2 Timote 4:1-22
4 Ij jiroñ eok im̦aan mejãn Anij im Christ Jesus, eo enaaj ekajete ro remour im ro remej, im ikijjeen iien eo enaaj wal̦o̦k im ikijjeen Aelõñ eo an:*
2 Kwõn kwal̦o̦k kõn naan eo; kwõn jab aepedped* kake ilo iien ko rem̦m̦an im ilo iien ko reppen; kwõn kauwe, kaje, im kakapilõk, bõtab kwõn kõm̦m̦ane ilo el̦ap meanwõd im ãinwõt juon ri-katakin eo em̦m̦an.
3 Bwe ewõr juon iien armej reban kijenmej kõn katak ko rejim̦we,* bõtab renaaj make kappok aer ri-katakin, ro im renaaj kwal̦o̦k men ko em̦m̦an ñan an lo̦jilñier roñ* ekkar ñan kõn̦aan ko aer.
4 Renaaj el̦l̦o̦k jãn aer roñjake m̦ool eo, im renaaj roñjake bwebwenato ko reriab.
5 Ak kwe, kwõn ekkõl wõt ilo men otemjej, kijenmej ium̦win men ko reppen, kõm̦m̦ane jerbal eo an ro rej ri-kwal̦o̦k naan,* im en lõt im jejjet jerbal eo am̦ ñan Anij.
6 Bwe ña ij ãinwõt juon dãnnin joortak eo em̦õj lutõkl̦o̦k n̦a ioon lokatok eo, im iien aõ anemkwõj elukkuun epaaktok.
7 Iar kate eõ bait ilo bait eo em̦m̦an, iar ettõr ilo iãekwõj eo ñan jem̦l̦o̦kin, im iar l̦oor wõt tõmak eo.
8 Jãn kiiõ im etal, em̦õj kõpooj juon kũrawũn in wãnõk ñan ña, eo Irooj, ri-ekajet eo ewãnõk, enaaj letok ñan ña ãinwõt juon menin nõbar ilo raan eo. Bõtab ejjab ñan ña wõt, ak ñan bar ro rar kanooj kijoororetok iien eo enaaj kwal̦o̦k e make.
9 Kwõn lukkuun kate eok bwe kwõn m̦õkajtok ñan ippa.
10 Bwe Dimas ear el̦l̦o̦k jãn ña kõn an yokwe jukjukun pãd* in, im ear etal ñan Tessalonika, ak Kressens ear etal ñan Galetia, im Taitõs ear etal ñan Dalmetia.
11 Luk wõt epãd ippa, ak kwõn bõktok Mark ippam̦tok bwe el̦ap an jipañ eõ ilo jerbal in.
12 Em̦õj aõ jilkinl̦o̦k Tikikõs ñan Epesõs.
13 Ñe kweitok, kwõn kab jibwetok kopã eo iar likũti ippãn Karpos ilo Troas, im bõktok bok lemlem ko, el̦aptata bok lemlem ko kõm̦m̦an jãn kilin menninmour.
14 Alexander, eo ej ãeik men ko jãn kõba, ear kõm̦m̦ani elõñ men ko renana ñan kõjorrããn eõ. Jeova* enaaj ukotl̦o̦k ñane ekkar ñan kõm̦m̦an ko an.
15 Im kwe kwõj aikuj bareinwõt kõjparok eok jãne bwe ekanooj l̦ap an jum̦ae ennaan eo jej kwal̦o̦k kake.
16 Iien eo jinointata iar jutak im̦aan ri-utiej ro bwe in jojomare eõ, ejjel̦o̦k en̦ ear jutak ilikũ, er aolep rar ilo̦k jãn ña—en ejjel̦o̦k ruõn rein.
17 Bõtab Irooj ear jutak ilikũ im koobrak eõ kõn kajoor, kõnke en kõjerbal eõ bwe en lõt im jejjet jerbalin kwal̦o̦k naan, im bwe aolep aelõñ ko ren maroñ roñ kake; im iar rõl̦o̦k jãn lo̦ñiin l̦aiõn eo.
18 Irooj enaaj lo̦mo̦o̦ren eõ jãn aolep jerbal ko renana im enaaj kõjparok eõ ñan Aelõñ eo an ilañ. Aiboojoj en ilo̦k ñane ñan indeeo im indeeo. Amen.
19 Lel̦o̦k aõ yokwe Priska im Akula im ro ilo m̦weo im̦õn Onesiporõs.
20 Erastõs ear pãdwõt ilo Korint, ak iar likũt wõt Tropimõs ilo Mailitõs kõnke enañinmej.
21 Kwõn lukkuun kate eok bwe kwõn tõpartok ije m̦okta jãn iien añõneañ.*
Eubulõs ej lewaj an yokwe eok, bar Pudens, Lainõs, Klaudia im aolep ro jeid im jatid rej lewaj aer yokwe.
22 Irooj en kõjeraam̦m̦an l̦õmn̦ak* ko rem̦m̦an kwõj kwal̦o̦ki. Jouj eo an el̦ap en pãd ippemi.
Footnotes
^ Ak “Kien eo an.” Lale “Aelõñ eo an Anij” ilo Kõmel̦el̦e Ko.
^ Ak “kwõn kijejeto.”
^ Ak “rem̦m̦an; ewõr tokjãer.”
^ Ak “jiroñ er men ko rekõn̦aan roñjaki.”
^ Ak “en jab bõjrak am̦ kwal̦o̦k kõn ennaan eo em̦m̦an.”
^ Lale “Jukjukun pãd” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ak “iien m̦õl̦o.”
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
