2 Korint 9:1-15
9 Ak kiiõ, ikijjeen jerbal eo ñan jipañ ro rekkwõjarjar, ejjab menin aikuj bwe in jejewaj ñan kom̦ kake,
2 kõnke ijel̦ã kadede bwe kom̦ m̦õn̦õn̦õ in jipañ. Eñin men eo ij kõmjãje kake ñan ri-Masedonia ro im ij ba ñan er bwe juon de iiõ in an ro ilo Akeia pojakin jipañ, im kijejeto in ami em̦õj an kõm̦akũt enañin aolepeer.
3 Innem kiiõ ij jilkinwaj rein jeid im jatid bwe am kõmjãje kõn kom̦ ilo wãween in en jab jejtokjãn, im bareinwõt bwe kom̦win lukkuun pojakin jipañ, ãinwõt aõ ba ñan er bwe kom̦ naaj pojak.
4 Kõnke el̦aññe ri-Masedonia ro rej iwõj ippa waj im lo bwe kom̦ij jab pojak, kõm naaj jook kõn ammim kar kõjatdikdik kõn kom̦, im kom̦ naaj bareinwõt jook.
5 Kõn men in, iar l̦õmn̦ak ej menin aikuj bwe in rõjañ ro jeid im jatid bwe ren m̦õkaj waj im̦aan im kõpooji menin lel̦o̦k eo kom̦ kar kallim̦ur kake. Ilo wãween in, enaaj pojak kadede ãinwõt juon menin lel̦o̦k ilo m̦õn̦õn̦õ, im ejjab juon men eo rar iuuni kom̦ ñan ami kõm̦m̦ane.
6 Ak ikijjeen men eo iar ba m̦oktal̦o̦k, jabdewõt eo edik an jeor enaaj bar dik an m̦adm̦õd, im jabdewõt eo el̦ap an jeor enaaj bar l̦ap an m̦adm̦õd.
7 Innem kajjojo armej en lel̦o̦k joñan eo ear pepe kake ilo bũruon, en jab ilo m̦akoko* ak kõn an ro jet iuuni, kõnke Anij ej yokwe ro rej lel̦o̦k ilo m̦õn̦õn̦õ.
8 Bareinwõt, Anij emaroñ lewaj ñan kom̦ jouj eo an el̦ap ilo juon joñan el̦ap bwe kom̦win maroñ jel̦ã kabwe aikuj ko ami make ilo men otemjej, im bwe en lõñ men ko ippemi ñan ami maroñ kõm̦m̦ani aolep jerbal ko rem̦m̦an.
9 (Ãinwõt an Jeje ko ba: “Ear ajej elõñ menin lel̦o̦k ko;* ear lel̦o̦k ñan ro rejeram̦õl. An wãnõk ej wõnm̦aanl̦o̦k wõt ñan indeeo.”
10 Innem Eo el̦ap an lel̦o̦k ine ñan ri-jeor eo im pilawã ñan m̦õñã, enaaj lewaj im kallõñlõñ waj ine bwe kom̦win jeori, im enaaj kõm̦m̦an bwe en lukkuun l̦ap ami m̦adm̦õd jãn jerbal ko ami rewãnõk.)
11 Kom̦ jeraam̦m̦an ilo men otemjej bwe kom̦win maroñ jipañ ro jet ilo jabdewõt wãween, im armej renaaj kam̦m̦oolol Anij kõn menin lel̦o̦k eo ami kõm naaj lel̦o̦k ñan ro jet;
12 kõnke jerbal in ñan jipañ ro jet ejjab kabwe wõt aikuj ko an ro rekkwõjarjar, bõtab ej bar kõm̦m̦an bwe elõñ armej ren kwal̦o̦k aer kam̦m̦oolol Anij.
13 Kom̦ij kaalikkar kain armej rot kom̦ ikijjeen jerbal in ñan jipañ ro rej pãd ilo aikuj, im renaaj kaiboojoj Anij kõn ami l̦oore ennaan eo em̦m̦an kõn Christ me kom̦ij kwal̦o̦k kake, im kõn menin lel̦o̦k ko ami rel̦l̦ap ñan er im ñan aolep.
14 Im renaaj kanooj akwel̦ap im jar kõn kom̦ im kwal̦o̦k aer yokwe kom̦ kõnke jouj eo elukkuun l̦ap an Anij ej pãd ippemi.
15 Jen kam̦m̦oolol Anij kõn menin letok in an ejjel̦o̦k on̦ããn im el̦ap jãn maroñ ba.
