Ali wensi uwezyapo ukuma ulunzi wamanya vino catala pa kukwanisya. Ya lunzi yaa, yakautuka zuwa sana lino umwi akulonda ukuyuma.

Ya sayansi yazana ukuti, lunzi wi akakwanisya nu kupiliuka nga akupapuka wakwe vivi kwene vino indeke zino yakaomvya umu ulwi zikacita, nomba wene akacita vivyo kucepa na pali sekondi yonga. Michael Dickinson wino wasambilila sana, wasimika ukuti lino yalunzi yaa yavyalwa, “yakapapuka kwati aakalamba. Caya kwati ukwika umwana uwacivyalwa ukukaikala kapisya wa ndeke iikaomviwa uku ulwi ale amanyile ni vya kucita.”

Aakalondelezya yakofile ya lunzi ale yakupapuka nupya cazanyilwe ukuti lino ya kupapuka yakapampasya makwapa imiku 200 pali sekondi sile yonga. Lelo yene yakapampasya makwapa umuku sile onga pakuti yapiliuke nu kuutuka uzanzo.

I nsita ci ikapita pakuti yutuke uzanzo? Aakalondelezya yazana ukuti ya lunzi yaa yanguutuka uzanzo maila 50 kucila vino ilinso lya muntu likakapaya. Dickinson walondolola nu kuti “ya lunzi yakamanya uzanzo mu nsita sile inono, pakuti yalole kuno uyeliile alino na vino yangacita pakuti yutuuke ningo uzanzo.”

Akalondelezya yafilwa kumanya icalenga lunzi akwanisya vii vyonsi nanti cakuti wakwata kawongo wongo kanono sana.