1 Korint 12:1-31
12 Ak kiiõ ikijjeen menin letok ko jãn Anij, ro jeiũ im jatũ ijjab kõn̦aan bwe kom̦win jaje kaki.
2 Kom̦ jel̦ã bwe ilo tõre ko ke kom̦ar armej in aelõñ ko,* kom̦ar kabuñ ñan ekjab ko ejjel̦o̦k ainikieer im kõtl̦o̦k bwe ren tõlpilouk kom̦, im kom̦ar l̦oor er ilo men otemjej rej tõll̦o̦k kom̦ ñani.
3 Ak kiiõ ikõn̦aan bwe kom̦win jel̦ã bwe ejjel̦o̦k juon eo ej kõnono ikijjeen jetõb kwõjarjar* eo an Anij enaaj ba: “Elia Jesus!” im ejjel̦o̦k juon emaroñ ba: “Jesus ej Irooj!” el̦aññe ejjab kõn jetõb kwõjarjar.*
4 Elõñ kain menin letok ko, bõtab ewõr juon wõt jetõb kwõjarjar.*
5 Elõñ kain jerbal, bõtab ewõr juon wõt Irooj.
6 Elõñ kain m̦akũtkũt ko, bõtab ewõr juon wõt Anij im ej kõmaroñ aolep armej bwe ren kõm̦m̦ani men kein.
7 Jipañ eo jãn jetõb kwõjarjar* ej alikkar ilo armej otemjej, im Anij ej letoke bwe aolep ren bõk tokjãn.
8 Jetõb kwõjarjar* ej kõmaroñ juon armej bwe en kõnono* ilo mãlõtlõt, im ejja jetõb kwõjarjar* in wõt ej kõmaroñ bar juon bwe en kõnono ilo jel̦ãl̦o̦kjen̦.
9 Ejja jetõb kwõjarjar* in wõt ej lel̦o̦k tõmak ñan bar juon, im ejja jetõb kwõjarjar* in wõt ej kõmaroñ bar juon bwe en kõmour ro jet,
10 im ej kõmaroñ bar juon bwe en kõm̦m̦an menin bwilõñ, im ñan bar juon ej lel̦o̦k maroñ eo ñan kwal̦o̦k kanaan ko. Ak ñan bar juon ej lel̦o̦k maroñ eo bwe en etale el̦aññe juon ennaan ej itok jãn Anij, im ñan bar juon ej lel̦o̦k maroñ eo ñan kõnono kõn lo ko,* im ñan bar juon ej lel̦o̦k maroñ eo ñan ukok ñan juon eo ej kõnono kõn lo ko.
11 Aolep maroñ kein rej itok jãn ejja jetõb kwõjarjar* in wõt, im ej ajeje maroñ kein ñan kajjojo armej ekkar ñan kõn̦aan eo an.
12 Meñe ewõr juon wõt ãnbwin, bõtab elõñ m̦õttan ko ie, im meñe elõñ m̦õttan ko, ijoke aolepeer rej m̦õttan juon wõt ãnbwin. Ãindein bar Christ.
13 Kõj aolep jaar peptaij kõn juon wõt jetõb kwõjarjar* bwe jen erom juon wõt ãnbwin meñe kõj ri-Ju ak ri-Grik, ri-kõm̦akoko ak ri-anemkwõj, im kõj aolep jaar bõk jetõb kwõjarjar* in.
14 Juon ãnbwin ej ejaakin elõñ m̦õttan ko, im ejjab ejaakin juon wõt m̦õttan.
15 Meñe ne eo emaroñ kar ba, “Kõnke ejjab ña pã, ijjab m̦õttan ãnbwin in,” jekdo̦o̦n ak ej m̦õttan wõt ãnbwin eo.
16 Im meñe lo̦jilñi eo emaroñ kar ba, “Kõnke ejjab ña mãj, ijjab m̦õttan ãnbwin in,” jekdo̦o̦n ak ej m̦õttan wõt ãnbwin eo.
17 El̦aññe aolepen ãnbwin eo enaaj kar mãj, ekõjkan an naaj maroñ roñjake? Ak el̦aññe aolepen ãnbwin eo enaaj kar lo̦jilñi, ekõjkan an naaj maroñ kããtet?
18 Ijoke em̦õj an Anij karõke kajjojo iaan m̦õttan ko ilo ãnbwin eo ekkar ñan kõn̦aan eo an.
19 El̦aññe aolep ren kar juon wõt m̦õttan, innem epãd ia ãnbwin eo?
20 Bõtab meñe elõñ m̦õttan ko, ak juon wõt ãnbwin.
21 Mãj eo ejjab maroñ ba ñan pã eo, “Ijjab aikuji eok,” im bar eo ejjab maroñ ba ñan ne eo, “Ijjab aikuji eok.”
22 Ewõr m̦õttan ko ilo ãnbwin eo me jemaroñ l̦õmn̦ak bwe rem̦õjn̦o̦, bõtab ilo m̦ool raorõk,
23 im m̦õttan ko ilo ãnbwin me jej l̦õmn̦ak bwe edik tokjãer, el̦apl̦o̦k ad kautieji. Kõn men in, m̦õttan kein me rejjab kanooj em̦m̦an ippãd, el̦apl̦o̦k ad kaorõki,
24 bõtab m̦õttan ko ilo ãnbwin me raiboojoj rejjab aikuj jabdewõt men. Mekarta, Anij ear ejaake ãnbwin eo im el̦apl̦o̦k an lel̦o̦k kautiej ñan m̦õttan ko edik ad kautieji,
25 bwe en ejjel̦o̦k jepel ilo ãnbwin eo, bõtab bwe aolep m̦õttan ko ren lale doon.
26 El̦aññe juon iaan m̦õttan ko ilo ãnbwin eo ej eñtaan, aolep m̦õttan ko jet rej bar eñtaan ippãn. Ak el̦aññe juon iaan m̦õttan ko ilo ãnbwin eo ej bõk nõbar, aolep m̦õttan ko jet rej m̦õn̦õn̦õ ippãn.
27 Kiiõ kom̦ aolep kom̦ij ãnbwinnin Christ, im kajjojo iaami ej m̦õttan ko ilo ãnbwinnin.
28 Anij ear lel̦o̦k eddo ko kajjojo ñan ro ilo eklejia eo: m̦oktata, rijjilõk; kein karuo, ri-kanaan; kein kajilu, ri-katakin; innem ro rej kõm̦m̦an menin kabwilõñlõñ ko; ro rej kõmour ro jet; ro rej kõm̦m̦ani jerbal ko ñan jipañ ro jet; ro rejel̦ã tõl; im ro rej kõnono kõn lo ko.
29 Er aolep rej ke rijjilõk? Er aolep rej ke ri-kanaan? Er aolep rej ke ri-katakin? Er aolep rej ke kõm̦m̦an menin kabwilõñlõñ ko?
30 Er aolep rej ke kõmour ro jet? Er aolep rej ke kõnono kõn lo ko? Er aolep rej ke ri-ukok?
31 Kom̦win wõnm̦aanl̦o̦k wõt im kate kom̦ bwe kom̦win bõk* menin letok ko rel̦l̦apl̦o̦k. Bõtab inaaj kwal̦o̦k ñan kom̦ juon men em̦m̦anl̦o̦k.
Footnotes
^ Mel̦el̦ein, ilo iien eo rejjañin kar rũttõmak.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kwal̦o̦k juon ennaan.”
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “ilo kajin ko jet.”
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “Kom̦win wõnm̦aanl̦o̦k wõt im kanooj pukote.”
