Uzye ivyeo ivili apisika vikulangilila vino ukayuvwa insita zimwi?

 “Ilingi nkaelenganya ukuti: ‘Cingaya uli . . . ?’ ‘Cingaya uli ndi twapona na motoka?’ ‘Cingaya uli ndi cakuti indeke itu yapona?’ Nkasakamala pa vintu vino muntu ali wensi mupuma angasakamala.”—Charles

 “Lyonsi sile nkasakamala, lelo cikaya kwati nkuzinguluka sile pali pamwi. Nkuombesya sana nomba pasi ca mpomvu cino nkucita!”—Anna

 “Ndi cakuti antu yanena ukuti cili ningo vino incili pa sukulu, nkaelenganya ukuti, ‘Yatamanya vino isukulu likatonsya!’”—Daniel

 “Nkauvwa kwati nkweti ivingi vyakucita. Lyonsi nkasakamala pali vino vilacitika nanti pali vino mfwile ukuomba.”—Laura

 Cisinka icakuti: Tukwikala mu nsita ino Baibo ikaama ukuti “manda akusyalikizya [nupya] atale.” (2 Timoti 3:1) Cico kwene, i cikalenga kuti acance yakwata masakamika wa ikolo.

 Icasuko icakuti awe. Nupya Baibo ikalanda ukuti caya sile ningo ku yantu ukusakamala pakuti yazanzye yano yatemwa.—1 Kolinto 7:32-34; 2 Kolinto 11:28.

 Mu cumi insita zimwi masakamika yakalenga kuti tuombesye. Tuti limwi umulungu ulondelilepo ulalemba masindano pa sukulu. Masakamika yangakupatikizya kuti uwelenge mu mulungu uu nupya kucita vivyo kungalenga kuti ukize ukapaase ningo!

 Nupya masakamika yamwi yangakucelula uku uzanzo. Wacance uwizina lyako Serena walanzile ukuti “Ungakwata masakamika pa mulandu wakuti vino ukucita vitazifile nu kuti ufwile ukusenuka pakuti kampingu atakucuzya.”—Lolako na Yakobo 5:14.

 Cisinka icakuti: Masakamika yangakwavwa, cikulu sile yalenga kuti ucite icintu icilungame.

 Nomba ungacita uli ndi cakuti masakamika yalenga kuti uwaelenganya pa viipe?

 Katulangilile: Richard uwa myaka 19 walanzile ukuti: “Nkaya na masakamika ndi cakuti nelenganya pali vino vingafuma mu wavya uno nkweti, nkaelenganyapo pa wavya uwo maila aingi cakuti icilenga nu kuti nsakamikwe sana.”

 Baibo ikalanda ukuti “mwenzo utambalale uli umi wa mwili.” (Mapinda 14:30) Nupya masakamika yangaleta intazi izingi ku umi wako kumwi nu kuwaika umutwe, lunzingwa, kulwala umu mala alino nu mwenzo ukukanaomba ningo.

 Ungacita uli ndi cakuti walola ukuti masakamika yakukuletela intazi mu cifulo ca kukwavwa?

•   Manya umulandu uno ukusakamalila. Katherine walanzile ukuti “Kusakamikwa sana kwapusana nu kwelenganya sana pa milimo ino ukweti. Cili wa kwezya ukufiya uwato uno iyanyepelela ku mulundu, ungezya na maka yonsi nomba utange ukutwale ukuli konsi.”

   Baibo ikalanda ukuti: “Uzye aweni uwa munomuli, pa kusakamikwa kwakwe, angalundako wanda ku umi wakwe?”—Mateo 6:27.

   Vino cikupiliula: Ndi cakuti masakamiko yatalenzile uwavya wako ukusila, yangalenga uwavya uwo ukulileko, nanti masakamiko kwene ayano yangaya ali wavya.

•   Waombela pa ntazi zya pa wanda uwo kwene. “Tale elenganya. Uzye uwavya uno iukusakamika ulacindama sana uwanda wa mutondo? Pa mwezi? Pa mwaka? Mu myaka 5?”—Anthony

   Baibo ikalanda ukuti: “Caleka mutasakamala pa vintu vya mutondo, pano uwa mutondo wene ulaisakamala uwisikulu.”—Mateo 6:34.

   Vino cikupiliula: Citaya ningo sana ukulasakamikwa pa ntazi zya wanda ulondelilepo, pano limwi vino ukusakamala vitange vize vicitike nu kucitika.

•   Utasakamikwa pa vintu vino utanga ucitepo vili vyonsi. “Icisuma cino ungacita ukwezya papezile maka yako ukuipekanya kuli vino vingacitika, lelo ulinzile ukumanya ukuti kwaya intazi zimwi zino kusi vino ungacita.”—Robert

   Baibo ikalanda ukuti: “Antu yano yakwatisya ulwilo asi lyonsi lino yakacimvya mu kucimvyanya, . . . antu ya mano asi lyonsi lino yakakwata ivyakulya, pano ivikacitika ukwaula ukwenekela vikaponela ali wensi.”—Kasambilizya 9:11, NWT.

   Vino cikupiliula: Insita zimwi utange usenule ivintu, nomba ungasenula vino ukaelenganya pa vintu vivyo.

•   Utaika sana mano ku wavya. “Nkazana ukuti mfwile ukwika mano ku vintu ivicindame kucila ukwika mano ku tuntu tunono. Nkalola ivintu vicindame sana ali vino intandika ukuombelapo.”—Alexis

   Baibo ikalanda ukuti: “Mwamanya kusolola ivili visuma.”—Filipi 1:10.

   Vino cikupiliula: Antu yano yasisakamala sana, yasititikiziwa sana ni ntazi.

•   Wanenako umwi. “Lino nali ni myaka 11, nawelanga ku sukulu ale indi na masakamika, ale nkwelenganya pa wanda ulondelilepo. Ya mayo na ya tata yankutikanga lino nkuyalondolwela vino nkuyuvwa. Nuvwanga ningo sana ukuya pamwi nayo. Nayataile nupya citantalilanga ukulanda nayo. Kucita vivyo kwangavwanga ukumanya ivyakuomba ni ntazi zya wanda ulondelilepo.”—Marilyn

   Baibo ikalanda ukuti: “Ukutwisika kwa muntu kwaya ngi cisendo cinyome mu mwenzo wakwe, lelo amazwi ya mutembo yene yakasansamusya.”—Mapinda 12:25.

   Vino cikupiliula: Muvyazi wako nanti cuza yangakwavwa vya kucita pa kucefya intazi.

•   Wapepa. “Kupepa ale ni izwi likuvwika kukangavwa. Cikalenga kuti mvwange pali vino vikunsakamika kucila kuvisunga mu mutwe. Cikangavwa ukumanya ukuti Yeova umukalamba ukucila masakamika.”—Laura

   Baibo ikalanda ukuti: “Ikini masakamiko inu pali Leza, pano wene akamusakamala.”—1 Petulo 5:7.

   Vino cikupiliula: Ipepo itaya inzila ya kumala intazi sweineco. Lelo kwaya ukulanzyanya kwa cumi na Yeova wino walaya: “Mutasakamala nanti cimwi pano nene indi Leza winu. Nene namamukomyanga nupya namamwavwanga.”—Ezaya 41:10.