Ya Nte Yakwe Yeova yakatungulula isambililo ilya Baibo ilika-asuka mauzyo aingi, kumwi na yaa ali apisika:

•   Uzye Leza a weni?

•   Uzye i cumicumi Leza akansakamala?

•   Ningacita uli pakuti cupo cane cizipileko?

•   Uzye ningacita uli pakuti inje ni nsansa?

 Apisika mumazana masuko ku mauzyo yano antu aingi yakauzya sana pali vino tukatungulula isambililo lya Baibo.

  Uzye isambililo likatungululwa uli? Tukasoolola malyasi apusane pusane wakwe yaya akulanda pali “Leza” nanti pa “cupo,” lyene ituwelenga nu kuvwikisya malembelo apusane pusane aakulanda pi lyasi kwene lilyo. Nga tuvwikisya malembelo yayo alino tukamanya vino Baibo ikalanda pi lyasi lino tukusambililapo, napya ukucita vii, ala tukuleka ukuti Baibo iliyo ikutunena ivisinka.

 Pakuti cangupale ukusambilila Baibo, tukaomvya ibuku lyakuti Uzye Baibo Ikatusambilizya Vyani? Mwi buku lii mwaya malyasi akalanda vino Baibo ikasambilizya pali Leza, pali Yesu, na vino ivintu vilaya uku nkoleelo.

  Uzye a zinga zino mukalipilisya pa kusambilizya Baibo? Tusilipilisya, nupya tusikazya impapulo zino tukaomvya pa kusambilila.

  Uzye kukaaya ukumala maawazi yanga pi sambililo? Antu aingi yakasoolola kuti yangaasambilila Baibo naswe apipi ni awala lyonga nanti ukucilako panono cila-mulungu. Lelo insita iifwile ukusumbwa pi sambililo itiimikilwa limwi. Tukalondela insita kwene ino mweineco mwatuneena.

  Uzye cikaya uli ndi cakuti naleenga ukuti mutandike ukunsambilizya Baibo? Ndi cakuti mwaleenga ukuti umwi amusambilizya Baibo, lyene Nte Wakwe Yeova alamutandalila pa nsita ni ncende ino mweineco mukulonda. Mu mamineti sile anono, alamulangilila vino tukasambilila Baibo. Lyene ndi mwatemwa vino muvwa, mungasoololapo ukuti mwasambilila lyonsi.

  Uzye nga nazumila ukusambilila Baibo, mfwile nu kuya Nte Wakwe Yeova? Awe. Nanti cakuti swe ya Nte Yakwe Yeova twatemwa ukusambilizya antu Baibo, tusipatikizya umuntu ali wensi kuti angatandika ukupepa naswe. Lelo tukayaneena vino Baibo ikalanda, nupya tukamanya ukuti cila muntu waikwatila insambu zya kusoolola vino angazumila.—1 Petulo 3:15.