1 Piter 5:1-14
5 Kõn men in, ãinwõt juon eo ej jerbal ippemi im lale eklejia, eo ear loe im kam̦ool an kar Christ eñtaan, im eo enaaj bareinwõt bõk aiboojoj eo enaaj wal̦o̦k, ij kajjitõk ippãn* ro ibwiljimi im rej lale eklejia eo:
2 Kom̦win ãinwõt jabõt ro ñan bwij eo an Anij, eo ej pãd ium̦win maroñ eo ami, im kom̦win jerbal ãinwõt ri-loloodjake ro,* jab ilo m̦akoko ak en ilo ami m̦õn̦õn̦õ ãinwõt an Anij kõn̦aan, im en jab kõn ami kõn̦aan kappok jeraam̦m̦an ñan kom̦ make, ak en kõn ami lukkuun kõn̦aan jipañ,
3 im jab ilo ami irooj ioon armej ro rej an Anij, ak en ilo ami kõm̦m̦an joñak em̦m̦an ñan ro ilo bwij eo.
4 Innem ñe jabõt eo el̦ap enaaj wal̦o̦k, kom̦ naaj bõk kũrawũn in aiboojoj eo ejjãmin jako.
5 Ilo ejja wãween in wõt, kom̦ likao ro, kom̦win kõttãik kom̦ ñan em̦m̦aan ro rerũtto.* Ijoke kom̦ aolep kom̦win kwal̦o̦k* ettã bõro* ilo ami kõm̦m̦an ñan doon kõnke Anij ejjab m̦õn̦õn̦õ ippãn ro eutiej bũrueer, bõtab ej lel̦o̦k jouj eo el̦ap ñan ro ettã bũrueer.
6 Kõn men in, kom̦win kõttãik kom̦ ium̦win pein Anij ekajoor bwe en maroñ kautiej kom̦ ilo iien eo ejejjet,
7 im ilo ejja iien in wõt, kom̦win likũt ippãn aolepen men ko kom̦ij eddodo* kaki, kõnke ej kaorõk kom̦.
8 Kom̦win ekkõl im kõjparok wõt! Ri-kõjdat eo ami, Tepil̦ eo, ej etetal ãinwõt juon l̦aiõn ekajoor ainikien im ej pukote* eo emaroñ kañe.
9 Bõtab kom̦win jutak pen im jum̦ae e, im tõmak eo ami en pen, kõnke kom̦ jel̦ã bwe erkein ejja men ko wõt ro jeimi im jatimi* ipel̦aakin lal̦ in rej eñtaan kaki.
10 Ijoke ãlikin ami eñtaan ium̦win jidik wõt iien, Anij, eo eobrak kõn jouj eo el̦ap, eo ear kũr kom̦ ñan aiboojoj eo ej ñan indeeo kõn ami juon wõt ippãn Christ, enaaj kadedeikl̦o̦k an katakin im kammineneik kom̦. Enaaj kõm̦m̦an bwe kom̦win kajoor im tiljek, im enaaj kõm̦m̦an bwe kom̦win tõt im pen.
11 Kajoor ej an ñan indeeo. Amen.
12 Iar jejewaj ñan kom̦ juon lõta ejjab kanooj aetok ikijjeen Silvenõs,* eo ij watõke juon jeid im jatid etiljek, bwe in maroñ rõjañ kom̦ im lukkuun kam̦ool ñan kom̦ bwe eñin ej jouj eo el̦ap an Anij em̦ool, im kom̦win dãpiji wõt.
13 Kõrã* eo ilo Babil̦on, eo em̦õj kããlõte ãinwõt kom̦, ej jilkinwaj an naanin yokyokwe, ekoba Mark l̦eo nejũ.
14 Kom̦win yokyokwe doon kõn mejenma ñan kwal̦o̦k ami yokwe.
Aenõm̦m̦an ñan kom̦ aolep ro rej juon wõt ippãn Christ.
Footnotes
^ Ak “rõjañ.”
^ Ak “kom̦win kanooj lale.”
^ Ak “em̦m̦aan ro rej lale eklejia.”
^ Ak “kõn̦ak.”
^ Ak “bõk l̦õmn̦ak ko rettã.”
^ Ak “inepata.”
^ Ak “lale wõn.”
^ Kajin Grik, “aolep ro m̦õttami ilo tõmak.”
^ Ãt eo juon etan Sailas.
^ Naanin Grik eo ej jitõñl̦o̦k ñan juon kõrã, bõtab ej kõkkar kõn eklejia eo ilo Babil̦on.
