Ivili apisika i vikalenga ukuti ya Nte Yakwe Yeova yatalwako inkondo:

1.   Tukauvwila Leza. Baibo ikati antu yako Leza yalatola “ivipeni nu kusulamo amase” napya kutalatala kuye umuntu “alasambilila ivya nkondo.”—Ezaya 2:4.

2.   Tukauvwila Yesu. Yesu wanenyile umutumwa Petulo ati: “Swilizya ulupanga lwako mu cipata ca luko pano yano yonsi akalema ulupanga yene yalafwila ku lupanga.” (Mateo 26:52) Fwandi Yesu walozyanga umu kuti alondezi yakwe yatalinzile ukutola ivyanzo nu kuya uku nkondo.

    Asambi yako Yesu yakauvwila isunde lyakwe pa kukanaya “amu nsi,” pano yasizanwa umu vikanza vya muno nsi. (Yoane 17:16) Yasilesya imilimo ino asilika yakaomba nanti ukukanya yayo akulonda ukwingila usilika.

3.   Twatemwa antu. Yesu wanenyile alondezi yakwe ukuti ‘yaatemwana.’ (Yoane13:34, 35) Fwandi yaali nu kutemwana nu kupanga ulupwa umu nsi yonsi icakuti kusi uwali nu kulwisya umuze.—1 Yoane 3:10-12.

4.   Tukakolanya Aina Klistu aakutandikilako. Ibuku limwi (Encyclopedia of Religion and War states) likalanda ukuti: “Alondezi yakwe Yesu yatalwanga inkondo nanti ukwingila usilika,” yalolanga ukuti ukulwa inkondo kutuvwananga ni cisinte ca “kutemwana cino Yesu wasambilizye, alino ni sunde lya kuti yatemwa na alwani.” Napya umonsi umwi uwa ku Germany uwasambilila pa vya mipepele, Peter Meinhold<uB8> walanzile pa yasambi yako Yesu akutandikilako ukuti: “Ukuya Umwina Klistu nu musilika pa nsita yonga kwene vituvwananga.”

 Ya Nte Yakwe Yeova yakaomba ningo sana mu vifulo vino ikalamo, napya yatanga yalete uzanzo mu mpanga zino ikalamo. Twacindika mauteeko wako vino tukasambilila muli Baibo ukuti:

•   “Muntu wensi alinzile ukuyela maka yako ya kateeka.”—Loma 13:1.

•   “Caleka peelini Kesa vyakwakwe, Leza nawe mu mupeele vyakwakwe.”—Mateo 22:21.

 Fwandi tukalondela masunde ya uteeko, tukapeela imisonko, napya tukacita vino uteeko ukulonda tuombe pakuti yazwe aikazi.