

 Cipande cii cimalanda umulandu uno kutaila imipasi kungaloleka kwati kwaya sile ningo alino nu mulandu uno ufwile kucenjela sana ku vya mipasi.

•  I vyani ivikalenga caloleka kwati vya mipasi vyaya sile ningo?

•  U mulandu ci uno ufwile kucenjela ku vya mipasi?

•  Vino ungacita

•  Vino auzo yakalanda

 Aakapanga vyakuizanzya yatemwa sana ukulanda pa vya mipasi, yakaviika mu mafyumu, kuvitambisya pa ma TV, pa vyangalo vya pa kompyuta, alino nu mu mabuku. Lyene icacitika i cakuti acance aingi yatandika ukutemwa sana vintu vya mipasi ivili wa vinjelengwe, viwa, vipuukupuuku nu ulozi. I vyani vyalenga? Muli vino vyalenga mwaya na vii:

•   Kulondesya kumanya: Kumanya ndi cakuti angeli ni viwa akuno vyaya

•   Kusakamala: Kwezya ukumanya ivilacitika ku nkolelo

•   Kuvwana: Kwezya kulanzyanya na ya cuza aakuti yaafwa

 Ivintu vivyo vitanga viye iviipe. Wakwe, swensi kwene tukasakamala pali vino vilacitika uku nkolelo nanti ukuluuka ya cuza itu aafwa. Lelo kwaya intazi zino ulinzile kucenjelako.

 Muli Baibo mwaya kucelula kwa maka ukukalanda pa kukana uvwana ni vya mipasi. Kucelula kumwi kwa muli Baibo kukati:

 ‘Mutakezye kuleka umwi uwa munomuli. . .azanwe akusapola nanti ukucita vya uncimya nanti vya ulozi, nanti vya malele, nupya mutaleka yauzya ku mipasi nanti ku antu afwe. Yeova wapata umuntu ali wensi wino akacita vintu vii vyawinyi.’—Malango 18:10-12.

 U mulandu ci uno Baibo yakanyiizya sana kutaila mipasi?

•   Kutaila mipasi kukatungilila kuvwana ni viwa. Baibo ikasambilizya ukuti angeli yamwi yapondokiile Leza nupya iizile iyaya alwani yakwe Leza. (Utandiko 6:2; Yuda 6) Angeli yaa aipe aakaamwa ukuti iviwa, yakaponzya antu kupitila mu kuzya ku yantu aakauvwana ni mipasi, aakasowela ivilacitika ku nkolelo alino na yano yakacita vya malele ni vinjelengwe. Kucita vintu vivyo kungalenga tuye alwani yakwe Leza.

•   Kutaila imipasi kukatungilila cizumilo ca ufi icakuti antu yamwi yangasowela ivilacitika ku nkolelo. Lelo, Leza sile aliwe angalanda ukuti: “Ukutandikila sile na pa mpiti nemo nkavwanga calimwi ivili nu kucitika. Nkalanda ukuti vino nkapanga ukucita ala vilacitika.”—Ezaya 46:10; Yakobo 4:13, 14.

•   Kutaila imipasi kukatungilila cizumilo ca ufi cakuti afwe yangalanzyanya na apuma. Nomba, Baibo ikati: ‘Afwe yatamanya nanti acimwi . . . Pano kuzimo [kwi lindi] kutaya vicitwa nupya kutaya amano.’—Kasambilizya 9:5, 10.

 Fwandi milandu kwene iiyo, iyalenga ukuti ya Nte Yakwe Yeova yatataila imipasi. Nupya yakataluka nu ku vyakuizanya muno mwaya ivili wa kulangizya antu yano yasangula mu malele, vipuukupuuku alino ni vinjelengwe. Mukazyana uwacance u wizina lyakuti Maria walanzile ukuti “Ndi cakuti mu vyakuizanzya muli vya mipasi, nsitamba.” a

•   Twalilila “kuya na kampingu uwakaele” kuli Yeova kupitila mukutaluka ku vicitwa nanti vyakuizanzya umwaya ivya mipasi.—Milimo 24:16.

•   Sumba ivili vyonsi vino wakwata ivikauvwana ni vya mipasi. Welenga Milimo 19:19, 20, nupya ulole vino ungakolanya Aina Klistu yakutandikilako pali vino yacisile kulozya ku vya mipasi.

 Waiusya cisinka cii: Ndi wasenka ku vicitwa ni vyakuizanzya umwaya ivya mipasi ale alino ukulanga ukuti uli ku lusansa lwakwe Yeova. Nupya ukucita vivyo kukazanzya Yeova!—Mapinda 27:11.