U Mulandu ci Uno ya Nte Yakwe Yeova Yasizevezya Klisimasi?
Ufi uno antu yakalanda pali ya Nte
Ufi: Icalenga ukuti ya Nte Yakwe Yeova yataazevya Klisimasi, u mulandu wakuti yene yatazumila muli Yesu.
Cisinka aeci: Sweswe Ina Klistu. Nupya twazumila ukuti Yesu Klistu aalalenga ukuti tuce tupusuke.—Milimo 4:12.
Ufi: Mukalenga ukuti amu ndupwa yataauvwana pano mukasambilizya antu inu ukuti yataazevyako Klisimasi.
Cisinka aeci: Tukasakamala sana amu ndupwa, nupya tukaomvya Baibo pa kuyazwa kuti yatwalilile ukuvwana.
Ufi: Pa mulandu wakuti musizevyako Klismasi, musipeelako auzo mawila nupya musilonda ukuvwana na antu yauze, nu kuyacitila ivisuma.
Cisinka aeci: Lyonsi tukaezya na maka ukuya amutende uku yanji alino nu kuyazwilizya. (Mapinda 11:25; Loma 12:18) Vino tukacita lino tuli mu kulongana nu mu mulimo wa kusimikila, vikauvwana sana na mazwi yano Yesu walanzile aakuti: “Mwapelwa amaka yakucita vii uwila, caleka namwe kwene kacitilini antu uwila..” (Mateo 10:8) Nupya twika sana mano ku kunena antu pa Wene wakwe Leza ukuti ali uno ulaleta sile umutende wa cumi pano nsi.—Mateo 10:7.
U mulandu ci uno ya Nte Yakwe Yeova yasizevezyako Klisimasi?
Yesu walanzile ukuti tulinzile ukulaiusya sile imfwa yakwe, asi uwanda wa kuvyalwa kwakwe foo.—Luka 22:19, 20.
Atumwa yakwe Yesu alino na Ina Klistu ukutandikilako yatazevyanga Klisimasi. Ibuku limwi (The New Catholic Encyclopedia) lyalanda ukuti ukuzevya kuu kwatandike pa cisila ca mwaka wa 243 [C.E.], nupya insita iyo ala papita ni myaka ukucila pali 100 kufuma pano umutumwa wakwe Yesu uwa kusyalikizya wafwilile.
Kutaya icisinka icili consi cikalanga ukuti Yesu waviilwe pa 25 Dizemba; Baibo itaalanda uwanda uno Yesu waviilwe.
Twazumila ukuti kuzevya Klisimasi kusizanzya Leza pano kwafumilila sile uku ntambi zya yantu asi Aina Klistu.—2 Kolinto 6:17.
U mulandu ci uno mwemwe sile mwalola ukuti Klisimasi itaazipa?
Antu aingi yakazevya Klisimasi nanti cakuti yamanya ukuti Klisimasi yafumilila uku mipepele ya ufi na Baibo itazumilizya ukuzevya kwa musango uwo. Fwandi antu akazevyako limwi yakauzya ukuti: I cani cino Aina Klistu yangasoolwelapo ukuti aliyo sile yapusaneko lino yonsi yakazevya Klisimasi?
Baibo ikatukomelezya ukuti tufwile ukuyelenganyizizya sweineco kuomvya “maka akumanya.” (Loma 12:1, 2) Nupya ikatusambilizya ukuti tufwile ukutemwa icumi. (Yoane 4:23, 24) Fwandi asi mulandu na vino antu yakatulola, swemo tukalondela ivisinte ivyaya muli Baibo nanti cakuti antu yatusuula lino yakulola kuno tukulondela ivisinte vivyo.
Nanti cakuti swemo tusizevyako Klisimasi, tukalanga umucinzi ku nsambu zino antu yakwata izya kuipingwila aeneco ndi cakuti yangazevyako nanti foo. Tusilesya anji ukuti yatafwile ukuzevyako Klisimasi.
Limwi Mungatemwa Ukulolako na Vii
MASUKO KU MAUZYO AMULI BAIBO
Uzye Baibo Yalandapo Uli Pali Klisimasi?
Ukwafuma ivintu 6 vino yakalondela pa kuzevya Klisimasi kungamuzungusya.
MASUKO KU MAUZYO AMULI BAIBO
A Lilaci Lino Yesu Wavilwe?
Sambililini mulandu uno yakazevezya Klisimasi pa 25 Dizemba.
MAUZYO YANO ANTU YAKAUZYA SANA
Uzye ya Nte Yakwe Yeova Yazumila Muli Yesu?
Sambililini mumanye umulandu uno ukuya nu utailo muli Yesu kwacindamila ku Ina Klistu ya cumi.
ABOUT US
U Mulandu ci Uno Mulinzile Ukusambilila Baibo?
Baibo ika-azwa antu aingi sana umu nsi yonsi ukuzana masuko ku mauzyo acindame sana. Nga mwemo mutanga mutemwe?
ABOUT US
Leengini Ukuti ya Nte Yakwe Yeova Yakamutandalile
Mukalanzyanye ivya muli Baibo na ya Nte Yakwe Yeova, nanti mukeezyeko ukusambilila Baibo ukuomvya inzila ino twatantika.