1 Korint 3:1-23
3 Kõn men in, ro jeiũ im jatũ, iar jab kõnono ñan kom̦ ãinwõt ro rej mour ekkar ñan tõl eo an jetõb kwõjarjar,* bõtab iar kõnono ñan kom̦ ãinwõt ro rej mour ekkar ñan kanniõk, ro rej niñniñ ilo Christ.
2 Iar kaidaak kom̦ milik, im jab naajdik kom̦ m̦õñã ko reppen kõnke kom̦ij jañin kar lukkuun rũtto ilo tõmak. Ilo m̦ool, meñe ilo tõre in ak kom̦ij jañin lukkuun rũtto ilo tõmak,
3 kõnke ejjañin jako ami mour ekkar ñan kanniõk. Ilo an wõr ebbanban im poktak ibwiljimi, ta ejjab kaalikkar ke bwe kom̦ij mour ekkar ñan kanniõk, im kõm̦m̦an ko ami rej ãinwõt armej ro jet?
4 Ke jet iaami rar ba, “Ña ij doon Paul,” im ro jet rar ba, “Ña ij doon Apollõs,” men in ejjab kaalikkar ke bwe kom̦ij ãinwõt armej ro jet?
5 Innem wõn Apollõs? Im wõn Paul? Kõmij ri-jerbal ro rej kõm̦m̦ane jerbal eo Irooj ear letok ñan kõm, im kom̦ar oktak im tõmak ikijjeen am kar jipañ kom̦.
6 Iar kallib, Apollõs ear utdikdik, bõtab Anij eo ear kaddekl̦o̦k.
7 Kõn men in, eo ej bõk nõbar ej Anij, eo im ej kaddekl̦o̦k, im ejjab eo ej kallib ak eo ej utdikdik.
8 Kiiõ eo ej kallib kab eo ej utdikdik rej juon wõt,* bõtab kajjojo iaaer enaaj bõk an jinõkjeej ekkar ñan jerbal ko an.
9 Kõmij ri-jerbal ippãn Anij. Kom̦ij ãinwõt jikin kallib an Anij im ej wõnm̦aanl̦o̦k im katõke, im kom̦ij ãinwõt m̦weo im̦õn Anij.
10 Kõn wõt jouj eo el̦ap an Anij im em̦õj letok ñan ña, iar maroñ kalõk juon pedped ãinwõt juon eo ej tõl jerbalin ekkal me ekapeel, im bar juon armej ej ekkal ioon. Kõn men in, kajjojo armej en kanooj lale wãween an ekkal ioon pedped in.
11 Ejjel̦o̦k juon emaroñ kõm̦m̦ane bar juon pedped ijello̦kun wõt pedped eo em̦õj kar kõm̦m̦ane, pedped in ej Jesus Christ.
12 El̦aññe jabdewõt enaaj kõjerbal gold, ak jelba, ak dekã ko raorõk, ak al̦al̦, ak jet kain ujooj ñan ekkal ioon pedped in,
13 jerbal kein aer kajjojo renaaj lukkuun alikkar. Kõnke ilo naaj raan eo, naaj kaalikkar jerbal kein ikijjeen kijeek, im kijeek eo enaaj kaalikkar kain jerbal rot armej rein kajjojo rar kõm̦m̦ani.
14 El̦aññe jabdewõt iaan jerbal ko aer ioon pedped in enaaj pãdwõt im jab jako, armej in enaaj bõk an jinõkjeej.
15 Ak el̦aññe jerbal eo an jabdewõt iaaer enaaj bwil, enaaj kanooj eñtaan kõn joñan men ko eluuji. Bõtab armej in enaaj bõk lo̦mo̦o̦r, enaaj ãinwõt ñe ear el̦l̦ã jãn kijeek.
16 Kom̦ij jab jel̦ã ke bwe kom̦ij tampel̦ eo an Anij im bwe jetõb kwõjarjar* eo an ej pãd ippemi?
17 El̦aññe jabdewõt enaaj ko̦kkure tampel̦ eo an Anij, innem Anij enaaj ko̦kkure e, kõnke tampel̦ eo an Anij eokkwõjarjar, im kom̦ij tampel̦ eo an Anij.
18 Ejjel̦o̦k en m̦on̦e e make: El̦aññe jabdewõt iaami ej l̦õmn̦ak bwe emãlõtlõt ilo jukjukun pãd* in, en oktak im juon ri-bwebwe bwe en maroñ erom juon eo emãlõtlõt.
19 Mãlõtlõt an lal̦ in ej menin bwebwe ippãn Anij, bwe em̦õj je: “Ej kõtl̦o̦k bwe rimmãlõtlõt ro ren l̦orak ilo aujiid ko aer make.”
20 Bareinwõt, em̦õj je: “Jeova* ejel̦ã bwe l̦õmn̦ak ko an rimmãlõtlõt ro ejjel̦o̦k tokjãer.”
21 Kõn men in, ejjel̦o̦k en kõmjãje kõn men ko armej rej kõm̦m̦ani kõnke men otemjej rej ami,
22 meñe Paul ak Apollõs ak Sipas* ak lal̦ in ak mour ak mej ak men ko kiiõ ak men ko rej itok wõt, aolep men kein rej ami,
23 im kom̦ij an Christ im Christ ej an Anij.
Footnotes
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “juon wõt aer kõttõpar.”
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Lale “Jukjukun pãd” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ãt eo juon etan Piter.
