Aet. Anij ej kea kõn ri-karejar ro an me ewõr aer naniñmej. Ikijjeen juon ri-karejar eo me etiljek, Baibõl̦ ej ba: “[Jeova] enaaj jipañe ilo iien an nañinmej.” (Sam 41:3) El̦aññe kwõj juon eo me ewõr ippam̦ nañinmej ko rel̦l̦ap, buñtõn ne kein jilu remaroñ jipañ eok ñan kijenmej:

1.   Jar kõn kajoor bwe kwõn kijenmej wõt. Kwõmaroñ bõk “aenõm̦m̦an eo jãn Anij, eo el̦ap jãn jel̦ã otemjej,” me emaroñ kadikl̦o̦k am̦ inepata im jipañ eok ñan wõnm̦aanl̦o̦k wõt meñe epen.​—Pilippai 4:6, 7.

2.   L̦õmn̦ak eo am̦ en em̦m̦an. Baibõl̦ eo ej ba: “Am̦ m̦õn̦õn̦õ ej kõm̦m̦an bwe kwõn ãjmour, ak am̦ bũrom̦õj enaaj kam̦õjn̦o̦ik eok ñan mej.” (Jabõn Kõnnaan 17:22, UBS) Kate eok bwe kwõn ettõñ im kõm̦m̦an kõjak, bwe men in eban baj jipañ eok bwe kwõn emmerara ak emaroñ bar jipañ ãjmour eo am̦.

3.   Kalõke tõmak eo am̦ kõn ilju im jekl̦aj. Juon kõjatdikdik em̦m̦an kõn ilju im jekl̦aj emaroñ jipañ eok bwe kwõn lo lañlõñ mekarta ewõr am̦ nañinmej ko rel̦l̦ap. (Rom 12:12) Baibõl̦ eo ej kanaan bwe ewõr juon iien “ri-jokwe ie ejãmin ba, ‘inañinmej.’” (Aiseia 33:24) Ilo iien en̦, Anij enaaj jol̦o̦k aolep nañinmej ko rel̦l̦ap me wõnm̦aanl̦o̦k ko an science rejjab maroñ kõm̦adm̦õdi. Ñan waanjoñak, eñin wãween an Baibõl̦ kõmel̦el̦e kõn an naaj ro rerũtto bar jepl̦aak ñan iiõ ko em̦m̦an ded: “Innem kanniõkin enaaj em̦m̦anl̦o̦k jãn kanniõkin niñniñ; enaaj jepl̦aak ñan raan ko ke ear likao.”​—Job 33:25.

 Naanin kakeememej: Meñe Ri-Kõnnaan ro an Jeova rej kile bwe Anij ej jipañ, ak rej bareinwõt pukot kein kõm̦adm̦õd ko jãn taktõ ro ikijjeen nañinmej ko rel̦l̦ap. (Mark 2:17) Mekarta ãindein, kõmij jab kwal̦o̦k ta kein kõm̦adm̦õd ko juon ej aikuj bũki; kõmij eñjake bwe ej an juon armej make jokãlõt kõn ãjmour eo an.