“Patalengile, nailile mwi sitolo mu kulola ivyalimo. Nawezile ni vintu vya mutengo vino ntalondanga nu kukala lino ningilemo”—Colin

 Colin walanzile ukuti wakwata uwavya wa miomvezye ya mpiya. Uzye nawe wakwata uwavya uwo? Ndi cakuti avino cili, ale cipande ci cingakwavwa sana.

•  U mulandu ci uno ulinzile ukuomvezya ningo impiya?

•  Ivya kucita

•  Vino auzo yakalanda

 Ufi: Ukusakamala pali vino ukaomvya impiya kulalenga utaya nu untungwa.

 Cisinka: Ukuomvya ningo impiya kulalenga uye sana nu untungwa. Ibuku limwi (I’m Broke! The Money Handbook) lyalanzile ukuti: “Nga wamanyilako vino impiya zyaya, cilalenga kuti uwaziomvya ku kukala vino ukalonda ndakai nu ku nkoleelo.”

 Cino ufwile ukumanya i cakuti: Ndi cakuti ukuomvya ningo impiya . . .

•   Ulakwata impiya izingi lino ukuzilonda. Uwacance uwi zina lyakuti Inez walanzile ukuti: “Ningatemwa ukucaya ku South America pa nsita imwi uku nkoleelo. Lino nkusunga ulupiya nkaelenganya pa uyo uwo.”

•   Ulaakwata Inkongole izinono nanti sile ukukanakwata. Baibo ikalanda ukuti: “Kakongola nawe akaya umuzya wakwe wiyo uwamukongwesya.” (Mapinda 22:7) Umukazyana uwi zina lyakuti Anna wazumile ukuti mazwi yaa acumi. Walanzile ukuti: “Inkongole zingatungulula umi winu. Kukanakwata inkongole kukalenga uwaika mano kuli vino ukapanga ukucita.”

•   Ukalanga ukuti wewe wikolo mu mano. Antu yano yakaomvya ningo impiya cikayangukila ukusunga ningo impiya na lino yakula. Jean uwa myaka 20 walanzile ukuti: “Kucita vivyo kukansambilizya pali vino mikalile yane iya ku nkoleelo ilaya, lino ndaikalila. Nkwezya ukwika mano ku miomvezye ya impiya pakuti nkatwalilile ukucita vivyo kwene nu ku nkoleelo.”

 Icisinka icicindame: Ibuku limwi (The Complete Guide to Personal Finance: For Teenagers and College Students) lyalanzile ukuti: “Ndi cakuti ukuomvya ningo impiya cilakwazwa sana lino ulatandika ukuikalila. Ukuomvya ningo impiya kulakwazwa sana umu umi wako onsi.”

 Ufwile ukumanya muno watonta. Ndi cakuti ilingi ukazana ukuti utakweti impiya, ca nkoleelo ufwile ukumanya vino ukaomvya impiya. Kuli yamwi ukukala ivintu pa intaneti kukalenga yaulizya impiya. Yauze nayo u kukalakala utuntu panono panono cakuti lino cikufika pa mpela ya mwezi ale impiya zyonsi izisila!

 “Lupiya luno ukuomvya ukukalila tumwi utunono cila wanda lukaya lukuvulilako. Kupeela upe lili lili, kukala ivyakumwamwamwa, ukukala utuntu tumwi ututakulondekwa kukalenga nzana sile ukuti pa mpela ya mwenzi ntakweti impiya ntamanyile na vino naziomvizye”—Hailey.

 Watantika vino ukulonda ukukala. Baibo ikalanda ukuti: “Amapange ya muntu wino watekela yakamuletela umuzano.” (Mapinda 21:5) Ndi cakuti ukutantika vino ukulonda ukukala, ulasininkizya ukuti impiya zino ukuomvya zitakucila pa mpiya zino ukakwata.

 “Ngi cakuti ukuomvya impiya izingi kucila pali zino ukakwata ufwile ukumanya vino ukakala mu mpiya zizyo nu kuleka ukukala vintu vino utakulondekwa. Ulinzile ukucefyako ivintu vino ukakala kufikila lino ulatandika kukwata impiya zingi kucila pali zino ukuomvya.”—Danielle.

 Walondela vino watantika. Kwaya ivingi vino ungacita pakuti uwamanya vino ukuomvya impiya nu kukanaziomvya uyi uyi. Yamwi acance yazana ukuti ukucita ivyalondelelapo kwaya ningo:

•  “Ilingi nkatwala impiya ku Banki pano kucita vivyo kukalenga ntakwata sana itunko lya kuziomvya.”—David.

•  “Lino naya ukwi sitolo, nkasenda sile ulupiya ululinge. Kucita vivyo kukalenga ntaomvya lupiya kucila luno inkupanga ukuomvya.”—Ellen.

•  “Ukwelenganyapo sana lino ntalinkale vimwi kukangavwa ukumanya ndi cakuti mfwile ukukala icintu cico nanti foo.”—Jesiah

•  “Ntalinzile ukuya konsi ukuli ukwizizya pamwi! Cazipa ukukana ndi cakuti ntange nkwanisye.”—Jennifer

 Icisinka icicindame: Cacindama sana ukumanya ivya kuomvya ningo impiya. Vikwene avino Colin uwatalandwa pa kutandika kwa cipande ci wiluka. Walanzile ukuti: “Ndi cakuti wanda umwi ndaya umutwe wa lupwa, ntange naonona impiya! Ndi cakuti ntakuomvya ningo impiya lino ncili musimbe, ale cilaleta intazi lino ndatwala.”