1 Korint 13:1-13
-
Yokwe ej make wõt em̦m̦antata (1-13)
13 El̦aññe ij kõnono kajin* ko an armej im an enjel̦ ran̦ ak ejjel̦o̦k yokwe ippa, inaaj ãinwõt ainikien peel̦ ak taññal̦o̦kin juon cymbal.*
2 El̦aññe kar letok maroñ eo bwe in kanaan im imel̦el̦e kõn aolep men ko rettino im rekkwõjarjar an Anij im kar letok aolep jel̦ãl̦o̦kjen̦, im el̦aññe elukkuun kajoor tõmak e aõ ñan joñan eo imaroñ kõm̦akũt tol̦ ko, ak ejjel̦o̦k yokwe ippa, innem ejjel̦o̦k tokja.*
3 El̦aññe ij wiakake aolep men ko m̦weiõ bwe in maroñ naajdik ro jet, im el̦aññe ij lel̦o̦k mour e aõ* bwe in maroñ kõmjãje kake, bõtab ejjel̦o̦k yokwe ippa, innem ejjel̦o̦k tokjãn aolep men kein.
4 Yokwe ej meanwõd* im jouj. Yokwe ejjab ebbanban. Ejjab kõmjãje, ejjab utiej bõro,
5 ejjab kõm̦m̦ani men ko rejekkar,* ejjab l̦õmn̦ak wõt kõn e make, im ejjab m̦õkaj an illu. Yokwe ejjab bwini* bõd ko an ro jet.
6 Ejjab m̦õn̦õn̦õ kõn men ko rejjab jim̦we, bõtab ej m̦õn̦õn̦õ kake m̦ool.
7 Ejjab ebbeer ilo men otemjej, ej tõmak men otemjej, ej kõjatdikdik ilo men otemjej, im ej kijenmej ilo men otemjej.
8 Yokwe ejjãmin likjab.* Bõtab el̦aññe kar letok maroñ ñan kanaan, enaaj jako, im el̦aññe ewõr maroñ ñan kõnono kõn lo ko,* enaaj jem̦l̦o̦k, im el̦aññe ewõr jel̦ãl̦o̦kjen̦, enaaj jako.
9 Ilo m̦ool, ejjab likiio jel̦ãl̦o̦kjen̦ ko ippãd, im kanaan ko ad rejjab likiio.
10 Bõtab ñe eitok men eo elikiio, innem men eo ejjab likiio enaaj jako.
11 Ke iar juon ajri, ikõn kõnnaan ãinwõt ajri, l̦õmn̦ak ãinwõt ajri, im kõl̦mãnl̦o̦kjen̦ ãinwõt ajri. Ak kiiõ ke ij juon em̦m̦aan, em̦õj aõ julo̦k aolep wãween ko an ajri.
12 Men ko jej loi kiiõ rej ãinwõt men ko jej loi ilo juon kilaaj etab, bõtab ilo naaj tõre en̦, enaaj lukkuun alikkar ad loi kõn mejãd. Ilo tõre in, joñan jel̦ã eo aõ ejjab likiio, bõtab enaaj likiio ilo tõre en̦, ãinwõt an Anij lukkuun jel̦ã kõn ña.
13 Ijoke, men kein jilu renaaj pãdwõt: tõmak, kõjatdikdik, im yokwe; bõtab men eo el̦aptata an aorõk iaaer ej yokwe.
Footnotes
^ Kajin Grik, “lo.”
^ Juon kein kõjañjañ edoulul im el̦ap ainikien ñe rej keitaake ippãn bar juon.
^ Ak “ña armej waan.”
^ Kajin Grik, “lel̦o̦k ãnbwinnũ.”
^ Ak “kijenmej.”
^ Ak “ejjab nana ñan ro jet.”
^ Ak “keememej.”
^ Ak “jako.”
^ Mel̦el̦ein, kõnono ilo kajin ko jet ilo kabwilõñlõñ.
