Ya Nte Yakwe Yeova yakaomvya Mabaibo apusanepusane pa kusambilila Baibo. Lelo twatemwa sana ukuomvya Baibo wa Nsi Ipya Uwa Malembo ya Muzilo, mu ndimi zino wasenulwamo, pano mwaya izina lyakwe Leza, mwaya ivya cumi nupya ivyuvwike.

•   Ukuomvya izina lyakwe Leza. Antu yamwi asenula Mabaibo yafilwa ukucindika umwineco wakwe Baibo. Muli Baibo imwi ikamo mazina ya yantu ukucila pali 70 aazwilizye ukusenula Baibo iyo. Nupya muli Baibo kwene wii yafumyamo izina lyakwe Yeova Leza, Umwineco wakwe Baibo!

   Lelo muli Baibo wa Nsi Ipya yaswilizyamo izina lyakwe Leza umu vikomo vyonsi muno lyazanwanga pa kutandika, nupya aali muli komiti ya kusenula yataisokolola mazina yao.

•   Ivya cumi. Asi Mabaibo yonsi asenula mazwi yakwe Leza acumi wakwe viivi kwene vino yaali pa kutandika. Baibo imwi, yasenula Mateo 7:13 ukuti: “Ingilini pa mpongolo ifyenkane, pano impongolo iya kuila uku moto wa pe yasaalala nu museo uwa kuilamo wangupala.” Lelo umu vyeo ivyalipo pa kutandika paali izwi lyakuti “uwononesi,” pataali “umoto wa pe.” Limwi ya kasenula isilepo izwi lyakuti “umoto wa pe” pano yazumile ukuti ya kacita ya viipe yakacululuka manda pe umu moto wa pe. Nomba icisambilizyo cico cisi ca muli Baibo. Acino Baibo wa Nsi Ipya wasenula ivyeo vya cumi ivyakuti: “Ingilini pa mulyango ufyenkane, pano umulyango ukulu nu museo usaalale vikatwala uku ononesi.”

•   Ivyuvwike. Baibo uwasenulwa ningo atalinzile sile ukukwata ivyeo vya cumi, lelo vilinzile nu kuya ivyuvwike nupya ivyangupale. Elenganyini pali cii: Pali Loma 12:11, umutumwa Paulo waomvizye amazwi aakuti nga mwayalondela vivyo kwene, yangapiliula ukuti, “umupasi ukubila.” Pa mulandu wakuti amazwi yayo yatakwata upiliulo wa mpomvu umu cizungu ndakai, Baibo wa Nsi Ipya wasenula icikomo cii umu nzila iyangupale ukuvwa. Ikati, aina Klistu yalinzile ukuleka ‘umupasi wayalenga ukuya acincile.’

 Ukulunda pa kukwata izina lyakwe Leza, ukuya uwa cumi nupya umuvwike, Baibo wa Nsi Ipya waiyela umu cintu na cuze: Akapeelwa uku yantu ukwaula ukulipilisya. Na cii calenga ukuti antu aingi yabelenga Baibo umu lulimi lwao, kumwi sile na yaaya kwene akuti yatanga yakwanisye ukukala Baibo.