•  Vino ulinzile ukumanya

•  Vino ungacita

•  Vino auzo yakalanda

 Ukutailwa kuno watailwa kwasintilila pali ucisinka uno waya nao.

Ukuvwila amasunde yano avyazi yako yakukupeela kwaya kwati ukulipila inkongole. Wakongola avyazi yako icuvwila, nupya ndi cakuti ukuombesya ukuwezya inkongole iyo, ala yalakupeelelapo untungwa nauze. Mu nzila yuze, tungati ndi cakuti utaya ni cisinka, utalinzile ukuzunguka ndi cakuti avyazi yako yata ukukupeela untungwa uno ukalonda.

 Pakalengela pakuti sile antu yakutaile. Ulinzile ukulanga miyele ingalenga avyazi yakutaile lino yatatala yakupeela sana untungwa.

  ILYASI LYA CUMI: “Lino nali musepela, namanyile ningo sana vino avyazi yane yalondanga nacita, fwandi naipanganga kwati nkucita vino yakulonda nanti icakuti nacitanga vino nkulonda ku mbali. Cii calenzile avyazi yane ciyatalile ukuntaila. Lino papisileko insita, nasambilile ukuti pasi vino ningacita: Utanga usombe avyazi yako pakuti yakupeele sana uuntungwa. Ulinzile ukuya uwa cisinka pakuti yakutaile.”—Craig.

 Uwaya ni cisinka nanti icakuti Ukucita vivyo kungakuletelela. Aliwensi akaluvyanya, nomba ukukana vino watucita (nanti ukufisa ivisinka vimwi) kungalenga avyazi yako yate ukukutaila. Na cuze icakuti, ndi wamanyikwa ukuti wewe wa cisinka muli vyonsi, avyazi yako yalalola ukuti lyene watukula uwakuti ungaombela pali vino watuluvyanya wemweneco. Nupya yangakutaila sana.

 “Asi lyonsi lino avyazi yangata ukukutaila ndi cakuti waluvyanya vimwi, nomba yangata ukukutaila ndi cakuti ukufisa vino watucita.”—Anna.

 Baibo ikati: “Tukalondesya kucita cisuma nsita zyonsi.”—Ayebulai 13:18.

•   Vino ulinzile ukwelenganyapo: Ndi cakuti avyazi yako yakuzya kuno ukuya na vino ukuya mukucitako, uzye ukayanena ivisinka vyonsi? Nanti ndi cakuti avyazi yakuzya kuno waile na vino wacitangako, uzye ukafisa ivyeo vimwi vino yangalonda ukumanya?

 Waomvya ningo untungwa uno wapeelwa. Walondela masunde yonsi apa ng’anda. Waomba incito zuwa zuwa. Ndi cakuti mwalayana ukucita cimwi na umwi wafikilizya. Waomba zuwa ivya ku sukulu. Wakonka insita ino yakupeela iya kuwelelapo pa ng’anda.

 “Ndi cakuti avyazi yakuzumilizya ukuya mukucina na auzo nomba yakunena ukuti uwele pa 21:00, utalinzile ukuwela pa ng’anda 22:30 nu kwenekela ukuti na wanda uze yalakuzumilizya ukuya mu kucina na auzo!”—Ryan.

 Baibo ikati: “Umuntu wensi alinzile kuisendela cisendo cakwe umwisikulu.”—Galatiya 6:5.

•   Vino ulinzile ukwelenganyapo: Uzye ukamala maawazi yanga pakuti umale incito zya pa ng’anda, nupya pakalengela uli pakuti uuvwile amasunde nanti icakuti utayatemilwe?

 Uwateekela. Ndi cakuti waleka avyazi yako yata ukukutaila, ala palalengela pakuti yace yakutaile nupya. Waitemelwa ukulolela.

 “Nuvwanga sana uyi lino avyazi yane yatiile ukumpeela untungwa lino nafisile pa musinku umwi. Ntiilwike ukuti ukukula mu myaka asi cilicimwi nu kukula mu mano. Nanenyile avyazi yane ukuti yampeeleko kasita ka kulola ndi cakuti inja uwa cisinka. Casenzile insita, nomba vyaomvile. Nupya nasambilile ukuti iciimo cisilenga umwi atailwe, lelo vino akucita ivikalenga.”—Rachel.

 Baibo ikati: ‘Muilole mweisikulu vino mwaya.’—2 Kolinto 13:5.

•   Vino ulinzile ukwelenganyapo: Pakuti ulenge avyazi yako yakutaile nupya, i vyani vino ulinzile ukucita pakuti ‘uilole wemweneco’?

  VINO UNGACITA: Uwimike uyo, ivili wa uyo wakukalauka ukucita vimwi, wa kumala incito zino yakunena ukuomba, uwa kuwela insita ino yakunena ukuwelelapo pa ng’anda, nanti uwa kucita vyuze sile. Leka avyazi yako yamanye vino watupingula, nupya uyanene yakunene muno yakulola ukuti amuno ufwile ukuzifya pakuti yakutaile. Waombesya ukulondela amazwi aya muli Baibo akuti: “Tiini kucita micitile iipe iyampiti, ni miyele yakweyo yonsi ino ingamulovya.” (Efeso 4:22) Patalalengela avyazi yako yalalola ukuti ukulunduluka.