1 Korint 16:1-24
16 Ak kiiõ ikijjeen ami aini jããn ko ami ñan ro rekkwõjarjar, kom̦ maroñ l̦oore naanin tõl ko iar lil̦o̦k ñan eklejia ko ilo Galetia.
2 Ilo raan eo m̦oktata ilo kajjojo wiik,* kajjojo iaami en kõjenolo̦k jet jããn ekkar ñan joñan maroñ eo an, kõnke kom̦win jab aini jããn ko ñe itõparwaj jen̦e.
3 Innem ñe itõparwaj ijen̦e, inaaj jilkinl̦o̦k em̦m̦aan ro kom̦ naaj jejetok ilo lõta im kwal̦o̦k bwe kom̦ij lõke er, bwe ren bõkl̦o̦k ñan Jerusalem men ko kom̦ij m̦õn̦õn̦õ in lil̦o̦ki.
4 Bõtab, el̦aññe em̦m̦anl̦o̦k bwe in bar etal, innem renaaj itok ippatok.
5 Inaaj iwõj ñan ippemi ãlikin aõ pãd ilo Masedonia, kõnke inaaj etal ilujenl̦o̦k Masedonia.
6 Innem bõlen imaroñ pãd ippemi ak kõl̦o̦k iien añõneañ in ippemi, bwe kom̦win maroñ itok ippatok ilo jidikin ial̦ eo aõ l̦o̦k ñan ijo inaaj etal ñane.
7 Unin ej kõnke ijjab kõn̦aan bwe en dik aõ iien ippemi, kõnke ij kõjatdikdik in jol̦o̦k el̦ap iien ippemi, el̦aññe ej ankilaan Jeova.*
8 Bõtab ij pãdwõt ilo Epesõs m̦ae iien Kwõjkwõjin Pentekost* eo,
9 kõnke epel̦l̦o̦k juon iien em̦m̦an* ñan aõ kõm̦m̦ane elõñ jerbal ko ije, ijoke elõñ ri-jum̦ae.
10 Innem ñe Timote enaaj iwõj, kom̦win lale bwe en jab mijak ñe enaaj pãd ippemi, kõnke ej kõm̦m̦ane jerbal eo an Jeova* ãinwõt ña.
11 Kõn men in, ejjel̦o̦k juon en reilal̦l̦o̦k ñane. Kom̦win kab jilkintok e ilo aenõm̦m̦an bwe en itok ñan ippa, kõnke ña im ro jeid im jatid kõmij kõttaretok.
12 Ikijjeen Apollõs, eo jeid im jatid, iar lukkuun akwel̦ap ñane bwe en iwõj ippãn rũttõmak ro jet ñan ippemi. Ilo tõre in, ejjab l̦õmn̦ak in iwõj, bõtab enaaj iwõj ilo iien eo ejejjet.
13 Kom̦win ruj wõt, kom̦win jutak pen wõt ilo tõmak. Kom̦win peran* im kajoorl̦o̦k wõt.
14 Men otemjej kom̦ij kõm̦m̦ani, kom̦win kõm̦m̦ani ilo yokwe.
15 Kiiõ ro jeiũ im jatũ, ij jiroñ kom̦ men in: Kom̦ jel̦ã bwe ro ilo m̦weo im̦õn Stepanas, er eo m̦oktata rar erom ri-kal̦oor ilo Akeia im rar lel̦o̦k er make bwe ren jipañ ro rekkwõjarjar.
16 Kõn men in, kom̦win bareinwõt kõttãik wõt kom̦ ñan kain armej rot rein im ñan aolep ro rej jipañ ilo jerbal in im el̦ap aer kate er.
17 Ilukkuun lañlõñ bwe Stepanas, Fortunetõs, im Akeikõs repãd ije, kõnke el̦ap aer jipañ eõ ilo tõre in kom̦ jako jãn iturũ.
18 El̦ap aer kaenõm̦m̦an bũruõ* im bũruomi. Kõn men in, kom̦win kautiej em̦m̦aan rot in.
19 Eklejia ko ilo Eijia* rej lewaj aer yokwe kom̦. Akula im Priska ekoba eklejia eo ilo m̦weo im̦weerro rej lewaj naanin yokyokwe eo emããn̦ãn̦ ilo Irooj.
20 Aolep ro jeid im jatid rej lewaj aer yokwe kom̦. Kom̦win yokyokwe doon kõn mejenma eokkwõjarjar.
21 Ña Paul, ij make jejewaj im jilkinwaj aõ naanin yokyokwe.
22 El̦aññe jabdewõt armej ejjel̦o̦k an yokwe Irooj, en lia. O am Irooj, kwõn itok!
23 Jouj eo el̦ap an Irooj Jesus en pãd ippemi.
24 Yokwe eo aõ en pãd ippemi aolep, kom̦ ro rej juon wõt ippãn Christ Jesus.
Footnotes
^ Eñin ej raan eo jej n̦aetan Sunday. Ippãn ri-Ju ro, eñin ej raan eo m̦oktata ilowaan juon wiik.
^ Lale “Jeova” ilo Kõmel̦el̦e Ko.
^ Lale “Pentekost” ilo Kõmel̦el̦e Ko.
^ Kajin Grik, “juon kõjãm el̦ap.”
^ Lale “Jeova” ilo Kõmel̦el̦e Ko.
^ Ak “Kom̦win ãinwõt m̦õm̦aan.”
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Lale “Eijia” ilo Kõmel̦el̦e Ko.
