1 Timote 3:1-16
3 Naan kein jemaroñ lõke bwe rem̦ool: El̦aññe juon em̦m̦aan ej kate e ñan bõk eddo eo ñan lale eklejia, alikkar bwe ej kõn̦aan kõm̦m̦ani jerbal ko rem̦m̦an.
2 Kõn men in, juon eo ej lale eklejia ej aikuj juon eo ejjel̦o̦k n̦otaan, juon wõt pãleen, juon eo ejel̦ã kõm̦m̦an joñan ilo men otemjej, juon eo elol̦o̦kjen̦,* ejim̦we wãween an mour, ejel̦ã lale armej,* im juon eo ekkar ñan an katakin,
3 en jab juon ri-kadek, en jab juon eo elãj,* bõtab en juon ri-mel̦el̦e, im en jab juon ri-akwããl, im juon eo ej arõk* jããn,
4 en juon eo em̦m̦an an lale* ro ilo m̦weo im̦õn, im ro nejin ren jel̦ã pokake im en em̦m̦an m̦wilier,
5 (bwe el̦aññe jabdewõt em̦m̦aan ejaje lale* ro ilo m̦weo im̦õn, innem ekõjkan an maroñ lale eklejia eo an Anij?),
6 en jab juon eo ekããltok ñan tõmak, kõnke emaroñ kõm̦m̦an an utiej bũruon im kõm̦m̦an an del̦o̦ñ ilo ekajet eo em̦õj lel̦o̦k ñan Tepil̦ eo.
7 Bareinwõt, ej aikuj juon eo em̦m̦an etan ippãn ro ilikin, kõnke armej ren jab kõnanaiki* im en jab l̦orak ilo aujiid an Tepil̦ eo.
8 Rijjipañ ro ilo eklejia rej aikuj bar jet ro rerũtto ilo l̦õmn̦ak, ren jab jet ro reriab,* im ren jab jet ro em̦m̦an ippãer idaak wain el̦e jãn joñan, im jab jet ro rej arõk ñan koorl̦o̦k men ko ippãer,
9 im ren dãpij wõt men eo ettino im eokkwõjarjar, eo ej kõn tõmak, ekoba juon bõklõkõt erreo.
10 Bareinwõt, etale m̦okta ñe rein rekkar* ñan bõk jerbalin rijjipañ, im ñe ejjel̦o̦k n̦otaer, ren bõk jerbal in.
11 Kõrã ro rej aikuj bareinwõt rũtto ilo l̦õmn̦ak, ren jab ri-ruruwe, ren jel̦ã kõm̦m̦an joñan ilo men otemjej, im ren tiljek ilo jabdewõt wãween.
12 Juon eo ej rijjipañ ilo eklejia ej aikuj juon wõt pãleen, ej aikuj em̦m̦an an lale ro nejin im ro ilo m̦weo im̦õn.
13 Juon em̦m̦aan eo em̦m̦an an kõm̦m̦ani eddo ko an, ej kõm̦m̦an bwe en em̦m̦an ãt eo etan im bwe en peran in kõnono kõn tõmak eo ilo Christ Jesus.
14 Ij jejewaj kõn men kein ñan eok meñe ejjabto jãn kiiõ ij l̦õmn̦ak in iwõj ñan ippam̦,
15 kõnke ñe il̦okwan rum̦wij waj, kwõn jel̦ã kadede wãween am̦ aikuj kõm̦m̦an ilo m̦weo im̦õn Anij, ak eklejia eo an Anij eo emour me ej jurõn m̦ool eo im ej jurake m̦ool eo.
16 Ilo m̦ool, men in ettino im eokkwõjarjar ikijjeen tiljek ñan Anij, ekanooj aorõk: ‘Kar kõm̦m̦an bwe en wal̦o̦k ilo kanniõk, kar kõwãnõk e ilo jetõb, ear wal̦o̦kl̦o̦k ñan enjel̦ ro, kar kwal̦o̦k kake e ibwiljin ri-aelõñ ko, lal̦ ear likũt an tõmak ilo e, kar bõke ñan lañ im kaiboojoje.’
Footnotes
^ Ak “ejel̦ãl̦o̦kjen̦; emãlõtlõt. ”
^ Ak “ejel̦ã karwainene.”
^ Ak “juon eo ej kõjorrããn ro jet.”
^ Kajin Grik, “yokwe.”
^ Ak “bõk eddon.”
^ Ak “bõk eddon.”
^ Ak “en jab bõktok menin kajjookok.”
^ Ak “etao aer kõnnaan.”
^ Ak “rejejjet.”
