Ee, ilingi sile ya Nte Yakwe Yeova yakaazwilizya sana ndi kwacitika amazanzo. Tuka-azwilizya yonsi atiyaponelwa na mazanzo nanti asi ya Nte yanji kwene, nupya tukayapeela ivikulondekwa, tukalondela vino ilembelo lyako Galatiya 6:10 likalanda, pano lyene likati: “Caleka tulinzile kucita ivisuma ku muntu wensi vino tungacita nu kuluta kuli yao ali alondezi yakwe Klistu.” Napya tukayakomelezya, alino nu kuyazwa muli vyakwe Leza pa nsita ino yakulondeka uwazwilizyo.—2 Kolinto 1:3, 4.

 Lino kwacitika uzanzo, ya eluda yakaezya ukulola yonsi yano yaya nayo umu cilongano cico ukucitikile uzanzo, pakuti yalole angalondeka uwavwilizyo. Lyene yakalondolwela iofesi lyako ya Nte Yakwe Yeova ilikalolekesya pa vilongano ivyaya umu ncende kwene iyo pali vino ivicitika alino nu wazwilizyo uwati upeelwa.

 Ngi cakuti cilongano citanga cikwanisye ukupeela uwazwilizyo uukulondeka, lyene Iumba Ilikatungulula Ilya Nte Zyakwe Yeova likapekanya uwavwilizyo ukulondeka. Vikwene avino na Ina Klistu aali umu cilongano ca kutandikilako yazwananga ndi kwaya icipowe. (1  Kolinto 16:1-4) Aaya umwi ofesi linono lyako ya Nte Yakwe Yeova yakasonta komiti uwa kwazwilizya aponelwa na mazanzo, nupya yakwene aakapeela nu utunguluzi ukulondeka. Ya Nte Yakwe Yeova yamwi yakaitemelwa ukufuma ukutali pa kuti ize yazwilizye, nupya yakasangwilako ni vyuma vyao.—Mapinda 17:17.

 Inzila yonga ino tukaomvezyamo imisangulo iikatumwa ku maofesi yanono yako ya Nte Yakwe Yeova u ku kwazwilizya atiyaponelwa na mazanzo. (Milimo 11:27-30; 2 Kolinto 8:13-15) Vino aakaomba umulimo uu yakaitemelwa sile kwaula ukulipilwa, fwandi imisangulo ikaomviwa ku kwazwilizya ati-yaponelwa nu uzanzo. Tukaomvya ningo sana imisangulo.—2 Kolinto 8:20.