Welenga pali vino vyacitiike kuli Karina, nupya uwelenganye ukuti awewe vikucitiikila. Ndi cakuti awewe vyacitikiile ungacita uli?

 Karina walanzile ati: “Nasimuzyanga sana motoka pakuya ku sukulu, lyene kapokola wanjimike nu kumpeela umulandu. Nasosile sana! Nanenyile ya mayo, nayo yalanzile ukuti nalinzile ukunena yatata, nomba ntalondanga ukucita vivyo.”

  I vyani vino ungacita?

1.  A: Kusi kuyanena nanti ukucita ivili vyonsi vingalenga yamanye.

2.  B: Kunena ya tata yako vyonsi ivyacitiike.

 Limwi ungalonda ungasoolola A. Pano limwi ya mayo yako yangelenganya ukuti wanenyile ya tata yako. Kwaya ivintu visuma ivingalenga uzumile vino watuluvyanya, asi mulandu utalondiile masunde ya pa museo nanti watucita vyuze sile.

1.  1. Pano ukuzumila ali cintu campomvu ukucita. Baibo ikalanda pali vino Aina Klistu yafwile ukuya, ikati: ‘Tukalondesya kuya acisinka insita zyonsi.’—Ayebulai 13:18.

    “Nkaezya na maka ukuya ni cisinka nu kuzumila zuwa pali vino naluvyanya.”—Alexis

2.  2. Pano ilingi antu yakatemwa ukwelela aakazumila vino iyaluvyanya. Baibo ikalanda ukuti: “Wiyo akafisa amaifyo yakwe atalaya nu longo foo. Lelo wiyo akailongwela amaifyo nu kuzenzuka, akaelelwa uluse.”—Mapinda 28:13.

    “Cikalondekwa ukusipa pa kuzumila vino watuluvyanya, lelo nga wazumila cikalenga antu ukukutaila. Yakalola ukuti waya ni cisinka. Ndi cakuti wazumila cikalenga vintu ukuya ningo nanti cakuti ivili iviipe.”—Richard

3.  3. Ni cicindamisye i cakuti kucita vivyo kukazanzya Yeova. Baibo ikalanda ukuti: “Yeova wapata umuntu akaifya uku mufulo, lelo aololoke ali yakundwe yakwe.”—Mapinda 3:32.

    “Lino naluvyanyizye, natandike ukwelenganya ukuti mfwile ukusokolola. Yeova atali nu kumpolelela ndi cakuti ntacitanga vino akalonda.”—Rachel

 Uzye Karina wacisile uli pali vino waluvyanyizye? Inkoleelo wafisile ya isi ukuti wapanzile umulandu. Nomba atali nu kufisa mulandu uwo manda yonsi. Walanzile ati: “Pa cisila ca mwaka onga lino yatata yalolanga mu vipepala vyako insyuwalansi, yazanyile icipepala apali izina lyane cino yampeelilepo mulandu wa kusimuzya sana motoka. Calenzile kuti inje mu wavya sana, nanti sile a yamayo yasosile sana pa mulandu wakuti ntacisile vino yanenyile!”

 Vino nasambilileko: Karina walanzile ukuti: “Kufisa umulandu kukalenga kuti ivintu ivipilako. Pano umulandu ukaiza iukatuka pa cisila!”

 Swe yantu swensi tukaluvyanya. (Loma 3:23; 1 Yoane 1:8) Nupya wakwe vino itulola, ukuzumila umulandu lilyo kwene lino waluvyanya cikalangilila ukuti waicefya nupya wewe wikolo muli vyakwe Leza.

 Cuze cino ufwile ukucita u kusambilila kuli vino waluvyanya. Lelo acance yamwi yasisambilila kuli vino yaluvyanya. Limwi yakayuvwa wakwe vino Priscilla uwa myaka 14 wayuvwile pa nsita imwi . Walanzile ukuti: “Nasakamalanga sana ndi cakuti naluvyanya. Nailolanga ukuti nene wasilesile, acino vino naluvyanyanga vyayanga kwati icisendo cinyome sana cino ntange nsende. Nasakamikwanga sana napya nailolanga kwati pasi vino indi.”

 Uzye nawe avino ukayuvwa insita zimwi? Nga avino ukayuvwa uwaiusya ukuti: Ukulaelenganya lyonsi pa viipe vino wacisile ku cisila caya kwati umuntu wino akupisya motoka nomba akulola lili lili uku cisila. Ndi cakuti umaika mano ku vya cisila cilalenga kuti uwayuvwa ukuti wewe wasilesile nupya cilalenga kuti utakwata maka ya kucimvya amavya ya ku nkolelo.

 Fwandi utafwile sile ukulaelenganya pa viipe vino wacisile ku cisila.

 “Uwaelenganya pali vino waluvyanyizye uku cisila nu kusambililako pakuti utakaswilizye nupya. Lelo utafwile ukulaelenganyapo sana cakuti utoovoka nu kutoovoka.”—Elliot

 “Nkaezya ukwelenganya pali vino naluvyanyizye nu kusambililako kuli conga na conga pakuti inje muntu musuma nupya ntakaswilizye icili cimwi kwene nu muku uze. Kucita vivyo kwaya ningo pano cikalenga kuti uwacita ivisuma.—Vera