1 Piter 3:1-22
3 Ilo ejja wãween in wõt, kom̦ lim̦aro, kom̦win kõttãik kom̦ ñan l̦õm̦aro pãleemi, kõnke el̦aññe rejjab pokake naan ko an Anij, ren maroñ reel kõn kõm̦m̦an ko ami meñe ejjel̦o̦k naan kom̦ij ba,
2 im kõn aer lo im kam̦ool an em̦m̦an* kõm̦m̦an ko ami im kõn ami lukkuun kwal̦o̦k kautiej.
3 Ami aiboojoj en jab jãn itulik, ikijjeen ami pirõk kool̦an bõrami im ami kõn̦ak nuknuk ko rekanooj em̦m̦an ak kein lõtlõt ko kõm̦m̦an jãn gold.
4 Bõtab ami aiboojoj en jãn itulowa ilo bũruomi, ilo ami kalõtlõt kom̦ kõn jitũbõn aenõm̦m̦an im ineem̦m̦an, ko reban jako im relukkuun aorõk im̦aan mejãn Anij.
5 Bwe eñin wãween an kar kõrã ro rekkwõjarjar ilo iien ko etto, ro rar likũt aer kõjatdikdik ilo Anij, kalõtlõt er make, ej ilo aer kar kõttãik er ñan l̦õm̦aro pãleer,
6 ãinwõt an kar Sera pokake Ebream, im ãñinñini irooj. Im kom̦ij ãinwõt ro nejin el̦aññe kom̦ij wõnm̦aanl̦o̦k wõt im kõm̦m̦an em̦m̦an im jab kõtl̦o̦k bwe mijak en anjo̦ ioomi.
7 Ilo ejja wãween in wõt, kom̦ l̦õm̦aro, kom̦win wõnm̦aanl̦o̦k wõt im mour ippãn lim̦aro pãleemi ilo lol̦o̦kjen̦.* Kom̦win kaorõk kõrã ro ãinwõt jãpe ko rem̦õjn̦o̦ bwe rein renaaj bar jolõt ippemi mour eo naaj lewaj ñan kom̦ ikijjeen jouj eo el̦ap, unin ej kõnke en ejjel̦o̦k menin bõbrae jar ko ami.
8 Ãliktata, kom̦win aolep bõrokuk ilo l̦õmn̦ak,* bũrom̦õj ippãn ro rej eñtaan, yokwe ro jeimi im jatimi, im kwal̦o̦k tũriam̦o im ettã bõro.
9 Kom̦win jab ukot nana kõn nana ak kõnanaik ro rej kõnanaik kom̦. Ijello̦kun ami ãindein, kom̦win ukotl̦o̦k kõn juon menin jeraam̦m̦an, kõnke kar kũr kom̦ ñan wãween mour in, bwe kom̦win maroñ jolõt jeraam̦m̦an.
10 Bwe “jabdewõt eo ekõn̦aan kaorõk mour im lo m̦õn̦õn̦õ, ej aikuj kõjparok loon jãn men ko renana im tien jãn an kõnono ilo etao.
11 En el̦l̦o̦k jãn men eo enana im en kõm̦m̦ane men eo em̦m̦an, en pukot aenõm̦m̦an im en kate bwe en wõr wõt aenõm̦m̦an.
12 Bwe mejãn Jeova* ej lale ro rewãnõk im lo̦jilñin ej roñjake jar in akwel̦ap ko aer, bõtab Jeova* ej n̦ae* ro rej kõm̦m̦ani men ko renana.”
13 Bwe wõn enaaj ko̦kkure kom̦ el̦aññe kom̦ij kijejeto kõn men eo em̦m̦an?
14 Meñe kom̦ maroñ eñtaan kõn wõt men ko rewãnõk, ak kom̦ij m̦õn̦õn̦õ wõt. Ijoke, kom̦win jab mijak men eo rej mijake,* im lõl̦ño̦ñ.
15 Ijoke ilo bũruomi, kom̦win kile Christ bwe ej Irooj im eokkwõjarjar, im kom̦win pojak iien otemjej ñan jojomare kom̦ make im̦aan aolep ro rej kajjitõk kõn unin kõjatdikdik eo ami, bõtab kom̦win kõm̦m̦ane men in ilo ineem̦m̦an im ilo ami lukkuun kwal̦o̦k kautiej.
16 Kom̦win dãpij wõt bõklõkõt eo ami em̦m̦an, kõnke jabdewõt men eo armej rej ba n̦ae kom̦, ren oktak im jook kõn wõt kõm̦m̦an ko ami rem̦m̦an ãinwõt ro rej ri-kal̦ooran Christ.
17 El̦aññe ej ankilaan Anij ñan kõtl̦o̦k bwe kom̦win eñtaan kõn ami kõm̦m̦an em̦m̦an, innem em̦m̦anl̦o̦k men in jãn ñe kom̦ij iioon eñtaan kõn ami kõm̦m̦ani men ko renana.
18 Bwe Christ, eo ewãnõk, ear mej juon wõt alen kõn jerawiwi ko an ro rejjab wãnõk, kõnke en maroñ tõl kom̦ ñan Anij. Kar kõm̦m̦an bwe en mej ilo kanniõk, bõtab kar kõmour e ilo jetõb.
19 Im ãinwõt juon jetõb, ear kwal̦o̦k naanin ekajet ko ñan enjel̦ ro rej pãd ilo kalbuuj,
20 ro rar jab pokake ilo iien eo Anij ear kijenmej im kõttar ilo raan ko an Noa ke kar jek wa eo me ear kõjparok jet wõt armej, mel̦el̦ein ralitõk armej, bwe ren el̦l̦ã jãn dãn eo.
21 Peptaij ej ekkejell̦o̦k ilo men in, im ej bareinwõt lo̦mo̦o̦ren kom̦ kiiõ ikijjeen jerkakpeje eo an Jesus Christ. Ijoke peptaij ejjab ñan jol̦o̦k men ko rettoon ilo kanniõk, ak ej ñan eoware Anij kõn juon bõklõkõt em̦m̦an.
22 Ear etal ñan lañ im ej pãd ituanbwijmaroñin pein Anij, im kar kõm̦m̦an bwe enjel̦ ro kab maroñ ko im kajoor ko ren kõttãik er ñane.
Footnotes
^ Kajin Grik, “erreo.”
^ Ak “kwal̦o̦k ami jel̦ã n̦ae er; mel̦el̦e kõn er.”
^ Ak “errã ippãn doon.”
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ak “mejãn Jeova ej n̦ae.”
^ Ak emaroñ, “kom̦win jab mijak naanin kamijak ko aer.”
