1 Tessalonika 5:1-28
5 Kiiõ ro jeim im jatim, ikijjeen tõre ko im raan ko em̦õj karõki, kom̦ij jab aikuji ammim jejewaj kaki.
2 Bwe kom̦ kanooj jel̦ã bwe raan eo an Jeova* enaaj itok ãinwõt juon ri-ko̦o̦t ilo boñ.
3 Ilo iien eo renaaj ba, “Aenõm̦m̦an im jokwane!” innem ilo idiñ, ko̦kkure eo el̦ap enaaj itok ioer ãinwõt metak eo ej wal̦o̦k ñan juon kõrã ebõro̦ro, im rejjãmin deor jãne.
4 Ak kom̦ ro jeim im jatim, kom̦ij jab pãd ilo marok, innem raan eo eban itok ioomi ilo jidimkij ãinwõt an raan itok ioon ro ri-ko̦o̦t ilo idiñ,
5 bwe kom̦ aolep kom̦ij nejin meram im nejin raan. Jejjab an boñ im jejjab an marok.
6 Kõn men in, jen jab kiki ãinwõt ro jet, bõtab jen ruj wõt im ekkõl wõt.
7 Kõnke ro rej kiki rej kiki ilo boñ, im ro rej kadek, rej kadek ilo boñ.
8 Bõtab kõj ro jej an meram, jen ekkõl wõt im kõn̦ak tõmak ãinwõt juon penjãn ob, bareinwõt kõn̦ak yokwe kab kõjatdikdik eo kõn lo̦mo̦o̦r ãinwõt juon el̦mõt
9 kõnke Anij ear jab kããlõt kõj ñan jelm̦ae illu eo an, ak bwe jen bõk lo̦mo̦o̦r ikijjeen Irooj Jesus Christ,
10 eo ear mej kõn kõj bwe jen maroñ mour ippãn, meñe jej ruj wõt ak meñe jej kiki.*
11 Kõn men in, kom̦win wõnm̦aanl̦o̦k wõt im kõkajoor* doon im kõketak doon, ãinwõt ami kõm̦m̦ane.
12 Kiiõ, kõmij kajjitõk ippemi ro jeim im jatim bwe kom̦win kwal̦o̦k kautiej ñan ro rej lukkuun kate er jerbal ippemi im rej tõl kom̦ ilo Irooj im rej kakapilõk kom̦;
13 im kom̦win kanooj l̦õmn̦ak kõn er ilo yokwe kõn jerbal ko aer. Kom̦win dãpij wõt ami aenõm̦m̦an ippãn doon.
14 Bareinwõt, kõmij akwel̦ap ñan kom̦ ro jeim im jatim bwe kom̦win kakkõl* ro ejjab jim̦we wãween aer mour, kaenõm̦m̦an ro rebũrom̦õj,* jipañ ro rem̦õjn̦o̦, im meanwõd ñan aolep armej.
15 Kom̦win lale bwe en ejjel̦o̦k ej n̦aon̦ããn nana kõn nana ñan jabdewõt, bõtab aolep iien kom̦win lukkuun kate kom̦ kõm̦m̦an em̦m̦an ñan doon im ñan aolep armej ro jet.
16 Kom̦win lañlõñ iien otemjej.
17 Kom̦win ekkeini ami jar.
18 Kwal̦o̦k kam̦m̦oolol kõn men otemjej. Eñin ej kõn̦aan eo an Anij ñan kom̦ ro rej ri-kal̦ooran Christ Jesus.
19 Kom̦win jab kune urur in jetõb kwõjarjar.*
20 Kom̦win jab kajejtokjãn kanaan ko.
21 Kom̦win kanooj etale men otemjej; im lukkuun dãpij wõt men ko rem̦m̦an.
22 Kõjparok kom̦ jãn jabdewõt wãween ko renana.
23 Anij in aenõm̦m̦an en lukkuun kokkwõjarjare kom̦. Im kom̦ ro jeim im jatim, ãnbwinnimi, l̦õmn̦ak* ko ami, im ami mour ren erreo ilo men otemjej im jab lippijinjin ilo iien eo Jesus Christ ad Irooj enaaj pãd.
24 Eo ej kũr kom̦ etiljek, im enaaj kõm̦m̦ane men kein ñan kom̦.
25 Ro jeim im jatim, kom̦win jar wõt kõn kõm.
26 Kom̦win yokyokwe aolep ro jeid im jatid kõn mejenma eokkwõjarjar.
27 Ij lewaj eddo in ñan kom̦ ilo etan Irooj bwe kom̦win riiti lõta in ñan aolep ro jeid im jatid.
28 Jouj eo el̦ap an ad Irooj Jesus Christ en pãd ippemi.
Footnotes
^ Lale “Jeova” ilo Kõmel̦el̦e Ko.
^ Ak “kiki ilo mej.”
^ Ak “kaenõm̦m̦an.”
^ Ak “kauweik.”
^ Ak “ro rej ebbeer.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
