1 Timote 6:1-21
6 Ro rej pãd ilo kõm̦akoko ren lukkuun kautiej karo ro aer, kõnke armej ren jab kõnanaik etan Anij im katak ko.
2 Bareinwõt, ro ri-kõm̦akoko ren jab kõjekdo̦o̦n karo ro aer me rej rũttõmak kõnke rej jeier im jatier ilo tõmak. Bõtab ren kal̦apl̦o̦k aer kate er jerbal ñan er, kõnke ro rej bõk tokjãn jãn jerbal ko aer rem̦m̦an rej rũttõmak im rejitõnbõro ippãd.
Wõnm̦aanl̦o̦k wõt im katakin er kõn men kein im lel̦o̦k naanin rõjañ kein.
3 El̦aññe jabdewõt armej ej kwal̦o̦k kõn bar juon katak im ejjab errã ilo naanin tõl eo ejim̦we,* eo ej jãn ad Irooj Jesus Christ, im ejjab errã ilo katak eo kõn ad aikuj karejar ñan Anij ilo tiljek,
4 armej in eutiej bũruon im ejjel̦o̦k men en̦ emel̦el̦e kake. Em̦m̦an wõt ippãn* akwããl im kõbo̦uwe kõn naan. Im jãn men kein, ewal̦o̦k ebbanban, poktak, ruruwe,* l̦õmn̦ak nanaik doon,
5 aitwerõk ko remmakijkij kõn men dikdik ko me armej ro enana l̦õmn̦ak ko aer im ejako aer jel̦ã kõn m̦ool eo rej bũklõñtak, im rein rej l̦õmn̦ak bwe aer tiljek ñan Anij ej kein kõm̦m̦an bwe en l̦apl̦o̦k aer bõk jeraam̦m̦an.
6 Ilo m̦ool, ewõr jeraam̦m̦an ko rel̦l̦ap juon ej bũki ñe ej tiljek ñan Anij, ekoba an jokwane kõn men ko ewõr ippãn.
7 Bwe ejjel̦o̦k men en̦ jaar bõktok ñan lal̦ in, im ejjel̦o̦k men en̦ jenaaj bõke jãne.
8 Kõn men in, ñe ewõr kijed im ballid,* innem jen jokwane kaki.
9 Bõtab ro rej kate er bwe ren m̦weiie, rebuñ ilo kapo im aujiid, bareinwõt ilo kõn̦aan ko rebwebwe im remenin ko̦kkure me rej tõll̦o̦k ñan jorrããn im mej.
10 Arõk* jããn ej okran nana otemjej. Ewõr rar ejaak eñjake in arõk jããn, im rar jebwãbwe jãn tõmak im wie er make kõn elõñ men ko rekabũrom̦õjm̦õj.
11 Ijoke, kwe, O armej in Anij, kwõn ko jãn men kein. Kwõn kate eok kõttõpar wãnõk, tiljek ñan Anij, tõmak, yokwe, kijenmej, im ineem̦m̦an.
12 Kwõn kate eok bait kõn tõmak eo; kwõn dãpij wõt mour eo ej ñan indeeo, eo kar kũr eok ñane im kwaar kwal̦o̦k kake im̦aan mejãn elõñ armej.
13 Ij jiroñ eok im̦aan mejãn Anij, eo ej kõm̦m̦an bwe men otemjej ren mour wõt, im im̦aan mejãn Christ Jesus, eo ear kwal̦o̦k naan ilo juon wãween ekanooj em̦m̦an im̦aan mejãn Pontiõs Pail̦at,
14 bwe kwõn pokake naanin jiroñ ko ilo juon wãween ejjel̦o̦k likjab ie ñan jidik im ejjel̦o̦k n̦otaam̦ ie, m̦ae iien enaaj wal̦o̦k ad Irooj Jesus Christ,
15 eo em̦õn̦õn̦õ im ej juon Irooj eo Ekajoor im enaaj wal̦o̦k ilo iien eo em̦õj karõke. Ej Kiiñ eo an kiiñ ro rej tõl im Irooj eo an irooj ro rej tõl,
16 im e wõt ejjãmin mej, ej pãd ilo juon meram ejjel̦o̦k emaroñ kepaake, eo ejjañin kar wõr armej en̦ enañin loe ak emaroñ loe. Nõbar im kajoor eo ej ñan indeeo ren ilo̦k ñane. Amen.
17 Kwõn jiroñl̦o̦k* ro ri-m̦weiie ilo jukjukun pãd* in bwe ren jab jãjjãj,* im ren jab likũt aer kõjatdikdik ioon m̦weiuk ko em̦õkaj aer jako, bõtab ren likũt aer kõjatdikdik ioon Anij, eo ej kanooj in wũjleptok ñan kõj aolep men ko jej m̦õn̦õn̦õ kaki.
18 Kwõn jiroñ er bwe ren kõm̦m̦an em̦m̦an, im bwe ren m̦weiie kõn jerbal ko rem̦m̦an, ren jouj,* im pojakin jipañ ro jet,
19 im ren kõpooj juon pedped ekanooj em̦m̦an ñan er, ãinwõt juon m̦weiuk eaorõk, ñan raan ko rej pãd im̦aan, kõnke ren maroñ dãpij wõt mour eo em̦ool.
20 Timote, kwõn kõjparok men eo em̦õj kappeik eok kake, kõjparok eok jãn kõnono ko rewaan im rej kõjekdo̦o̦n men eo eokkwõjarjar, im jãn men ko reriab im rej jum̦ae doon me armej rej watõki “jel̦ãl̦o̦kjen̦.”
21 Jet rar kõmjãje kõn jel̦ãl̦o̦kjen̦ in, im rar oktak im el̦l̦o̦k jãn tõmak.
Jouj eo el̦ap en pãd ippemi.
Footnotes
^ Ak “em̦m̦an; ewõr tokjãn.”
^ Ak “eitoklimoen wõt kõn men ko renana ãinwõt.”
^ Ak “naan ko relukkuun eddo.”
^ Ak “jikin jokwe.” Kajin Grik, “kein kalbubu.”
^ Kajin Grik, “Yokwe.”
^ Ak “kakien.”
^ Lale “Jukjukun pãd” ilo Kõmel̦el̦e Ko.
^ Ak “utiej bũrueer.”
^ Ak “m̦õn̦õn̦õ in lel̦o̦k.”
