2 Piter 2:1-22
2 Ijoke ear bar wõr ri-kanaan ro reriab ibwiljin armej ro, ãindein enaaj bareinwõt wõr ri-kaki ro reriab ibwiljimi. Ilo ittino, rein renaaj kõm̦m̦an bwe en wõr jepel im men in enaaj bõktok jorrããn ñan kom̦, joñan renaaj bareinwõt kõjoole karo eo ear wiaik er, im rej make bõktok ilo m̦õkaj jorrããn eo enaaj buñut er.
2 Bareinwõt, elõñ renaaj anõke er ilo aer peran in kõm̦m̦ani men ko renana,* im kõn wõt rein, naaj kõnono n̦ae ial̦ eo em̦ool.
3 Im kõn aer arõk, renaaj kwal̦o̦k naan ko reriab ñan ko̦kkure kom̦. Bõtab iien ekajet eo aer, eo em̦õj pepe kake jãn etto, ejjab rum̦wij an itok, im ej lukkuun itok wõt iien eo naaj ko̦kkure er.
4 Em̦ool bwe Anij ear jab jenliklik jãn an kaje enjel̦ ro rar jerawiwi, ak ear jol̦o̦k er ilo Tartarus* im liãpe er kõn jeen* ilo marok jilõñlõñ, im rej pãd im kõttar ekajet eo aer.
5 Bareinwõt, ear jab jenliklik jãn an kaje lal̦ eo etto, ijoke ear kõjparok Noa, eo ej juon ri-kwal̦o̦k naan kõn wãnõk, ekoba bar jimjuon armej ilo iien eo ear bõktok juon ibwijleplep ioon lal̦ eo ear obrak kõn armej ro rej jum̦ae Anij.
6 Ear bareinwõt kaje Sodom im Gomorra ilo an kar tũli m̦ae iien rar oktak im melkwaarar. Ear likũt men in bwe en juon waanjoñak kõn men ko rej pojakin wal̦o̦k ñan ro rej jum̦ae Anij.
7 Im ear lo̦mo̦o̦rene Lot, eo ej juon ri-wãnõk, im eo ear lukkuun inepata kõn an armej ro renana peran in kõm̦m̦ani men ko renana*—
8 em̦m̦aan in ewãnõk ear lukkuun eñtaan jãn raan ñan raan kõn kõm̦m̦an ko renana ear loi im roñ ke ear mour ibwiljin armej rein.
9 Innem, Jeova* ejel̦ã kilen lo̦mo̦o̦rene armej ro rej tiljek ñane ium̦win mãlejjoñ ko, im ej likũt armej ro rejjab wãnõk ñan iien eo naaj ko̦kkure* er ilo raanin ekajet eo,
10 el̦aptata ro rej pukot kilen ñan kattoon ãnbwinnin* ro jet im ro rej kõjekdo̦o̦n ro ewõr aer maroñ ñan tõl.*
Rein rej wel̦o̦k, rej kõm̦m̦an ñan kõn̦aan ko aer make, im rejjab mijak in kõnanaik ro Anij ej kautiej er,
11 ijoke enjel̦ ro, meñe el̦apl̦o̦k kajoor im maroñ ippãer, ak rejjab kwal̦o̦k naan ko reddo im n̦arueer kõnke rekõn̦aan kwal̦o̦k kautiej ñan* Jeova.*
12 Ak kõn armej rein, rej kõnono n̦ae men ko ejjel̦o̦k aer jel̦ã kaki, innem ial̦ eo aer enana ej tõll̦o̦k er ñan aer bõk ko̦kkure. Rein rej ãinwõt menninmour ko rejajel̦o̦kjen̦ me rej kõm̦m̦an ekkar ñan kõn̦aan ko aer, im rej l̦otaktok bwe ren po ilo aujiid im bõk ko̦kkure.
13 Renaaj eñtaan im jorrããn, im men in ej jinõkjeej eo aer kõn an lukkuun nana kõm̦m̦an ko aer.
Rej watõk bwe ej juon menin lañlõñ ñan kõm̦m̦ani m̦õn̦õn̦õ ko an kanniõk, jekdo̦o̦n ñe eraan. Rein rej ãinwõt mããr im lippijinjin ko ibwiljimi, im rej m̦õn̦õn̦õ* ilo katak ko aer retao ilo iien eo rej koba ippemi ilo iien kwõjkwõj ko.
14 Mejãer eobrak kõn lejãn,* rejjab maroñ bõjrak jãn jerawiwi, rej kareel ro rem̦õjn̦o̦, im rar kammineneik bũrueer ñan arõk. Rein rej ajri ro em̦õj kaliaik er.
15 Kõn aer ilo̦k jãn ial̦ eo ejim̦we, rar jebwãbwe. Rar l̦oore ial̦ eo an Beleam, l̦eo nejin Beor, eo ear kõn̦aan bõk on̦ããn jãn kõm̦m̦an ko renana.
16 Bõtab kar kauweiki kõn an kar jum̦ae men eo ejim̦we. Juon donkey ejaje kõnono, ear kõnono ilo ainikien armej im kajjioñ in bõbraiki ri-kanaan in jãn juon menin bwebwe ear itõn kõm̦m̦ane.
17 Rein rej unin dãn ko rem̦õrã im tab in kõdo̦ ko l̦añ ko rej pookto pooktak, im em̦õj kõpooj ñan er marok jilõñlõñ.
18 Elukkuun wãjepdik aer kõnono ak ejjel̦o̦k tokjãn. Rej peran in kõm̦m̦ani men ko renana,* im rej kowõnm̦aanl̦o̦k kõn̦aan ko an kanniõk bwe ren kareel armej ro ej kab m̦õj aer rõl̦o̦k jãn ro rej kõm̦m̦ani men ko renana.
19 Meñe rej kallim̦ur ñan armej rein bwe renaaj bõk anemkwõj, ak er make rej ri-kõm̦akoko ñan jerawiwi; bwe el̦aññe jabdewõt ej pãd ium̦win maroñ eo an juon armej, alikkar bwe ej ri-kõm̦akoko ñane.*
20 Ilo m̦ool, el̦aññe rar rõl̦o̦k jãn men ko rettoon an lal̦ in ikijjeen jel̦ãl̦o̦kjen̦ eo ejim̦we kõn Irooj im ri-Lo̦mo̦o̦r Jesus Christ, innem rej bar ro̦o̦l im bõk kun̦aaer ilo ejja men kein wõt im rej pãd ium̦win maroñ eo an men kein, eokwe wãween in repãd ie enanal̦o̦k jãn wãween eo rar pãd ie m̦okta.
21 Enaaj kar em̦m̦anl̦o̦k ñe rar jab lukkuun jel̦ã kõn ial̦ eo ewãnõk jãn aer jel̦ã innem ilo̦k jãn kien eo eokkwõjarjar rar bõke.
22 Em̦õj an wal̦o̦k ñan er jabõn kõnnaan in em̦ool ej ba: “Kidu eo ej jepl̦aak im kañ em̦m̦õj eo an make, im piik eo em̦õj karreoiki ej jepl̦aak im eddãpilpil ilo pedkat.”
Footnotes
^ Naan eo ilo kajin Grik ej a·sel′gei·a, ej jitõñl̦o̦k ñan juon eo ej lukkuun rupe kien ko an Anij im ejjab jook im kea ñan jidik.
^ Lale “Tartarus” ilo Kõmel̦el̦e Ko.
^ Ak emaroñ, “ilo juon ro̦ñ.”
^ Naan eo ilo kajin Grik ej a·sel′gei·a, ej jitõñl̦o̦k ñan juon eo ej lukkuun rupe kien ko an Anij im ejjab jook im kea ñan jidik.
^ Lale “Jeova” ilo Kõmel̦el̦e Ko.
^ Kajin Grik, “bukwe.”
^ Kajin Grik, “kanniõkin.”
^ Ak “rej reilal̦l̦o̦k ñan ro rej tõl.”
^ Ak “im̦aan mejãn.”
^ Lale “Jeova” ilo Kõmel̦el̦e Ko.
^ Ak “kajejjet kõn̦aan ko aer rekajoor.”
^ Lejãn ej ñe juon eo em̦õj an m̦are ej babu ak pãd ippãn juon eo ejjab pãleen.
^ Naan eo ilo kajin Grik ej a·sel′gei·a, ej jitõñl̦o̦k ñan juon eo ej lukkuun rupe kien ko an Anij im ejjab jook im kea ñan jidik.
^ Ak “ej pãd ium̦win maroñ eo an bar juon men, alikkar bwe ej ri-kõm̦akoko ñan men in.”
