Uzye ukatonta sana? Ndi avino cili, cipande cii cimakwazwa!

•  Icikaalenga ukutonta

•  Umulandu uno cacindamila

•  Vino ungacita

•  Vino auzo yakalanda

•   Kukwata ivyakucita ivingi. Umukazyana wacance uwi zina lyakuti Julie walanzile ati: “Muli vyonsi vino tukucita umu umi, yakatuneena ukuti twaombesya, ukulunduluka, kupanga mauyo acizile pali vino tukacita alino nukutunguluka umu miombele ya vintu. Cii cikalenga ivintu kutalilako sile!”

•   Vyakupangapanga. Ilingi tukaomvya mafoni, matabuleti nu tuombelo tuze umunzila izipusanepusane pa nsita ikulu nupya cico cingalenga twauvwa sana ukutonta pa nsita itali.

•   Kukanalaala utulo. Mukazyana wacance Miranda walanzile ukuti: Acance aingi yakalaaya ukuzyuka nupya yasilaala zuwa pa mulandu ni sukulu, incito, ni vyakupangapanga. Nupya cico cikalenga yatonta sana.

 Baibo ikatukomelezya ukuombesya. (Mapinda 6:6-8; Loma 12:11) Lelo isilozya umukuti tulinzile ukuombesya sana icakuti twafilwa nu kwika amano uku vintu vyuze ivili wa umi witu.

 “Insita zimwi nazananga ukuti nsikulya ivyakulya uwanda upuma pa mulandu wakuvulilwa ivyakuomba. Nasambilile ukuti citaaya ningo ukuzumila umulimo onsi uno yampeela pano cingalenga umi wane uye umu uzanzo.”—Ashley.

 Baibo yalanda ukuti: “Simbwa mupuma wazipa ukuluta cisama umufwe.” (Kasambilizya 9:4) Kuombesya ukucila umu cipimo kungalenga uwalola kwati wakwata amaka alingine na yakwe cisama. Nomba ndi cakuti ukutonta sana, umi wako ungaya umu uzanzo.

•   Wakaanako vimwi. Baibo ikati: “Apali ukuicefya pene pakafuma amano.” (Mapinda 11:2) Antu aicefya yamanya umwakupeleela nupya yasizumila ukuomba imilimo ino yatange yakwanisye ukuomba.

   “Umuntu aakatonta sana a wiya aatamanya ukukaanako vimwi, wino akalondesya ukuomba imilimo yonsi sile ino yamupeela. Umuntu wa musango uwo ataaicefya. Nupya ukuya viyo kukalenga umwi ukutonta sana.”—Jordan.

•   Wakwatako insita ya kupuuza. Baibo ikati: “Cingazipa ukukwata tunono ukwaula masakamika, kuluta kuivunola ukwaula muzano, umu kwezya ukuzinganya umuza.” (Kasambilizya 4:6) Yakati kulaala kwaya wa “vyakulya vya ku wongo,” lelo acance aingi yasilaala maawazi 8 kufika kuli 10 aakalondekwa cila wanda.

   “Lyonsi lino ivyakucita vyamvulila sana, ntakwatangapo insita ikulu iyakulaala. Nomba insita zimwi ndi nalaala zuwa, calenganga nazyuka ni nsansa uwanda ulondelilepo nu kuomba ningo imilimo.”—Brooklyn.

•   Watantika ningo ivintu. Baibo ikati: “Amapange ya muntu wino watekela yakamuletela umuzano.” (Mapinda 21:5) Kusambilila ivya kuomvya ningo insita nu kumanya imilimo ino ungakwanisya ukuomba kungalenga uwaomba ningo umu umi wako onsi.

   “Ndi cakuti watantikila limwi ivyakuomba utange uwacula umu melenganyo. Ngi cakuti ukweti ipepala pano watantika imiombele, cikaanguka ukulola muno ungasenula imiombele pakuti utatonta sana.”—Vanessa.