2 Korint 4:1-18
4 Kõn men in, kõnke kar letok jerbal in ikijjeen tũriam̦o eo kar kwal̦o̦k ñan kõm, kõmij jab ebbeer.
2 Kõm diki men ko rekajjookok im rettino, im kõmij jab m̦on̦e armej ak kabodãne naanin Anij. Bõtab ilo ammim kõm̦m̦an bwe m̦ool eo en alikkar, kõmij kaalikkar ñan bõklõkõt ko an armej otemjej im̦aan mejãn Anij bwe kõmij kõm̦m̦ane men eo ejim̦we.
3 Ilo m̦ool, el̦aññe ennaan eo em̦m̦an kõmij kwal̦o̦ke elibobo, eokwe elibobo ñan ro renaaj jako,
4 ro rejjab rũttõmak me anij eo an jukjukun pãd* in ear tõlpilouk er bwe meram eo jãn ennaan eo em̦m̦an me eaiboojoj kõn Christ, eo ej nemãmeen wõt Anij, en jab rome er.
5 Kõmij jab kwal̦o̦k naan kõn kõm make, bõtab kõmij kwal̦o̦k bwe Jesus Christ ej Irooj im bwe kõmij ami ri-kõm̦akoko kõn wõt Jesus.
6 Bwe Anij eo ear ba: “Meram en romaak jãn ijo emarok,” im kõn turin mejãn Christ, Anij ear rome bũruod bwe en meram kõn aiboojojin jel̦ãl̦o̦kjen̦ eo an.
7 Ijoke, meñe kõmij ãinwõt jãpe kõm̦m̦an jãn kũl̦e,* ewõr juon m̦weiuk eaorõk ippem. Men in ej lukkuun kaalikkar bwe kajoor eo ippem im el̦ap jãn joñan, ejjab itok jãn kõm make ak ej itok jãn Anij.
8 Meñe apañ ko rej jiped kõm ilo men otemjej, ejjab mel̦el̦ein bwe kõmij jab maroñ m̦akũtkũt ñan jidik, im meñe kõm lukkuun jaje kõmin et, ejjab mel̦el̦ein bwe ejjel̦o̦k ial̦an am joor ñan jidik.*
9 Rej kaeñtaan kõm, bõtab kõmij jab jool, rej ko̦kkure* kõm, bõtab kõmij jab jorrããn.
10 Aolep iien kõmij iioon men ko rekauwõtata ãinwõt kar Jesus, im kõmij lukkuun kijenmej kõnke mour eo an Jesus en bar alikkar ilo kõm.*
11 Kõm ro kõmij mour, aolep iien kõmij jelm̦ae mej kõn wõt Jesus, kõnke mour eo an Jesus en bar alikkar ilo kõm.*
12 Kõn men in, mej ej jerbal ilo kõm, bõtab ñan kom̦, mour.
13 Kõnke tõmak eo ad ejjel̦o̦k oktak jãn men eo kar je im ba: “Ij kwal̦o̦k aõ tõmak, eñin unin ij kõnnaan”, kõj bareinwõt jej kwal̦o̦k ad tõmak im eñin unin jej kõnnaan,
14 kõnke jejel̦ã bwe Eo ear kõjerkakpeje Jesus enaaj bar kõjerkakpeje kõj ãinwõt kar Jesus, im enaaj bõkl̦o̦k kõm im kom̦ ñan im̦aan mejãn Jesus.
15 Aolep men kein rej ñan kom̦ bwe en lõñl̦o̦k wõt armej rej bõk jouj eo el̦ap an Anij kõnke elõñl̦o̦k wõt rej kam̦m̦oolole. Ilo aer kõm̦m̦ane men in, rej kaiboojoj Anij.
16 Kõn men in, jejjab ebbeer kõnke jekdo̦o̦n ñe ãnbwin eo itulik ej m̦õjn̦o̦l̦o̦k, bõtab itulowa ej kããll̦o̦k wõt jãn raan ñan raan.
17 Meñe jej iioon eñtaan* ko remera im rej ñan jidik wõt iien, bõtab renaaj bõktok ñan kõj juon aiboojoj eo ekanooj l̦ap* im ej ñan indeeo.
18 Jej kalimjek wõt men ko jejjab maroñ loi kõn mejãd, im jab men ko jemaroñ loi, kõnke men ko jej loi rej ñan jidik wõt iien, bõtab men ko jejjab loi rej ñan indeeo.
Footnotes
^ Lale “Jukjukun pãd” ilo Kõmel̦el̦e Ko.
^ Ak “bwidej.”
^ Ak emaroñ, “ejjel̦o̦k am kõjatdikdik.”
^ Kajin Grik, “jolal̦l̦o̦k.”
^ Kajin Grik, “ilo ãnbwinnim.”
^ Kajin Grik, “ilo kanniõkim me emaroñ mej.”
^ Ak “mãlejjoñ.”
^ Kajin Grik, “eddo.”
