Navyalilwe umu San Juan Chancalaito, akalitauni akanono akaya umu citungu ca Chiapas ku Mexico. Ulupwa lwane ulwa mu mutundu wa Chol, akaliumba ka Yamaya. Twaviilwe 12 nupya nene wakwe cisano. Lino nali umwance, ainane yonsi nani twasambilinga Baibo na ya Nte Yakwe Yeova. Nomba icifileko i cakuti ntacitanga vino Baibo yasambilizyanga lino nali umwance.

Lino nafisyanga imyaka 13, ala nkaomvya imilembo ikavulunganya uwongo nu kwiyila antu ivintu. Pa nsita kwene iya nafumile apa ng’anda nupya nacitanga inikala kuu inikala na kuu. Lino nali ni myaka 16 natandike ukuomba api famu pano yalimanga impwanyi. Naomvileko papa umupipi nu mwaka, nomba wanda umwi usiku lino twasendanga impwanyi izingi ukuomvya uwato, aonsi aamaka nupya ali ni mfuti afumile uku kaliumba ka milembo ikavulunganya uwongo kauze yatuzanzile. Nutwike lino yapikanga imfuti intolokela umu luzi injamfumila kutali sana kuno uluzi kwene lulo lwaya. Pa cisila cakwe cico nutukiile uku United States.

Lino nali uku United States, natwalilile ukukanzya imilembo ikavulunganya uwongo umu nkama nupya nacitanga sana ivintu ivingi iviipe. Lino nali ni myaka 19 yandemile nu kunjika umu cifungo pa mulandu nu upuupu na pa mulandu wakuti nalondanga ukukoma umuntu. Mu cifungo kwene ningile umu kaliumba ka vipondo nupya nacitanga imilandu na yuze iya unkalwe. Na cii calenzile akalamba ya cifungo yantwale uku cifungo icali icicingililwe sana umu Lewisburg uku Pennsylvania.

Lino nali umu cifungo ca mu Lewisburg, imiyele yane ipiileko sana ukucila vino nali. Pa mulandu wakuti nakweti ivimanyililo vya upondo, cangangukiile ukwingila umwi umba lya vipondo ivya miyele ili imwi ivyali umu cifungo kwene cii. Nizile inja sana umunkalwe, nu kulwa malwete aipe cila nsita. Pa nsita imwi nazanyilwe umu lwete lwa vipondo vitupu ulwaelile umukasi ka cifungo. Twalwile icipisye ukuomvya utumbao tuno yakaomvya ukumilako tubola ni nsimbi zya kutukusizyako umwili. Pakuti yakalinda ya cifungo yalesye ulwete luu, yaomvizye tiyagasi. Pa cisila cakwe cico akalamba ya cifungo yanjisile umu muputule uiyele muno ikanga antu aipe sana. Nasokanga sana nupya naomvyanga amazwi aipisye. Cangangupalile sana ukuma antu. Nupya nuvwanga ningo sana ukucita vivyo. Ntuvwanga uyi pali vino nacitanga.

Umu muputule uwa uiyele, yanjalilanga umu ka muputule kane insita izingi fwandi natandike ukuwelenga Baibo pakuti insita yapitako. Patalengile, kasunga wa cifungo umwanaci wampeezile ibuku lyakuti Mungikala Umu Paladaise Pano Nsi Amanda Pe (You Can Live Forever in Paradise on Earth). * Lino nawelenganga ibuku lii ilyalandanga pali Baibo, niusyanga ivintu ivingi vino nasambilile lino nasambililanga Baibo na ya Nte ala nene mwance. Lyene, natandike ukwelenganya pali vino umi wane wali na pa viipe uwingi vino nacisile pa mulandu nu kuya umuntu umunkalwe. Nupya nelenginye na pali ya lupwa yane. Pa mulandu wakuti mangulenzi nu mutowane umukazyana izile iyaya ya Nte, nelenginye ukuti ‘Yalikala amanda pe.’ Lyene nayuzizye nemwineco inti, ‘Nga nemo, i cani cikundesya?’ Lilyo kwene alino napingwilepo ukusenuka.

Nomba, namanyile ukuti nalondekwanga uwazwilizyo pakuti insenuke. Fwandi icakutandikilako cino nacisile, u kupepa kuli Yeova Leza nu kumupapata ukuti angazwe. Lyene nalemvile kalata ukwi Ofesi lyakwe ya Nte Yakwe Yeova ilya ku United States nu kulenga isambililo lya Baibo. Aapi ofesi yanenyile apa cilongano cali umupipi ni cifungo ukuti yakize yakandole. Pa nsita kwene ii, yatazumilizye aatali ya lupwa yane ukwiza umu kumpempula, fwandi Nte uwa mu cilongano cica watandike ukuntumila makalata ni mpapulo pa kompyuta ivyakunkomelezya na cico calenzile nalondesya sana ukusenuka.

Napingwilepo ukuta icintu icikalamba sana icalenganga ntasenuka, nafumile umu kaliumba ka vipondo muno nali pa myaka iingi. Umukalamba wa vipondo nawe wali umu muputule uiyele muno yasungilanga antu aipisye, fwandi naile kuli aliwe nu kumunena ukuti nalondanga ukuya Inte Yakwe Yeova. Nazungwike sana, lino wanenyile ukuti: “Ndi cakuti avino ukulonda, cita vivyo kwene. Ntange nkulesye ukupepa Leza. Nomba ndi cakuti ukulonda ukufuma umwi umba lya vipondo, watumanya ivilakucitikila.”

Umu myaka ili, aomvi ya mu vifungo yaweni vino nasenwile imiyele yane. Na ci calenzile yandangulukilako. Ya kalinda ya vifungo yatiile ukunyepa ndi cakuti yakunsukilila umu kufulala. Kalinda umwi wizile nu kunkomelezya ukutwalilila ukusenuka wakwe vino nacitanga. Nupya akalamba ya cifungo yantumile uku cifungo kuno kutaali ukucingililwe sana umupipi ni cifungo cino nalimo umwaka uwafumileko. Pa cisila ca kwikala umu cifungo imyaka 10, nafumile umu 2004 nupya yantwazile uku Mexico na basi wa cifungo.

Lino nafisile sile uku Mexico, nalonzile ukwayelile Ing’anda ya Wene Yakwe ya Nte Yakwe Yeova. Naile ndongana umuku wa kutandikilako ala nzwite yunifomu ya ukaili, nupya ali vya kuzwala sile ivya mucinzi vino nakweti. Asi mulandu na vino nalolekanga, ya Nte yampokeliile ningo sana. Lino naweni vino yali ni cikuuku, nuvwile ukuti nali na Ina Klistu ya cumi. (Yoane 13:35) Pa kulongana kuku ya eluda yapekinye ukuti ntandike ukusambilila Baibo. Nawatiziwe ukuya Inte Yakwe Yeova umwaka uwalondelilepo, apa 3 Sepetemba 2005.

Umu Januwale 2007, nizile inja painiya wa nsita yonsi, nasimikilanga nu kusambilizya yauze Baibo pa maawazi 70 cila mwezi. Umu 2011, namazile Isukulu Lya Baibo Ilya Onsi Asimbe (ndakai tukaama ukuti Sukulu Lyakwe ya Kakosoola ya Wene). Isukulu lii lyangazwile sana ukuomba ningo imilimo ino nakweti umu cilongano.

Umu 2013, natwazile Pilar. Akalanda ukuti akavilwa ukuzumila vino nkamunena pali vino umi wane wali. Ntatala naswililapo kuli vino nacitanga mpiti. Mamane nani, swensi twazumila ukuti vino naya ndakai vikalanga vino Baibo yakwata amaka ya kusenula.—Loma 12:2.

Nkauvwa ukuti amazwi yakwe Yesu aya pali Luka 19:10 yakalanda pali nene. Walanzile ukuti: ‘Nizile kuti ndonde nu kutuula aponge.’ Ndakai nsiuvwa ukuti nene muponge. Nupya nsiya umu yantu umu kuyacisa. Naya sana ni nsansa pano Baibo yangazwa ukuya nu umi usuma nupya ucindame, kuya uwa mutende na antu yanji ni cicindamisye sana icakuti naya na ucuza usuma na Kaumba wane Yeova.