“Ndi cakuti ukulonda ukusambilila pali Leza, ulinzile ukulemasya ukuya na ya Nte Yakwe Yeova.” Nazungwike sana ukuvwa amazwi yayo. Apa nsita iyo ala nkasambilila na ya Nte yakwe Yeova nupya patatala palengela pano twatandikile. Nomba pakuti muvwikisye icalenzile vivyo vicitike, lekini ndondololeko panono pa umi wane.

Navyalilwe umu Quezaltepeque, itauni ilyayela umu El Salvador. Nali nene wakwe namba 6 pa yana 15. Avyazi yane yezizye na maka ukunkuzya ningo ukuya uwa cisinka nu kuvwila masunde. Nupya ya Leonardo na yauze anaci yaili yonsi ya Nte Yakwe Yeova izanga ilingi umu kunsambilizya pali Baibo. Nomba ntacindike vino yansambilizyanga nupya napingulangapo ukucita iviipe. Lino nali ni myaka 14, natandike ukumwa uwengwa nu kuomvya imilembo ikavulunganya uwongo na anji ya kusukulu. Anji yatanga isukulu wenga wenga nu kwingila umwi umba lya vipondo nani nalondelile ukucita vivyo kwene iviipe. Twikalanga umu miseo, ukupatikizya antu ukutupeela impiya nu kwiya pa kuti twakwata impiya zya kukalila uwengwa ni milembo.

Amwi umba lya vipondo ali yano izile iyaya yalupwa yane. Nazumile ukuti nalondekwanga ukuya uwacisinka kuli aliyo. Uwanda umwi, uwa mwi umba lya vipondo umwi ala wataomvya sana imilembo wazanzile umwina mupalamano wane umwi. Lino yalwanga, umwina mupalamano wakwanisye ukucimvya umunji nu kwama ya kapokola. Natandike ukutamola motoka ya muntu wiyo ni cela icifine na maka sana ala ninsoka pakuti sile ate umunji apita. Mwina mupalamano wampapatile ukuti inte vino nacitanga lino natamolanga mawindo ya kuli motoka nu konona vyela vyuze nomba nakanyile ukuvwa.

Lino nali ni myaka 18, iumba lya vipondo vino nalimo lyalwile na ya kapokola. Lino nalondanga ukusumba ibomu lyapolekile umu minwe yane nupya ntamanyile ni calenzile ciye vivyo. Nkaiusya sile ukulola ikasa lyane kuno napiile nupya nafwile icipafi. Lino nazyusile ala indi umu cipatala, nizile inzana ukuti ntakweti ikasa lya kwilunji nu kuti ntuvwanga ukwi kutwi lya kwilunji nupya nazanyile ukuti ilinso lyane ilya kwilunji litalolanga sana.

Asi mulandu na vino nacisike, lino nafumile sile umu cipatala naswilile umwi umba lya vipondo. Nomba patalengile ya kapokola yandemile nupya yanjisile umu cifungo. Mu cifungo ucuza wane ni vipondo wakomileko sana. Uwanda onsi twacitilanga ivintu pamwi ukulya ivyakulya vya katondo pamwi, nu kupeepa impwanyi twatandikilanga pamwi mpaka ni nsita ya kuya umu kulala.

Lino nali umu cifungo, ya Leonardo yantandalile. Lino twavwanganga, yasonsile pali vino nakweti api kasa ivikalaye. Yanguzizye yati “Uzye watumanya upiliulo wa vintu vivyo vitatu ivili pi kasa vino wakalaya?” Natile “ee vikupiliula, ucende, milembo ikavulunganya uwongo, alino na kimba nupya kacina umulumbuke sana.” Nomba ya Leonardo yanenyile iyati: “Nemo ningati vikupiliula ukuti icipatala, cifungo alino ni mfwa. Wayapo umu cipatala lyene paa uli umu cifungo. Fwandi watumanya icilalondelelapo.”

Vino ya Leonardo yanenyile vyanzungwisye sana. Vino yalanzile i vya cumi. Naimbilanga ilindi ukupitila muli vino umi wane wali. Ya Leonardo yanguzizye ndi cakuti ningatandika ukusambilila Baibo nayo, nazumile. Vino nasambililanga muli Baibo vyangazwile ukusenula umi wane. Baibo ikati “ya cuza aipe yakaonona miyele isuma.” (1 Kolinto 15:33) Fwandi icintu conga pa vintu vino nali nu kutandikilapo ukucita u kulonda ya cuza yauze. Ali mulandu uno nateelile ukuya umu kukomana kwa vipondo lelo natandike ukuya umu kulongana kwakwe ya Nte Yakwe Yeova ukwayelanga umu cifungo kwene. Apa kulongana kuku, nakomenkine nu mufungwa munji Andrés uwawatiziwe umu cifungo kwene ukuya Inte Yakwe Yeova. Wanenyile ukuti twaliila pamwi nawe icakulya ca katondo. Lyene natiile ukutandika uwanda nu kupeepa impwanyi. Lelo Andrés nani twalanzyanga ilembelo lyonga ilya muli Baibo cila katondo.

Patalengile amwi umba lya vipondo yaweni ukuti nkusenuka. Na cico calenzile intunguluzi yonga iya vipondo ukunena ukuti ikulonda ukulanda nani. Nuvwile sana intete. Ntamanyile vino wali nu kuncita lino wamanyile vino nalondanga ukucita pano ala insita ya kufuma umu kaliumba kaka yapita. Watiile: “Twatitulola ukuti usikuzanwa ukukukomaana lelo ukuya uku kulongana na ya Nte Yakwe Yeova. I vyani vino ukulonda ukucita?” Namunenyile inti nkulonda ukutwalilila ukusambilila Baibo nu kusenula umi wane. Icazungwisye icakuti, wanenyile ukuti amwi umba lya vipondo yalancindika ndi cakuti nalanga ukuti nalondesyanga ukuya Inte Yakwe Yeova. Lyene watiile: “Ndi cakuti ukulonda ukusambilila pali Leza, ulinzile ukulemasya ukuya na ya Nte Yakwe Yeova. Tukwenekela ukuti umata ukucita ivintu iviipe. Nakutaizya sana. Wasoolola inzila isuma cuze. Ya Nte yalakwazwa. Nasambililepo nayo lino nali uku United States, nupya ya lupwa yane yamwi a Nte Yakwe Yeova. Utalinzile ukuvwa intete. Twalilila sile.” Nali ni ntete nomba pa nsita ili imwi kwene nali nu luzango. Nataizye Yeova Leza umu mwenzo. Nuvwile kwati avivi vino akunyi kakauvwa ndi yakayulila muno yakayalile, nupya nuvwikisye mazwi yakwe Yesu akuti: “Mulamanya cumi ca pali Leza, nga ni cumi cilamukulula.”—Yoane 8:32.

Nanti ciye vivyo anji yamwi ampiti yanjezyanga nu kumpeela imilembo ikavulunganya uwongo. Kulanda sile icisinka insita zimwi napokanga. Nomba lino papisile insita, pa cisila ca kupepelapo sana natiile imiyele yane iipe.—Masamu 51:10, 11.

Pa cisila yamfumizye umu cifungo, aingi yamanyile ukuti nali nu kuswilila uku miyele ino nacitanga mpiti nomba ntaswilileko. Lelo ilingi nayanga umu cifungo umu kusimikilako afungwa vino nasambilile muli Baibo. Lyene ya cuza yane ampiti yasininkizye ukuti nasenwike. Icifileko i cakuti alwani yane ampiti yene yatasininkizye ukuti nasenwike.

Uwanda umwi lino naile umu kusimikila, wino twasimikilanga nawe pamwi nani twazingulwikwe ni vipondo vya mwi umba lyuze ilya vipondo vino twacimvyanyanga navyo lino nali icipondo ivyali ni mfuti, nupya vyalondanga ukunkoma. Wino twasimikilanga nawe mu mucinzi wavilondolwelile ukuti asi nene cipondo lyene. Ala nemo papo nkwezya ukuteeka umwenzo. Pa cisila ca kunguma nu kunena ukuti ntalinzile ukuyako uku ncende iya yatonsile nu kutuleka tupite. Mu cumi Baibo wasenwile umi wane. Mpiti nga nezizye ukuyaswilizyamo. Nomba nalondiile vino Baibo ikatucelula pali 1 Tesalonika 5:15 ukuti: “Mwasakamala ukuntacitilana cilanduzi. Lelo nsita zyonsi mulinzile kukwata simwililo lya kucita cisuma kuli cila wenga nga nu ku antu onsi.”

Ukufuma papo nizile inja Inte Yakwe Yeova nupya nezya na maka ukuya uwa cisinka. Citanjangukila ukucita vivyo. Nomba pa mulandu wakuti Yeova Leza akangazwa, vino Baibo ikatusambilizya alino nu kwazwa ukufuma uku anji apya naya ni miyele iyo. Nsilonda ukuswilila uku miyele yane iya mpiti.—2 Petulo 2:22.

Nali sana umunkalwe nu kusoka sana. Nasininkizya ukuti pa nsita ii ndi nafwa intwalilila ukuya umunkalwe. Vino nasambilile muli Baibo vyansenula. Natiile ukuya ni miyele yane iipe. Nasambilila ukuya uwa mutende na alwani yane ampiti. (Luka 6:27) Nupya ndakai nkaipakizya ukuya pamwi na ya cuza akangazwa ukuya ni miyele isuma. (Mapinda 13:20) Naya nu umi usuma nupya uwa nsansa, nupya nkaombela Leza uwaiteyanya ukunjelela vyonsi vino nacita.—Ezaya 1:18.

Umu 2006 naile ukwisukulu iliiyele ilya Ina Klistu lyakwe ya kakosoola ya Wene asimbe. Lino papisile imyaka, natwazile mamane uwatemwikwa, nupya tukukuzya umwana umukazyana pamwi. Pa nsita ii lyene nkasumba insita ikulu ukusambilizya yauze ivisinte vya muli Baibo ivyangazwilizye. Nupya nene eluda umu cilongano cino nayamo, lyene nkaezya ukwazwa acance ukukanacita ivintu vino nacisile lino nali umwance. Ukucila ukuimbila ilindi, nkakuula umi wane uwa ku nkoleelo uwa malayo yano Leza watulaya muli Baibo.