ACANCE YAKAUZYA UKUTI
U Mulandu ci Uno Ndinzile Ukuyila mu Kulongana ku Ng’anda ya Wene?
Imiku iili mu mulungu, ya Nte Yakwe Yeova yakakwata ukulongana pa vifulo vyao ivya kupepelapo vino yakaama ukuti Amang’anda ya Wene. I vyani ivikacitika kuuku, nupya ungaipakizya uli ndi wazanwako?
I vyani ivikacitika pa Ng’anda ya Wene?
Ing’anda ya Wene i cifulo pano tukasambilila vino tungaomvya amazwi aya muli Baibo. Ukulongana ukukacitika kuuku kungakwazwa:
ukumanya icumi pali Leza.
ukuvwikisya upiliulo wakwe vino vikucitika pa kulongana.
ukuya muntu musuma.
ukukwata ivyuza visuma.
Uzye watumanya? Icifulo pano ya Nte Yakwe Yeova yakalonganila yakacama ukuti Ing’anda ya Wene pano Uwene Wakwe Leza auno yakalandapo sana.—Mateo 6:9, 10; 24:14; Luka 4:43.
U mulandu ci uno ulinzile ukuzanilwako?
Ivyeo ivikalandwa kuuku vilakwazwa. Ivisinte vya muli Baibo vino ya Nte Yakwe Yeova yakalanzyanya pa kulongana vilakwazwa ukuya na “mano.” (Mapinda 4:5) Ci cikupiliula ukuti Baibo ingakwazwa ukupingula ningo pa vintu mu umi wako. Nupya ingakwazwa nu kwasuka amauzyo akalamba sana apa umi, ukwikako na yaa:
I vyani ivikacitika ndi twafwa?
Apisika pali imitwe ya malyasi sile anono akalandwa pa kulongana kwa pa mpela ya mulungu:
U Mulandu ci Uno Tulinzile Ukulatungululwa na Baibo?
Aekwi Kuno Mungazana Uwazwilizyo Lino Muli ni Ntazi?
Vino Uwene Wakwe Leza Ukucita Ndakai.
“Wino nkasambilila nawe wizile ku kulongana. Wikazile naswe, nupya twaomvizye swensi impapulo. Pa cisila, wanenyile ati watemilwe sana vino antu yasukangapo pa kulongana. Nupya walanzile nu kuti ku calici ku mwitu kutaya amasambililo ya musango uu.”—Brenda.
Uzye watumanya? Tusilipilisya pa kwingila mu Ng’anda ya Wene, nupya tusipisyamo imbale ya mutulo.
Vino ya Nte yakauvwana vilakukomelezya. Baibo ikati umulandu onga uno Aina Klistu yalinzile ukulonganila pamwi u ‘kukomelezyanya.’ (Ayebulai 10:24, 25) Ukuvwana ukwaya pa yantu akaika Leza na antu yauze pa nkoleelo ukuluta aineco kwazipa sana mu nsi ii umwaya ukaitemwe.
Insita zimwi nkauvwa uyi nupya nkatonta sana, nomba antu yano nkazana pa Ng’anda ya Wene yakalenga nauvwa ningo lyonsi. Lino nkuswilila ku ng’anda pa cisila ca kulongana, nkaya sana ni nsansa nupya nkaipekanyizizya ku wanda uwalondelelapo.—Elisa.
Uzye watumanya? Mu nsi yonsi mwaya ivilongano vyakwe ya Nte Yakwe Yeova ukucila pali 120,000 ivikaomvya ivifulo vya kupepelapo ukucila pali 60,000. Cila mwaka umupipi na Mang’anda ya Wene 1,500 yakakuulwa pakuti antu akaiza mu kulongana akuvulilako sile yalonganamo. a
a Pakuti uzane ukwakulonganila uye apakuti “Vino ya Nte Yakwe Yeova Yakalongana” alino utinike apakuti “Zanini Ukwakulonganila Kupipi na Kuno Muli.”
Limwi Mungatemwa Ukulolako na Vii
MASUKO KU MAUZYO AMULI BAIBO
Uzye Caya Sile Ningo Ukuya Umu Upefi Uwapekanyiziwa Ningo?
Uzye umuntu angapepa Leza pa lwakwe?
