2 Timote 1:1-18
1 Ña Paul, juon rijjilõk an Christ Jesus ekkar ñan ankilaan Anij im kallim̦ur eo kõn mour, eo ej ikijjeen Christ Jesus,
2 ñan Timote, eo nejũ ejitõnbõro:
Jouj eo el̦ap im tũriam̦o kab aenõm̦m̦an eo jãn Anij, eo ej Jemãdwõj, im jãn Christ Jesus ad Irooj, en pãd ippam̦.
3 Ij kam̦m̦oolol Anij, eo ij kabuñ ñane ãinwõt kar ro jim̦m̦aõ, im kõn juon bõklõkõt erreo, joñan ejjab jem̦l̦o̦k aõ keememej eok ilo aõ jar im akwel̦ap raan im boñ.
4 Ñe ij keememejtok am̦ kar dãnnin kõmjaal̦al̦, ekõm̦m̦an bwe in lukkuun kõn̦aan lo eok bwe in obrak kõn lañlõñ.
5 Ij keememej tõmak eo am̦ em̦ool, ejja tõmak eo wõt ear wõr ippãn jibũm̦ Lois im jinõm̦ Eunis, im el̦ap aõ tõmak bwe ebar wõr ippam̦.
6 Eñin unin ij kakeememej eok bwe kwõn kõjerbal menin lewaj eo an Anij ilo kijejeto, ãinwõt juon kijeek eo kwõj poktake, eo kwaar bõke ke iar likũt peiũ ioom̦.
7 Jetõb kwõjarjar* eo Anij ej letok ñan kõj ejjab kõm̦m̦an ad pikõt, ak ej letok kajoor, yokwe, im lol̦o̦kjen̦.
8 Kõn men in, kwõn jab jook in kwal̦o̦k kõn Irooj eo ad im kõn ña, eo ej juon ri-kalbuuj kõn e. Ak kwõn m̦õn̦õn̦õ in eñtaan kõn ennaan eo em̦m̦an ilo am̦ atartar ioon kajoor eo an Anij.
9 Ear lo̦mo̦o̦ren kõj im kũr kõj kõn kũr eo eokkwõjarjar. Ear jab kõm̦m̦ane men in kõn wõt jerbal ko ad, ak ear kõm̦m̦ane kõn karõk eo an make im kõn jouj eo an el̦ap. Ear kwal̦o̦k jouj eo an el̦ap ñan kõj jãn etto im etto ikijjeen Christ Jesus,
10 ak kiiõ, em̦õj an men in lukkuun alikkar ke ear wal̦o̦k ri-Lo̦mo̦o̦r eo ad, Christ Jesus, eo ear jol̦o̦k mej im kwal̦o̦k ñan kõj wãween bwe jen maroñ bõk mour im bõk ãnbwin eo ejjab wabanban ikijjeen ennaan eo em̦m̦an,
11 eo kar jitõñ eõ bwe in juon ri-kwal̦o̦k, im juon rijjilõk, im juon ri-katakin kake.
12 Eñin unin ij bareinwõt eñtaan kõn men kein, bõtab ijjab jook, kõnke ijel̦ã kõn Eo ij tõmak ilo e, im ij lukkuun lõke bwe emaroñ kõjparok men ko iar lil̦o̦k ñane, m̦ae raan eo.
13 Kwõn dãpij wõt wãween* katak ko rejim̦we* kwaar roñ jãn ña, ekoba tõmak im yokwe, ko rej wal̦o̦k jãn ad juon wõt ippãn Christ Jesus.
14 Kwõn kõjparok men in em̦m̦an kar lewaj ñan eok ikijjeen am̦ atartar ioon jetõb kwõjarjar,* eo ej pãd ippãd.
15 Kwõjel̦ã bwe aolep ro ilo jikin ko ilo Eijia* rar el̦l̦o̦k jãn ña, ekoba Paijelos im Hermojinis.
16 Irooj en kwal̦o̦k tũriam̦o ñan ro ilo m̦weo im̦õn Onesiporõs, bwe ekkã an kar kõkajoor eõ im ear jab jook kõn aõ kalbuuj.
17 Ilo m̦ool, ke ear pãd ilo Rom, ear kanooj pukpukote eõ, im ear lo eõ.
18 Irooj en kõm̦m̦an bwe en bõk tũriam̦o jãn Jeova* ilo naaj raan en̦. Im el̦ap am̦ jel̦ã kõn aolep jerbal ko ear kõm̦m̦ani ilo Epesõs.
Footnotes
^ Ak “Kajoor.” Lale “Jetõb kwõjarjar” ilo Kõmel̦el̦e Ko.
^ Ak “laajrakin.”
^ Ak “rem̦m̦an; ewõr tokjãer.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Lale “Eijia” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
