1 Jon 3:1-24
3 Lale m̦õk joñan an Jemãdwõj ilañ yokwe kõj, ear kõtl̦o̦k ad bõk ãt in ajri ro nejin Anij! Im elukkuun m̦ool bwe jej ro nejin. Eñin unin lal̦ in ejaje kõn kõj, kõnke ejjab jel̦ã kõn e.
2 Ro rejitõnbõro, jej kiiõ ajri ro nejin Anij, ijoke ejjañin alikkar enaaj ewi wãweed tokãlik. Bõtab, men eo jejel̦ã in ej bwe ilo iien eo enaaj kwal̦o̦k e make, jenaaj ãinwõt e kõnke jenaaj lukkuun lo e.
3 Im aolep ro rej kõjatdikdik ilo e, rej kõm̦m̦an bwe ren erreo, ãinwõt an erreo.
4 Aolep ro ejjab bõjrak aer jerawiwi, ejjab bareinwõt bõjrak aer rupe kien, kõnke jerawiwi ej rupe kien.
5 Kom̦ bareinwõt jel̦ã bwe ear itok* kõnke en jol̦o̦k jerawiwi ko ad, im ejjel̦o̦k jerawiwi ippãn.
6 Aolep ro rej pãdwõt ilo aer juon wõt ippãn, rejjab wõnm̦aanl̦o̦k ilo aer jerawiwi; jabdewõt eo ej wõnm̦aanl̦o̦k ilo an jerawiwi, ejjañin loe ak jel̦ã kõn e.
7 Ajri ran̦, jab kõtl̦o̦k bwe jabdewõt en kõjebwãbweik kom̦; eo ej wõnm̦aanl̦o̦k im kõm̦m̦ani men ko rewãnõk ej juon ri-wãnõk, ãinwõt an Jesus wãnõk.
8 Eo ejjab bõjrak jãn an jerawiwi, ej jãn Tepil̦ eo, kõnke ejjañin bõjrak an Tepil̦ eo jerawiwi jãn jinoin.* Eñin unin an Nejin Anij kar wal̦o̦k bwe en ko̦kkure * jerbal ko an Tepil̦ eo.
9 Aolep ro rej nejin Anij,* rejjab wõnm̦aanl̦o̦k ilo aer jerawiwi kõnke ine * eo jãn E ej pãdwõt ilo er, im rejjab maroñ wõnm̦aanl̦o̦k ilo jerawiwi kõnke rej nejin Anij.*
10 Men eo ej kaalikkar wõn ro rej nejin Anij im wõn ro rej nejin Tepil̦ eo, ej eñin: Jabdewõt eo ejjab wõnm̦aanl̦o̦k wõt im kõm̦m̦ani men ko rewãnõk, armej in ejjab jãn Anij, ekoba armej eo ejjab yokwe jein ak jatin.
11 Bwe ennaan eo in kom̦ar roñ jãn jinoin, eñin bwe jej aikuj yokwe doon;
12 im jen jab ãinwõt Kein, eo ej jãn ri-nana eo, im ear urõte l̦eo jatin. Bwe taunin an kar kõm̦m̦ane men in? Ej kõnke jerbal ko an renana, ak jerbal ko an l̦eo jatin rewãnõk.
13 Ro jeiũ im jatũ, kom̦win jab bwilõñ kõn an lal̦ in dike kom̦.
14 Jejel̦ã bwe jaar el̦l̦ã jãn mej im kiiõ jemour kõnke jej yokwe ro jeid im jatid. Eo ejjab yokwe, ej ãinwõt ñe emej.
15 Jabdewõt eo ej dike jein ak jatin, ej juon ri-uror, im kom̦ jel̦ã bwe ejjel̦o̦k mour indeeo ippãn juon eo ej ri-uror.
16 Jaar maroñ mel̦el̦e kõn yokwe kõn wõt eo ear m̦õn̦õn̦õ in letok mour eo an kõn kõj, kõn men in, jej aikuj m̦õn̦õn̦õ in lel̦o̦k mour ko ad kõn ro jeid im jatid.
17 Ijoke, jabdewõt eo ewõr ippãn m̦weiuk ko an lal̦ in im ej lo an jein ak jatin pãd ilo aikuj, bõtab em̦akoko in kwal̦o̦k tũriam̦o ñane, innem ewi wãween an maroñ ba bwe ej yokwe Anij?
18 Ajri ran̦, ad yokwe en jab ilo naan wõt im kõn lood, ak jen bareinwõt kwal̦o̦ke ilo m̦ool im ilo kõm̦m̦an ko ad.
19 Ilo wãween in, jenaaj jel̦ã bwe epãd m̦ool eo ippãd, im jenaaj kõm̦akũt bũruod ñan tõmak* bwe ebuñbũruon ippãd,
20 jekdo̦o̦n ta eo bũruod emaroñ liaakel̦o̦k kõj kake, kõnke Anij el̦apl̦o̦k jãn bũruod* im ejel̦ã men otemjej.
21 Ro rejitõnbõro, el̦aññe ejjel̦o̦k men en̦ bũruod ej liaakel̦o̦k kõj kake, innem jemaroñ kõnono ilo peran ñan Anij.
22 Im jabdewõt men eo jej kajjitõk ippãn kake, jenaaj bõk jãne kõnke jej pokake kien ko an im jej kõm̦m̦ani men ko rem̦m̦an im̦aan mejãn.
23 Ilo m̦ool, eñin ej kien eo an: ej bwe en wõr ad tõmak ilo etan Nejin, Jesus Christ, im bwe jen yokwe doon, ãinwõt an kar kakien kõj.
24 Bareinwõt, eo ej pokake kien ko an Anij, armej in ej pãdwõt ilo an juon wõt ippãn, im Anij enaaj juon wõt ippãn armej rot in. Im ikijjeen jetõb kwõjarjar* eo ear letok ñan kõj, jejel̦ã bwe ej pãdwõt ilo an juon wõt ippãd.
Footnotes
^ Kajin Grik, “wal̦o̦k.”
^ Ak “jãn iien eo ear jinoe.”
^ Ak “rupe.”
^ Kajin Grik, “rar l̦otaktok jãn Anij.”
^ Mel̦el̦ein, ine eo emaroñ jebar leen.
^ Kajin Grik, “rar l̦otaktok jãn Anij.”
^ Ak “kõm̦m̦an bwe jen tõmak kõn aolepen bũruod.”
^ Ak “el̦apl̦o̦k an jel̦ã kake kõj jãn kõj make.”
^ Ak “kajoor.” Lale “Jetõb kwõjarjar” ilo Kõmel̦el̦e Ko.
