2 Piter 1:1-21
1 Jãn Saimõn Piter, juon ri-karejar im rijjilõk an Jesus Christ, ñan ro rar bõk tõmak eo el̦ap an aorõk me ebar wõr ippem* kõn wõt wãnõk eo an Anij eo ad im ri-Lo̦mo̦o̦r Jesus Christ:
2 En l̦apl̦o̦k ami bõk jouj eo el̦ap im aenõm̦m̦an ikijjeen jel̦ãl̦o̦kjen̦ eo ejim̦we kõn Anij im adwõj Irooj Jesus,
3 bwe kajoor eo an Anij ear letok ñan kõj* men otemjej rej jipañ kõj bwe jen mour im tiljek ñane, ikijjeen jel̦ãl̦o̦kjen̦ eo ejim̦we kõn Eo ear kũr kõj, itok wõt jãn aiboojoj eo an make im kõn an kanooj em̦m̦an.
4 Itok wõt jãn men kein, ear letok* ñan kõj kallim̦ur ko raorõk im rekanooj em̦m̦an, kõnke ikijjeen men kein kom̦win maroñ bar bõk aiboojoj eo an Anij ãinwõt ro ilo jetõb im rar rõl̦o̦k jãn jerbal ko renana an lal̦ in, ko rej wal̦o̦ktok jãn kõn̦aan ko renana.*
5 Kõn wõt men in, kom̦win kate kom̦ kõn aolepen ami maroñ ñan kobaik ippãn tõmak eo ami kõm̦m̦an ko rem̦m̦an, im ñan kõm̦m̦an ko ami rem̦m̦an, jel̦ãl̦o̦kjen̦,
6 im ñan jel̦ãl̦o̦kjen̦ eo ami, maroñ eo ñan irooj ioomi make. Im kom̦win kobaikwaj ippãn maroñ in ami kijenmej, im ñan kijenmej eo ami, tiljek ñan Anij,
7 im ñan tiljek eo ami ñan Anij, yokwe jemjein jemjati, im ñan yokwe eo ami ñan jemjein jemjati, yokwe eo ej ñan aolep.
8 Bwe el̦aññe ewõr men kein ippemi im rej l̦apl̦o̦k wõt, renaaj kõjparok kom̦ jãn ami jãniknik ak jãn an ejjel̦o̦k wõnm̦aanl̦o̦k* ko ippemi kõn jel̦ãl̦o̦kjen̦ eo ejim̦we kõn ad Irooj Jesus Christ.
9 Bõtab jabdewõt eo ej likjab ilo men kein, epilo im ej kiil mejãn jãn meram eo,* im em̦õj an oktak im mel̦o̦kl̦o̦k bwe em̦õj karreoiki jãn jerawiwi ko an kar m̦okta.
10 Kõn men in, ro jeiũ im jatũ, en l̦apl̦o̦k wõt ami lukkuun kate kom̦ bwe kom̦win dãpij wõt jeraam̦m̦an eo ami ke kar kũr im kããlõt kom̦, bwe el̦aññe kom̦ij wõnm̦aanl̦o̦k wõt im kõm̦m̦ani men kein, kom̦ jãmin buñ jãn tõmak.
11 Ilo m̦ool, wãween in enaaj kõm̦m̦an bwe en l̦ap aiboojoj eo naaj lewaj* ñan kom̦ ilo ami naaj del̦o̦ñe Aelõñ* eo ej ñan indeeo an ad Irooj im ri-Lo̦mo̦o̦r Jesus Christ.
12 Eñin unin ij pojak aolep iien in kakeememej kom̦ kõn men kein, meñe em̦õj ami jel̦ã kaki im kom̦ij pen ilo m̦ool eo kom̦ij katak im jel̦ã kake.
13 Im toon wõt aõ pãd ilo im̦õn kõppãd* in, ij watõk bwe ej juon men ejim̦we bwe in lujur kom̦ ilo aõ kakeememej kom̦.
14 Ij kõm̦m̦ane men in kõnke ijel̦ã bwe m̦õttan jidik naaj kõm̦akũt im̦õn kõppãd in aõ, ãinwõt an kar ad Irooj Jesus Christ bareinwõt kaalikkartok ñan eõ.
15 Aolep iien inaaj lukkuun kate eõ kõnke kom̦win maroñ make keememej* men kein ãlikin aõ naaj ilo̦k.
16 Ke kõmar kwal̦o̦k ñan kom̦ kõn kajoor eo an ad Irooj Jesus Christ im kõn an naaj pãd, kõmar jab anõke bwebwenato ko reriab an armej, kõnke kõmar lukkuun loe aiboojoj eo an.
17 Ear bõk jãn Anij Jemãdwõj ilañ nõbar im aiboojoj. Men in ear wal̦o̦k ke eo ej wũnjãn aiboojoj el̦ap ear kwal̦o̦k naan kein* ñane im ba: “Eñin Nejũ, eo ejitõnbõro ippa, im ebuñbũruõ kake.”
18 Kõmar lukkuun roñ an naan kein wal̦o̦ktok jãn lañ ilo iien eo kõmar pãd ippãn ilo tol̦ eo eokkwõjarjar.
19 Eñin unin el̦apl̦o̦k am lõke kanaan ko, im ekanooj in em̦m̦an bwe kom̦ij lukkuun lali men kein im rej ãinwõt juon l̦aam̦ eo ej romaak ilo juon jikin emarok (m̦ae iien ejoraantak im iju in raan ej tak) ilo bũruomi.
20 Bwe men eo el̦aptata ami jel̦ã ej eñin, ejjel̦o̦k kanaan ilo Jeje ko rar wal̦o̦ktok jãn l̦õmn̦ak ko an armej make.
21 Bwe kanaan ko rar jab wal̦o̦ktok jãn ankilaan armej, bõtab armej rar kõnono men ko rar wal̦o̦ktok jãn Anij ilo an kar jetõb kwõjarjar* kõm̦akũt* er.
Footnotes
^ Ak “tõmak eo me ej juon jeraam̦m̦an im ej joñan wõt jeraam̦m̦an eo ippem.”
^ Ak “letok ilo ejjel̦o̦k on̦ããn.”
^ Ak “letok ilo ejjel̦o̦k on̦ããn.”
^ Ak “m̦õm̦ ko rekajoor.”
^ Ak “ejjel̦o̦k tõprak.”
^ Ak emaroñ, “epilo, ej lo wõt men ko repaak.”
^ Ak “wũjlepwaj.”
^ Ak “Kien.” Lale “Aelõñ eo an Anij” ilo Kõmel̦el̦e Ko.
^ Ak “em̦ nuknuk,” mel̦el̦ein, ãnbwinnin ilo kanniõk.
^ Ak “naaj make kakeememej kom̦ kake.”
^ Kajin Grik, “juon ainikien.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Kajin Grik, “ineeke; tõl.”
