1 Korint 1:1-31
1 Jãn Paul, eo em̦õj kũri ikijjeen ankilaan Anij bwe en juon rijjilõk an Christ Jesus, im jãn Sostenis, eo jeid im jatid,
2 ñan eklejia eo an Anij ilo Korint. Kom̦ ro em̦õj kokkwõjarjar er bwe ren juon wõt ippãn Christ Jesus, im em̦õj kũr kom̦ bwe kom̦win ro rekkwõjarjar, bareinwõt ñan aolep ro ijoko otemjej im rej kũr ñan ãt eo etan Irooj Jesus Christ, eo ej aer Irooj im ad Irooj:
3 Jouj eo el̦ap im aenõm̦m̦an eo jãn Anij, eo ej Jemãdwõj, im jãn Irooj Jesus Christ, en pãd ippemi.
4 Aolep iien ij kam̦m̦oolol Anij kõn kom̦ kõn an kar kwal̦o̦k jouj eo an el̦ap ñan kom̦ ikijjeen Christ Jesus;
5 kõnke ikijjeen ami juon wõt ippãn Christ, em̦õj lewaj ñan kom̦ men otemjej. Em̦õj lewaj maroñ eo bwe kom̦win kwal̦o̦k kõn ennaan eo im bwe kom̦win kanooj mãlõtlõt,
6 kõnke em̦õj an ennaan eo kõn Christ kõm̦m̦an bwe kom̦win jutak pen.
7 Eñin unin ejjel̦o̦k men en̦ kom̦ij aikuji ñan jidik ilo ami kõttar im kijoororetok an lukkuun alikkar jerbal ko an Jesus Christ ad Irooj.
8 Bareinwõt, Anij enaaj kõm̦m̦an bwe kom̦win jutak pen ñan jem̦l̦o̦kin, bwe en ejjel̦o̦k jabdewõt ej n̦aruomi kõn jabdewõt men ilo raan eo an ad Irooj Jesus Christ.
9 Anij etiljek, im ear kũr kom̦ bwe kom̦win juon wõt* ippãn Nejin, Jesus Christ ad Irooj.
10 Ro jeiũ im jatũ, ij akwel̦ap ñan kom̦ ilo etan Jesus Christ ad Irooj bwe kom̦win aolep bõrokuk ippãn doon ilo naan im en ejjel̦o̦k jepel ibwiljimi. Ijoke kom̦win aolep errã ippãn doon im lukkuun juon wõt ilo l̦õmn̦ak.
11 Unin aõ ba men in ej kõnke jet jãn m̦weo im̦õn Kloe rar kõnnaanek eõ kõn kom̦, ro jeiũ im jatũ, bwe ewõr poktak ibwiljimi.
12 Men eo ij kajjioñ ba in ej bwe jet iaami rej ba: “Ña ij doon Paul,” jet rej ba: “Ña ij doon Apollõs,” bar jet rej ba: “Ña ij doon Sipas,”* im bar jet rej ba: “Ña ij doon Christ.”
13 Ejepel Christ ñan elõñ m̦õttan ke? Ta Paul ear mej ilo al̦al̦ in eñtaan eo kõn kom̦ ke? Ke ta, kom̦ar peptaij ilo etan Paul ke?
14 Ij kam̦m̦oolol Anij bwe iar jab peptaiji jabdewõt iaami ijello̦kun wõt Krispõs im Geiõs,
15 kõnke ejjel̦o̦k iaami en ba bwe ear peptaij ilo eta.
16 M̦ool bwe iar bar peptaiji ro ilo m̦weo im̦õn Stepanas, ijoke ijaje el̦aññe ewõr en̦ iar bar peptaiji ijello̦kun rein.
17 Christ ear jab jilkintok eõ bwe in peptaiji armej. Ear jilkintok eõ bwe in kwal̦o̦k kõn ennaan eo em̦m̦an, bõtab ejjab bwe in kwal̦o̦k naan ilo aõ kõjerbal naan ko an rimmãlõtlõt ro kõnke men in enaaj kõm̦m̦an bwe al̦al̦ in eñtaan* eo an Christ en jejtokjãn.
18 Ennaan eo kõn al̦al̦ in eñtaan* eo ej juon menin bwebwe ñan ro renaaj jako, bõtab ñan kõj ro renaaj bõk lo̦mo̦o̦r, jej watõke men in bwe ej kwal̦o̦k kõn kajoor eo an Anij.
19 Bwe em̦õj je: “Inaaj kõm̦m̦an bwe mãlõtlõt eo an rimmãlõtlõt ro en jako, im inaaj kõjekdo̦o̦n* jel̦ãl̦o̦kjen̦ eo an ro rejel̦ãl̦o̦kjen̦.”
20 Ewi rimmãlõtlõt ro? Ak ewi skraib* ro? Epãd ia armej ro rej kõm̦m̦an aitwerõk kõn men ko an jukjukun pãd* in? Ta Anij ear jab kõm̦m̦an bwe mãlõtlõt eo an lal̦ in en oktak im menin bwebwe ke?
21 Kõn an armej in lal̦ in lõke mãlõtlõt ko aer make, rejjab jel̦ã kõn Anij. Men eo jej kwal̦o̦k kake ej menin bwebwe ñan ro jet, bõtab ikijjeen ennaan in, Anij ear pepe in lo̦mo̦o̦ren ro rej tõmak. Ilo wãween in, mãlõtlõt eo an Anij ear alikkar.
22 Ri-Ju ro rekõn̦aan ellolo kõkal̦l̦e im ri-Grik ro rej kappok mãlõtlõt,
23 bõtab jej kwal̦o̦k kõn Christ, eo kar m̦ane ilo aer dilaiki ilo juron al̦al̦. Ennaan in ej juon menin l̦õkatip ñan ri-Ju ro, ak ñan ri-aelõñ ko, ej juon menin bwebwe.
24 Bõtab, ñan ri-Ju im ri-Grik ro jim̦or me em̦õj kũr er, kajoor eo an Anij im mãlõtlõt eo an Anij rej alikkar ilo Christ.
25 Men ko jãn Anij me armej rej watõki bwe rebwebwe, men kein remãlõtlõtl̦o̦k jãn armej, im men ko jãn Anij me armej rej watõki bwe rem̦õjn̦o̦, men kein rekajoorl̦o̦k jãn armej.
26 Ro jeiũ im jatũ, ke ear kũr kom̦, jejjo wõt iaami rar mãlõtlõt ilo kanniõk,* bareinwõt jejjo wõt iaami rar kajoor, im jejjo wõt iaami rar itok jãn baam̦le ko reutiej.*
27 Bõtab Anij ear kããlõt men ko lal̦ in ej watõki menin bwebwe bwe en kajook ro remãlõtlõt, im Anij ear kããlõt men ko lal̦ in ej watõki bwe rem̦õjn̦o̦ bwe en kajook ro rekajoor,
28 im Anij ear kããlõt men ko lal̦ in ej watõki bwe rejjab aorõk, im men ko armej rej reilal̦l̦o̦k ñani, im men ko lal̦ in ej kajejtokjãer, kõnke en julo̦k men ko lal̦ in ej watõki bwe el̦ap tokjãer.
29 Ilo wãween in, ejjel̦o̦k en̦* emaroñ kõmjãje im̦aan mejãn Anij.
30 Bõtab kõn wõt Anij, kom̦ maroñ juon wõt ippãn Christ Jesus, eo ear kwal̦o̦k ñan kõj mãlõtlõt eo jãn Anij, im wãnõk, im kwõjarjar, im eo ear katok kõn mour eo an ñan kõl̦l̦ãik on̦ããn ad rõl̦o̦k jãn jerawiwi,
31 bwe en jejjet men eo kar je: “Eo ej kõmjãje, en kõmjãje kõn Jeova.”*
Footnotes
^ Ak “kom̦win kobal̦o̦k.”
^ Ãt eo juon etan Piter.
^ Lale “Al̦al̦ in eñtaan” ilo Kõmel̦el̦e Ko.
^ Lale “Al̦al̦ in eñtaan” ilo Kõmel̦el̦e Ko.
^ Ak “kajejtokjãn.”
^ Mel̦el̦ein, ro retijem̦l̦o̦k kõn Kien. Lale “Skraib” ilo Kõmel̦el̦e Ko.
^ Lale “Jukjukun pãd” ilo Kõmel̦el̦e Ko.
^ Ak “mãlõtlõt ekkar ñan l̦õmn̦ak ko an armej.”
^ Ak “baam̦le ko ewõr bõnbõnier.”
^ Kajin Grik, “kanniõk.”
^ Lale “Jeova” ilo Kõmel̦el̦e Ko.
