1 Korint 6:1-20
6 El̦aññe juon iaami ewõr an abn̦õn̦õ ippãn bar juon, etke kom̦ij jab etal ñan ippãn ro rekkwõjarjar ak kom̦ij etal ñan im̦õn ekajet ko bwe ro rejjab tõmak ren ekajete kom̦?
2 Ta kom̦ jaje ke bwe ro rekkwõjarjar renaaj ekajete lal̦ in? El̦aññe kom̦ eo kom̦ naaj ekajete lal̦ in, ta ejjel̦o̦k ami bar maroñ ñan ekajeti men kein edik tokjãer ke?
3 Kom̦ij jab jel̦ã ke bwe jenaaj bar ekajete enjel̦ ran̦? Innem etke jejjab maroñ ekajete men ko an mour in?
4 El̦aññe ewõr ami abn̦õn̦õ kõn men ko an mour in, etke kom̦ij ilo̦k ñan ippãn ro eklejia eo ej watõk er bwe rejjab ekkar ñan aer ekajete kom̦?
5 Ij kõnnaan rot in ñan kom̦ bwe kom̦win jook. Ta ejjel̦o̦k juon iaami emãlõtlõt ñan an maroñ ekajet ikõtaan jein im jatin ke?
6 Ijello̦kun men in, kom̦ij bõkl̦o̦k eo jeimi im jatimi ñan im̦õn ekajet bwe ro rejjab tõmak ren ekajete kom̦!
7 Ilo m̦ool, kom̦ij kõjorrããn kom̦ make ilo ami liaakel̦o̦k doon ñan im̦õn ekajet. Ta ejjab em̦m̦anl̦o̦k ñe kwaar kõtl̦o̦k aer bõd n̦ae eok ke? Im ta ejjab em̦m̦anl̦o̦k ñe kwaar kõtl̦o̦k aer ko̦o̦tte eok ke?
8 Ijello̦kun am̦ kõm̦m̦ane men in, kwõj kõm̦m̦an bõd im ko̦o̦tte eo jeim̦ im jatũm̦!
9 Ta kom̦ij jab jel̦ã ke bwe ro rejjab wãnõk reban jolõte Aelõñ eo an Anij?* Kom̦win jab m̦on̦e kom̦ make.* Ro ri-l̦õñ,* ri-kabuñ ñan ekjab, ri-lejãn,* em̦m̦aan ro rej kõtl̦o̦k an em̦m̦aan ro jet kõm̦m̦ani m̦anit ko rejekkar ñan er, em̦m̦aan ro rej babu ippãn em̦m̦aan,
10 ri-ko̦o̦t, ri-arõk, ri-kadek, ro elukkuun eddo im nana aer kõnnaan, im ri-kowadoñ reban jolõte Aelõñ eo an Anij.
11 Meñe kar ãindein jet iaami, bõtab em̦õj karreoik kom̦ im kokkwõjarjare kom̦. Em̦õj kõwãnõk kom̦ ilo etan Jesus Christ ad Irooj im kõn jetõb kwõjarjar* eo an Anij.
12 Emãlim ñan aõ kõm̦m̦ane aolep men, bõtab ejjab aolep men rem̦m̦an. Emãlim ñan aõ kõm̦m̦ane aolep men, bõtab iban kõtl̦o̦k bwe jabdewõt men en irooj ioõ.*
13 M̦õñã ej ñan lo̦je im lo̦je ej ñan m̦õñã, bõtab Anij enaaj kõm̦m̦an bwe aolep men kein ren jako. Ãnbwin ejjab juon men jej aikuj kõjerbale ñan l̦õñ,* bõtab jej aikuj kõjerbale ñan Irooj, im Irooj ej kabwe aikuj ko an ãnbwin.
14 Anij ear kõjerkakpejeik Irooj im enaaj bareinwõt kõjerkakpejeik kõj jãn mej kõn kajoor eo an.
15 Kom̦ij jab jel̦ã ke bwe ãnbwinnimi rej m̦õttan ãnbwinnin Christ? Innem kom̦ ro rej m̦õttan ãnbwinnin Christ, ta ij aikuj kobaikl̦o̦k kom̦ ñan ippãn juon kõrã ekijoñ ke? Ejjab ñan jidik!
16 Kom̦ij jab jel̦ã ke bwe ñe jabdewõt ej kobaikl̦o̦k e make ñan ippãn juon kõrã ekijoñ, erro naaj juon wõt ãnbwin? Anij ej ba, “Erro naaj juon wõt kanniõk.”
17 Bõtab jabdewõt eo ej kobal̦o̦k ippãn Irooj enaaj juon wõt ippãn ilo l̦õmn̦ak.*
18 Kom̦win ko jãn l̦õñ!* Aolep jerawiwi ko jet juon armej ej kõm̦m̦ani rejjab jelõt ãnbwinnin, bõtab jabdewõt eo ej l̦õñ ej jerawiwi n̦ae ãnbwinnin.
19 Kom̦ij jab jel̦ã ke bwe ãnbwinnimi ej tampel̦ eo an jetõb kwõjarjar,* eo ej pãd ippemi im kom̦ kar bõke jãn Anij? Bareinwõt, kom̦ij an Anij,
20 kõnke ear wiaik kom̦ kõn juon on̦ããn. Kõn men in, kom̦win kõjerbal ãnbwinnimi ñan kaiboojoj Anij.
Footnotes
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Ak emaroñ, “Kom̦win jab kõtl̦o̦k an ro jet m̦on̦e kom̦.”
^ Lale “L̦õñ” ilo Kõmel̦el̦e Ko.
^ Lejãn ej ñe juon eo em̦õj an m̦are ej babu ak pãd ippãn juon eo ejjab pãleen.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “tõl eõ.”
^ Naan eo ilo kajin Grik ej por·nei′a. Lale “L̦õñ” ilo Kõmel̦el̦e Ko.
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Naan eo ilo kajin Grik ej por·nei′a. Lale “L̦õñ” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
