•  U mulandu ci uno ulinzile ukuomvyezya ningo insita yako?

•  Vino ungacita

•  Vino auzo yakalanda

•   Insita yaya wa mpiya. Ndi cakuti wonona insita ala utalatala uiomvyepo nupya. Mu nzila yuze, ndi cakuti watantika ningo insita, ungasyalako ni nsita imwi iyakuombamo ivintu vino watemwa!

   Cisinte ca muli Baibo: “Umuntu umukasu akakumbwa ivya yauze ukwaula ukuvilola, lelo umuntu akaombesya wene akalonka.”—Mapinda 13:4.

   Icisinka cicindame: Ngu kuomvya ningo insita ulaya sana nu untungwa.

•   Ukuomvya ningo insita likwene kulalenga uce waomba ningo na lino wakula. Nupya kulakwazwa nu kusungilila incito ino ulaomba pakuti yataca yakuzinge. Ndi cakuti ukacita uculuzi, uzye ungatwalilila ukufolesya umuntu akacelwa ku ncito?

   Cisinte ca muli Baibo: “Wino ali uwakutailwa mu vintu vinono alaya uwakutailwa nu mu vintu vingi.”—Luka 16:10.

   Icisinka cicindame: Vino ukaomvya insita vikalanga vino waya.

 Ukulanda sile cisinka, ukutantika ningo insita kutangupala. Lola vimwi ivingalenga cikutalile.

 Icingalenga #1: Ivyuza

 “Ndi cakuti anji yanena ukuti tuye nayo mukutandala, nkacita vivyo kwene nanti icakuti ntakweti insita. Nkaelenganya ukuti nimaiza mbombe zuwa zuwa imilimo ndi nawela. Nomba asi lyonsi lino vino nkaelenganya vikaomba, nupya ivintu vikaiza vikwipa sana.”—Cynthia.

 Icingalenga #2: Ivya kupumvyanya

 “TV waya wakwe masyini wa ku kuntila lukungu. Akalenga uwingilamo sana muli vino yakulangizya nu mu mafilimu, icakuti icikutalila nu kuta ukutamba.”—Ivy.

 “Nkasumba insita itali sana pali tabuleti wane. Nkauvwa sana uyi ndi cakuti icaleka inte ukuomvya tabuleti u kusila kwa moto muli batili.”—Marie.

 Icingalenga #3: Ukulezyoka.

 “Nkalezyoka ukucita ivya ku sukulu alino ni vintu vili vyonsi vino ndinzile ukucita. Nkasumba insita ukucita ivintu ivitalondolwike nu kulondoloka alino niza malila kucita vicindame, nomba icipe sana ukuomvya insita mu musango uu.”—Beth.

1.   Tantika vino ulinzile ukuombelapo zuwa. Mumo mwaya ukuomba incito zya pa ng’anda alino ni vya ku sukulu. Walemba insita ino umamalanga pali cila mulimo uno ukuomba mu mulungu onsi.

    Cisinte ca muli Baibo: “Mwamanya kusolola ivili visuma.”—Filipi 1:10.

2.   Tantika vino watemwa ukucita mu nsita yako. Mumo mwaya ukulanzyanya na auzo pa intaneti alino nu kutamba TV. Nupya walemba insita ino ukusumba pa vintu vivyo cila mulungu.

    Cisinte ca muli Baibo: “Muye na mano . . . , nu kuomvya insita inu ningo.”—Kolose 4:5.

3.   Tantika ivya kucita. Pituluka mu mapepala yaili yano wali walemba pa kutandika. Uzye insita ikulu waiomvizye ku vintu vya mpomvu? Uzye ulinzile ukutoolako insita na yuze kufuma kuli ino ukaombamo ivya pa lwako?

    Vino ungacita: Uwatantika ivya kucita cila wanda, nupya uwalolapo pali vino watutantika ndi wamala ukuomba umulimo onga.

    Cisinte ca muli Baibo: “Amapange ya muntu wino watekela yakamuletela umuzano.”—Mapinda 21:5.

4.   Walondela vino watulemba. Icisinka icakuti, ulinzile ukucefyako ukulanzyanya na auzo pa intaneti pakuti ivintu vicindame viombwe. Ndi wacita vivyo ulaakwata insita ikulu iya kucitamo ivya pa lwako nupya ulaipakizya.

    Cisinte ca muli Baibo: “Mwaombesya, . . . mutaya akasu.”—Loma 12:11.

5.   Uwailambula nomba asi lino wacitandika sile kuomba. Umukazyana uwa mwaka 20 walanzile ati: “Insita zimwi nkakwanisya ukucita ivintu viili pali vino intantika ukuomba, lyene inelenganya inti, ‘lyene paa ningatamba TV pa mamineti 15 alino nimaswilila mu kuomba.’ Nomba mamineti 15 yakaiza yaya a mamineti 30, lyene mamineti 30 yakaiza yafika kwi awala lyonga, nupya lino ntatala niluka nkaiza nzana ukuti inonona amaawazi yaili ku kutamba TV!”

    I vyani vino ungacita? Walola ukuti ivya kuizanzya ivya kuilambula sile ndi cakuti wamala kuomba ivyampomvu asi ukuti mpaka uvicite foo.

    Cisinte ca muli Baibo: “Icintu cisuma cino umuntu ali wensi angacita, . . . u kuilyokezya pa vintu vino walonka.”—Kasambilizya 2:24.